قر پرەمەر-ءمينيسترى لاۋازىمىنا «AMANAT» فراكتسياسى ءاليحان سمايلوۆتىڭ كانديداتۋراسىن ۇسىندى.

وسى ورايدا، «AMANAT» پارتياسىنىڭ اتقارۋشى حاتشىسى ەلنۇر بەيسەنباەۆ الەۋمەتتىك جەلىدە ءوز پىكىرىن ءبىلدىردى.
ونىڭ ايتۋىنشا، مەملەكەت باسشىسىنىڭ باستاماسىمەن ەلىمىزدەگى ساياسي جۇيەنى قايتا جاڭعىرتۋ پروتسەسى كونستيتۋتسيالىق رەفورمادان ناقتى باستاۋ الدى. ەندىگى ماڭىزدى قادام – ۇكىمەتتىڭ جاڭا قۇرامىن جاساقتاۋ.

«AMANAT» سايلاۋدا كوپشىلىكتىڭ داۋىسىنا يە بولىپ جەڭىسكە جەتكەن پارتيا رەتىندە بۇگىن پرەمەر-مينيستر لاۋازىمىنا كانديداتۋرا ۇسىندى. مۇنداي تاجىريبە پارلامەنتتىڭ ءرولىن كۇشەيتىپ قانا قويماي، ساياسي پارتيالاردىڭ جاۋاپكەرشىلىگىن ارتتىرادى. ەندىگى كەزەكتە ۇكىمەتتىڭ جۇمىسى فراكتسيا تاراپىنان ءجىتى باقىلاۋدا بولىپ، ونىڭ ءاربىر شەشىمى پارتيا ىشىندە سۇرالاتىن بولادى. بۇل جۇمىس ماجىلىستەگى فراكتسيانىڭ بەدەلى مەن ونىڭ فۋنكتسيونالدىق مۇمكىندىكتەرىن كەڭەيتەدى»، - دەدى پارتيا فراكتسياسىنىڭ جەتەكشىسى.

سونداي-اق، ەلنۇر بەيسەنباەۆ قاجەت بولسا، پارتيا ءتيىستى شارالار قولدانۋعا دايىن ەكەنىن مالىمدەدى.

«بۇل پرەزيدەنت جاريالاعان «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىنىڭ ناقتى ىسكە اسۋى دەپ بىلەمىز. راس، سوڭعى ءبىر جىلدا ۇكىمەتكە قوعام تاراپىنان ايتىلعان سىن از بولعان جوق. بىراق، مينيسترلەر كابينەتىنىڭ نەبارى ءبىر-اق جىل جۇمىس ىستەگەنىن ەسكەرۋىمىز قاجەت. ءبىر جىل – ۇكىمەتتىڭ جۇمىسىن وبەكتيۆتى باعالاۋ ءۇشىن تىم قىسقا ۋاقىت»، - دەدى ە.بەيسەنباەۆ.

سونىمەن قاتار، ول ەلىمىزدە باعانىڭ تۇراقتاماۋى، جۇمىسسىزدىق، ازاماتتاردىڭ تابىسىن ارتتىرۋ، جىلۋمەن قامتاماسىز ەتۋ، ينفراقۇرىلىمدى جاقسارتۋ، اۋىلدى تۇلەتۋ سياقتى ۇكىمەتتىڭ الدىندا اسا اۋقىمدى مىندەتتەر تۇرعانىن اتاپ ءوتتى.

«ءبىز بۇل ماسەلەلەردى جاقسى بىلەمىز جانە ونى ۇكىمەتپەن بىرگە شەشۋىمىز قاجەت. ۇكىمەتتى ءجيى اۋىستىرعاننان ماسەلەلەر شەشىلۋى بىلاي تۇرسىن، قوردالانا بەرەتىنىن ۋاقىت كورسەتتى. سوندىقتان، مينيسترلەر كابينەتى بىلتىر باستاعان ءىستى جالعاستىرىپ، حالىقتىڭ ءال-اۋقاتىن ارتتىرۋ بويىنشا جۇمىستى تەز ارادا شيراتۋى قاجەت»، - دەپ تۇيىندەدى ول.

Abai.kz