گرۋزيا پارلامەنتى سەيسەنبى كۇنى ءبىرىنشى وقىلىمدا ماقۇلداعان «شەتەل اگەنتتەرى» تۋرالى زاڭعا بايلانىستى باستالعان تبيليسي ورتالىعىنداعى نارازىلىق اكتسياسى ۋشىعىپ، ەكىنشى كۇنگە جالعاستى.

بىرنەشە ساعات بويى مىڭداعان ادام قاتىسقان ەرەۋىل سالىستىرمالى تۇردە تىنىش ءوتتى. جەرگىلىكتى ۋاقىت بويىنشا ءتۇن ورتاسىنا ءبىر ساعات قالعاندا، نارازىلىق بىلدىرۋشىلەردىڭ ءبىر بولىگى پارلامەنت عيماراتىن قورشاي باستاعاندا جاعداي ۋشىقتى.

الەۋمەتتىك جەلىلەردە نارازىلىق بىلدىرۋشىلەردىڭ پارلامەنت عيماراتىنىڭ تەرەزەلەرىن سىندىرماق بولعانى، پوليتسيا مەن ارنايى جاساقتىڭ سۋ اتقىشتار، دىبىس شىعاراتىن گراناتالار مەن كوزدەن جاس اعىزاتىن گاز قولدانىپ جاتقانىن كورسەتەتىن بەينەماتەريالدار پايدا بولدى. گرۋزيا بيلىگى نارازىلىق كۇش كورسەتۋ سيپاتىنا يە بولدى دەپ مالىمدەدى.

وسىدان كەيىن ارنايى جاساق نارازىلىق بىلدىرۋشىلەردى پارلامەنت جانىنداعى الاڭ مەن ماڭىنداعى كوشەلەردەن ىعىستىرىپ شىعارۋعا كىرىستى.

ءتۇن ورتاسىنان كەيىن ارنايى كۇشتەر رۋستاۆەلي داڭعىلىنداعى اكتسيانى تاراتىپ، پارلامەنتكە قاراما-قارسى اۋماقتى تولىعىمەن باسىپ الدى.

گرۋزين اقپارات قۇرالدارىنىڭ حابارلاۋىنشا، نارازىلىق بىلدىرۋشىلەر اراسىندا ارنايى جاساقتان قاشقان كەزدە پايدا بولعان گاز، ءتۇتىن جانە توبەلەستەن زارداپ شەككەندەر كوپ. قاماۋعا الىنعاندار دا بار.

Abai.kz