رەسەيدىڭ فەدەرالدىق قاۋىپسىزدىك قىزمەتىنىڭ وفيتسەرى، سوعىس قىلمىسكەرى يگور سترەلكوۆ (گيركين) ۋكراينا سوعىسىنداعى جەڭىلىس پۋتين ءۇشىن قايعىلى اياقتالاتىنىن ايتتى، دەپ جازادى halyq-uni.kz.

ول رەسەيدىڭ ۋكرايناعا قارسى باسقىنشىلىق سوعىسىندا جەڭىلىسكە ۇشىراۋى رف-نىڭ پرەزيدەنتى ۆلاديمير پۋتين ءۇشىن گااگا سوتىمەن اياقتالاتىنىنا سەنىمدى.

– رەسەي ۋكراينامەن سوعىستا تۇپكىلىكتى جەڭىلگەننەن كەيىن ۆلاديمير پۋتين وسىنىڭ بارلىعىنا ايىپتى رەتىندە اتالادى. ونىڭ ماڭىنداعىلاردىڭ ءبارى سوعىستى ەشكىممەن اقىلداسپاي باستاعان سونىڭ ءوزى ەكەنىن ايتىپ شىعا كەلەدى، – دەدى يگور سترەلكوۆ.

بۇعان قوسا، ول ءپۋتيننىڭ رەسەيدى ادەيى كۇيرەتۋگە دەيىن جەتكىزۋ ءۇشىن قويعان باتىستىڭ اگەنتى بولۋى دا مۇمكىن ەكەنىن ايتتى. سونىمەن بىرگە، سترەلكوۆ رف پرەزيدەنتىن وتە قايعىلى جازمىشتىڭ كۇتىپ تۇرعانىنا توقتالدى.

– ول سول جاقتىڭ اگەنتى بولدى ما، جوق پا، ءبارىبىر. ءبىز ءۇشىن… بۇل سوعىستا جەڭىلسە، ونىڭ جولى بىردەن كەسىلەدى، تاعدىرى تىنادى، باياعى سەرب ميلوشەۆيچ سياقتى گااگادا سوتتالاتىن ريتۋالدى قۇرباندىققا اينالادى، – دەدى رەسەيلىك ديۆەرسانت.

سترەلكوۆ ءپۋتيننىڭ فەدەرالدى جينالىستاعى بوس ۋادەلەرىنەن قاتتى كوڭىلى قالعانىن ايتتى. پرەزيدەنتتىڭ سونداعى ءسوزى ونىڭ بۇدان ءارى نە ىستەۋ كەرەك ەكەنىن بىلمەيتىنىن بايقاتقان. وندا شىن مانىندە گااگا سوتىنا بارۋدان باسقا جول قالعان جوق دەگەن پىكىردە ول.

– جىل ءبىزدىڭ اسكەرلەرىمىزدىڭ زور شىعىندارعا ۇشىراۋىمەن وتە اۋىر باستالدى. ال پرەزيدەنت ەشتەڭە بولماعانداي، مۇنىڭ ءبارى قورعانىس مينيسترلىگىنىڭ ىسىندەي ءتۇر تانىتادى. مۇنى ساتقىندىق دەپ اتاۋعا بولادى، – دەپ مالىمدەدى ديۆەرسانت.

ەندى يگور سترەلكوۆ-گيركيننىڭ ءوزى تۋرالى ءبىر اۋىز ءسوز. ول – فەدەرالدىق قاۋىپسىزدىك قىزمەتىنىڭ وفيتسەرى، كەزىندە دونباستىڭ «قورعانىس ءمينيسترى» بولعان، ۋكراينا جەرىندە اپاتقا ۇشىراعان مالايزيا جولاۋشىلار ۇشاعىن اتىپ تۇسىرۋگە قاتىسقان تورتەۋدىڭ ءبىرى. وسى قىلمىسى ءۇشىن امستەردام سوتى ونى وتكەن كۇزدە ءومىر بويى تۇرمەدە وتىرۋ جازاسىنا كەستى.

Abai.kz