استانا قالاسىنىڭ اكىمشىلىك سوتىندا قازاقستان حالىق پارتياسىنىڭ وكىلى نۇريا بالتابايقىزىنىڭ "ار-نامىسىما ءتيدى" دەگەن ارىزى بويىنشا ءماجىلىس دەپۋتاتتىعىنا كانديدات ارمان شوراەۆتىڭ سوتى ءوتىپ جاتىر.

جۇما، 10 ناۋرىزدا بۇل جەرگە ارمان شوراەۆتى قولداپ، جۇزگە جۋىق ادام كەلگەن. سوت باستالماي جاتىپ، شۋ شىقتى، دەپ حابارلادى وقيعا ورنىندا جۇرگەن ازاتتىق ءتىلشىسى.

سوت وكىلدەرى بەلسەندىنى قولداعان حالىققا سوتتى "دالىزدە مونيتورى بار ەكراننان باقىلايسىزدار، سول جەردە وتىراسىزدار" دەپ ەدى، جينالعاندار بۇعان كەلىسپەدى. ولار "سوت پروتسەسى وتەتىن زالعا كىرىپ، قاتىسامىز، ءبىزدى سول جاققا كىرگىزىڭدەر" دەپ تالاپ ەتتى. بىراق جۇرت تالابىنا قاراماستان زالعا تەك اقپارات قۇرالدارى كىرگىزىلدى. جۇرت سىرتتا "كىرگىز!" دەپ ايقايلادى.

سوتقا شاعىم بەرۋشى نۇريا بالتابايقىزى ونلاين قوسىلدى.

اقپاراتقا قاراعاندا، قازاقستان حالىق پارتياسىنىڭ مۇشەسى نۇريا بالتابايقىزىنىڭ سوتقا شاعىمدانۋىنا ارمان شوراەۆتىڭ 2023 جىلى 20 اقپاندا Facebook الەۋمەتتىك جەلىسىندەگى جازباسى تۇرتكى بولعان دەپ ايتىلادى. شاعىم بەرۋشى بالتابايقىزى ارمان شوراەۆتى جەلىدە "قازاقستان حالىق پارتياسىنىڭ توراعاسى ەرمۇحامەت ەرتىسباەۆتىڭ سۋرەتىن جاريالاپ" ونى "ساتقىن" دەپ اتاعانىن، وسى جازبا اتالعان پارتيا مۇشەسى رەتىندە "ار-نامىسىنا تيگەنىن" ايتقان.

ال ارمان شوراەۆ قازاقستان حالىق پارتياسىنىڭ مۇشەسى ەرمۇحامەت ەرتىسباەۆ پەن رەسەي ءجۋرناليسى ۆلاديمير سولوۆەۆتىڭ ۆيدەوسۇحباتىنان كەيىن "بۇل ساتقىندارعا داۋىس بەرمەڭدەر!" دەگەن ءسوز جازعانىن راستايتىنىن جانە ول سوزىنەن تايمايتىنىن ايتقان.

10 ناۋرىز كۇنگى سوت وتىرىسىندا ارمان شوراەۆ سوتقا سوزىنە "دالەل بولاتىن ۆيدەونى" ۇسىندى. ال نۇريا بالتابايقىزى سوتتا "پارتيا توراعاسىنىڭ ۇستانىمىنا قاتىسىم جوق، اركىمنىڭ ءوز پىكىرى بار" دەدى. ول شوراەۆقا قاراتا "مەن ساتقىن بولسام، سوتقا دالەل كورسەتىڭىز" دەدى.

ال شوراەۆتىڭ ادۆوكاتى بالتابايقىزىنىڭ ءوزى الەۋمەتتىك جەلىدە "شوراەۆ ساتقىن" دەپ كوممەنتاري جازعانىن، سول كوممەنتاريىنىڭ سكرينشوتىن سۋدياعا دالەل رەتىندە كورسەتتى. مۇنى كورگەن بالتابايقىزى "ول مەنىڭ كوممەنتاريىم ەمەس" دەدى.

وسىدان كەيىن سۋديا "ۇسىنىلعان دالەلدەردى قاراپ كورەمىن" دەپ كەلەسى سوت وتىرىسىن 14 ناۋرىز ساعات 11-گە بەلگىلەدى.

جۇما كۇنى اكىمشىلىك سوت ماڭىن ارنايى جاساق باقىلاپ، عيمارات جانىندا اۆتوزاكتار ءتىزىلىپ تۇردى.

بۇعان دەيىن شوراەۆ سوتتى مەڭزەپ، "بيلىك وسىلايشا مەنى سايلاۋدان شەتتەتكىسى كەلەدى" دەپ توپشىلاعان. ال بيلىك وكىلدەرى ونىڭ سوزىنە رەاكتسيا بىلدىرمەدى.

ارمان شوراەۆ بيىل 19 ناۋرىزدا وتەتىن سايلاۋعا ءماجىلىس دەپۋتاتتىعىنا كانديدات رەتىندە ءوز-ءوزىن ۇسىنعان.

بيىل اقپان ايىندا قازاقستان حالىق پارتياسىنىڭ توراعاسى ەرمۇحامەت ەرتىسباەۆ "ۋكرايناداعى سوعىستى ناسيحاتتاۋشى" رەتىندە باتىس سانكتسياسىنا ىلىنگەن رەسەي ءجۋرناليسى ۆلاديمير سولوۆەۆقا سۇحبات بەرگەن. بۇل سۇحبات قازاق قوعامىندا ءتۇرلى رەاكتسيا تۋعىزعان.

قازاقستاننىڭ بۇرىنعى پرەزيدەنتى نۇرسۇلتان نازارباەۆقا كوپ جىل كەڭەسشى بولعان، اقپارات ءمينيسترى، قازاقستاننىڭ گرۋزياداعى ەلشىسى قىزمەتتتەرىن اتقارعان ەرمۇحامەت ەرتىسباەۆ 2022 جىلى قازاقستان حالىق پارتياسىنا قوسىلىپ، توراعا بولعان. قازاقستان حالىق پارتياسى – پارلامەنت سايلاۋىنا ءتۇسىپ وتىرعان جەتى پارتيانىڭ ءبىرى.

Abai.kz