رەسەيدە تاعى دا جارىلىس بولدى. وقيعا سالدارىنان پۋتيننىڭ ارناۋلى وپەراتسياسىن قولداۋشى بلوگەر جەر جاستاندى. بىلتىر تامىزدا تانىمال ساياساتتانۋشى، ۇلتشىل فيلوسوف الەكساندر دۋگيننىڭ قىزى ماسكەۋدە كولىگى جارىلىپ، وپات بولعان ەدى. بۇل جولعى جارىلىس جەكسەنبى، 2 ءساۋىر كۇنى سانكت-پەتەربۋرگتە كافەدە بولعان. جارىلىستان تانىمال اسكەري بلوگەر، رەسەيدىڭ ۋكرايناداعى باسقىنشىلىق سوعىسىن قولداۋشى ۆلادلەن تاتارسكي قازا تاپتى. وقيعا كۋاگەرلەرى بومبانىڭ بلوگەر ءوز قولىمەن العان ءمۇسىننىڭ ىشىندە بولعانىن ايتادى. جەرگىلىكتى بيلىك جارىلىستان زارداپ شەككەندەردىڭ سانى 32-گە جەتكەنىن حابارلادى.

جارتى ميلليونعا جۋىق جازىلۋشىسى بار بلوگەر ۆلادلەن تاتارسكي جۇرتپەن كەزدەسۋ وتكىزىپ جاتقاندا، وعان بەيتانىس ايەل كادەگە قوراپ ۇسىنعان. سونىڭ ىشىندەگى مۇسىنگە جارىلعىش زات قويىلعان دەگەن كۇدىك بار. تاتارسكي ءمۇسىندى جانىندا تۇرعان ۇستەلگە قويعان سوڭ، كۇشتى جارىلىس بولعان.

ۆلادلەن تاتارسكيدىڭ شىن ەسىمى – ماكسيم فومين. ول بۇل لاقاپ اتىن ۆيكتور پەلەۆيننىڭ "Generation پ" دەگەن كىتابىنان العان. Telegram-ارناسىندا ۋكرايناداعى سوعىس جايلى حابار تاراتىپ وتىرعان.

دونباسستا تۋعان ول كاسىبىن كومىر شاحتاسىندا باستاپ، كەيىن جيھاز بيزنەسىنە وتكەن. قارجىلاي قيىندىققا دۋشار بولىپ، بانك توناۋعا بارعان، سول قىلمىسى ءۇشىن سوتتى بولعان. 2014 جىلى دونباسستا رەسەيشىل سەپاراتيستەر كوتەرىلگەندە، قاماۋدان قاشىپ، سەپاراتيستەر قاتارىنا قوسىلعان. سوعىس شەبىندە ءجۇرىپ، بلوگەرگە اينالعان.

تاتارسكي سوعىسقۇمارلىعىمەن تانىمال. بىلتىر 30 قىركۇيەكتە رەسەي پرەزيدەنتى ۆلاديمير پۋتين ۋكراينا اۋماعىنداعى دحر مەن لحر جىكشىل قۇرىلىمدارىن جانە حەرسون مەن زاپوروجە وبلىستارىن رەسەي قۇرامىنا كىرگىزۋ تۋرالى كەلىسىمگە قول قويعاندا، تاتارسكي «كىمدى ءولتىرۋ كەرەك بولسا، سونىڭ ءبارىن ولتىرەمىز، تونايمىز» دەپ ەكىلەنگەن. رەسەيدىڭ ۋكرايناداعى ازاماتتىق ينفراقۇرىلىم نىساندارىن اتقىلاۋىنا ايىزى قانىپ، قولداۋ بىلدىرگەن.

رەسەيدىڭ «ينتەرفاكس» اقپارات اگەنتتىگى جارىلىسقا قاتىسى بار دەگەن كۇدىككە سانكت-پەتەربۋرگ تۇرعىنى داريا ترەپوۆا ىلىنگەنىن حابارلادى. اگەنتتىكتىڭ مالىمەتىنشە، ترەپوۆا وسىعان دەيىن سوعىسقا قارسى نارازىلىق جيىندارىنا قاتىسىپ، بىرنەشە رەت قامالعان. ونىڭ قاماۋداعى ساياساتكەر ناۆالنىيدىڭ جەمقورلىققا قارسى ۇيىمىمەن بايلانىسى بار ەكەنى دە ايتىلۋدا. پۋتينشىل اسكەري بلوگەرلەر مەن ساراپشىلار ادەتتەگىدەي جارىلىسقا ۋكراينانىڭ اسكەري بارلاۋ قىزمەتىن ايىپتاپ، بىلتىر تامىزدا اجال قۇشقان ۇلتشىل تەلەجۇرگىزۋشى داريا دۋگينانىڭ قازاسىنا ۇقساتتى. رەسەي سىرتقى ىستەر مينيسترلىگىنىڭ ءباسپاسوز حاتشىسى ماريا زاحاروۆا دا: «كيەۆ رەجيمى مەن ونىڭ جاقتاستارى رەسەي جۋرناليستەرىنە تۇراقتى قوقان-لوقى كورسەتىپ وتىر» دەدى .رەسەيدىڭ ۋكرايناعا باسىپ كىرگەنىن اشىق قولدايتىن الەكساندر دۋگين دە: «تاتارسكي رەسەي حالقىن قۇتقارامىن دەپ قازا تاپتى، ول ەل ەسىندە ماڭگى قالادى. تەرروريستەرمەن شارتسىز بەرىلۋدەن باسقا كەلىسسوز جۇرگىزۋگە بولمايدى. كيەۆتە جەڭىس پارادى بولۋعا ءتيىس» دەدى. جارىلىس بولعان كافەنىڭ يەسى «ۆاگنەر»جالدامالى جەندەتتەرىنىڭ اتامانى پريگوجين ول بولجاممەن كەلىسپەيدى.

ۋكراينا پرەزيدەنتىنىڭ كەڭەسشىسى ميحايل پودولياك Twitter جەلىسىندە «قۇتىداعى ورمەكشىلەر ءبىر-ءبىرىن جەي باستادى. ىشكى تەرروريزم – ىشكى ساياسي كۇرەستىڭ قۇرالىنا اينالارى ۋاقىت ەنشىسىندەگى ماسەلە ەدى» دەپ جازدى.

وتكەن 17-ناۋرىزدا گااگا سوتى ءپۋتيندى «سوعىس قىلمىسكەرى» دەپ تانىپ، حالقارالىق ىزدەۋ جاريالاعانى جالپاق جۇرتقا ءمالىم. ساراپشىلار حالىقارالىق سوتتىڭ سيمۆولدىق ءمانى بار شەشىمىنىڭ رەسەيدەگى پۋتينگە نارازى كۇشتەرگە، ونى اۋدارۋعا مىقتى دايەك تاۋىپ بەرگەنىن ايتقان ەدى. ارادا اي وتپەي جارىلىس ورىن الدى. پۋتين جاقتاستارى مەن قارسىلاستارىنىڭ كۇرەسى قيانكەسكىلەنىپ، اشىق شىعىپ كەلە جاتقان سياقتى.

Abai.kz