بيىلعى ناۋرىز ايىندا اسكەري عىلىمي-زەرتتەۋ ورتالىعىنىڭ باس عىلىمي قىزمەتكەرى، پولكوۆنيك ەربولات ادىلباەۆ اسكەري جوعارى وقۋ ورىندارىندا 20-دان استام ماماندىق تۇرلەرى قامتىلىپ وتىرعانى ايتتى.

«قازاقستاندا جوعارى اسكەري ءبىلىم بەرەتىن اقتوبەدەگى اۋە قورعانىسى كۇشتەرىنىڭ اسكەري ينستيتۋتى، قۇرلىق اسكەرلەرىنىڭ اسكەري ينستيتۋتى، راديوەلەكترونيكا جانە بايلانىس اسكەري-ينجەنەرلىك ينستيتۋتى 20-دان استام ماماندىق بويىنشا وقىتادى. ءبىلىم وردالارىندا زەنيتتىك زىمىران ماماندارى، ارتيللەريست، موتواتقىش، ۇشقىشتار ءبىلىم بەرەدى»،-دەدى ە. ادىلباەۆ.

ونىڭ ايتۋىنشا، وقۋعا كەلەتىن جاستار پيسحولوگيالىق جانە فيزيكالىق تۇرعىدا مىقتى، ءارى ءبىلىمدى بولعانى ابزال. سوندىقتان بارلىق تۇلەكتى ەمتيحاندار مەن، ۇبت-عا دايىندالۋعا شاقىردى.

«ءوزىمىز بالا كەزىمىزدە وفيتسەر بولۋدى ارماندا، بەسىنشى سىنىپتان باستاپ دايىندىققا كىرىسەتىن ەدىك»،-دەيدى ول.

پولكوۆنيك كوپبالالى وتباسىلارعا، اسكەري قىزمەتشىلەردىڭ بالالارىنا، مەرزىمدى اسكەري بورىشىن وتەپ جۇرگەن ساربازدارعا جەڭىلدىكتەر جاسالعانىن ايتتى.

وسى ورايدا ايتىپ كەتۋ كەرەك، بيىلعى جىلدان باستاپ اسكەري بارىشىن وتەگەندەرگە جوعارى وقۋ ورىندارىنا ءتۇسۋ الدەقايدا جەڭىلدەدى. وزگەرىستەرگە سايكەس، ولار ەندى بىرىڭعاي تەستىلەۋدەن وتپەي-اق ءبىلىم وشاعىنا قابالدانا الادى.

قر قورعانىس ءمينيسترىنىڭ كەڭەسشىسى ايگۇل تولەمباەۆانىڭ ايتۋىنشا، اسكەري قىزمەتىن اتقارعان ازامات ۇلتتىق بىرىڭعاي تەستىنى تاپسىرماي، ەكى جىل ىشىندە اقىلى نەگىزدە جوو-نا تۇسە الادى. ال ەكىنشى مۇمكىندىك: جاۋىنگەرلىك دايارلىقتا ءوزىن جاقسى جاعىنان كورسەتىپ، تاپسىرمالارداردى ورىنداۋ بارىسىندا جوعارى ناتيجەگە جەتكەن، تارتىپكە باعىنىپ، ۇلگى كورسەتكەن اسكەري قىزمەتشىلەر ەمتيحانسىز جوو-نا ءتۇسىپ، تەگىن وقي الادى.

«ناقتىلاپ ايتساق، مەرزىمدى اسكەري قىزمەتىن وتەپ شىققان قاتارداعى سارباز وفيتسەر شەنىن العىسى كەلسە، اۋەلى اسكەري كافەدرادا وقىپ، لەيتەنانت اتانۋى كەرەك»،-دەيدى قورعانىس ءمينيسترىنىڭ كەڭەسشىسى.

ايگۇل تولەمباەۆا بۇل شارالاردىڭ 2022 جىلدان باستاپ قولعا الىنىپ كەلە جاتقانىن ايتادى.

«بۇل جوبا قر قارۋلى كۇشتەرىنىڭ جانە باسقا اسكەري قۇرالىمدار قاتارىندا مەرزىمدى قىزمەتىن وتەگەن ازاماتتاردىڭ ءبىلىم الۋىنا جاقسى باستاماشى بولدى. جاستار تاراپىنان اتالعان جوبا وڭ پىكىرگە يە بولدى»،-دەدى ول.

قازىرگى كۇنى اسكەر قاتارىنان ورالعان ساربازدارعا 40-تان استام جوو ەسىگىن ايقارا اشىپ وتىر. ولار جاۋىنگەرلەرگە 3000 گرانت بەرمەك. ول ءۇشىن جاستار اسكەري قىزمەتتى وتكەرگەنى تۋرالى انىقتاما، اسكەري بيلەت پەن جەكە كۋالىكتىڭ، ءبىلىمى تۋرالى قۇجاتتىڭ كوشىرمەسىن، 086 انىقتاماسىن ت.ب ءتيىستى قۇجاتتاردى جوعارى وقۋ ورىندارىنا تاپسىرۋ كەرەك.

سونداي-اق قورعانىس مينيسترلىگى قاجەتتىلىككە قاراي اسكەري كادرلاردى شەت ەلدەردە دە وقىتادى.

اسكەري ءبىلىم جانە عىلىم دەپارتامەنتىنىڭ باسشىسى جۇمابەك احمەتوۆ قورعانىس مينيسترلىگىنىڭ وقۋ ورىندارى جاقىن جانە الىس شەت ەلدەردە اسكەري ءبىلىم الۋ ءۇشىن ازاماتتاردى ىرىكتەۋدىڭ باستالعانىن ايتقان بولاتىن.

«رەسەي، بەلارۋس، ارمەنيا، اقش، تۇركيا، ءۇندىستان جانە پاكىستان قورعانىس ۆەدومستۆولارىنىڭ اسكەري جوعارى وقۋ ورىندارىنان ۇشۋ، تەڭىز، قۇرلىق، ينجەنەرلىك، مەديتسينالىق جانە گۋمانيتارلىق ماماندىقتاردى يگەرىپ شىعۋعا بولادى»، - دەدى جۇمابەك احمەتوۆ.

ايتا كەتەيىك ەلىمىزدە ءۇش اسكەري ينستيتۋتتا جوعارى ءبىلىم بەرىلەدى. ولار بارلىق دەرلىك قارۋلى كۇشتەردىڭ نەگىزگى ماماندىقتارىن قامتيدى.

الماتىداعى قۇرلىق اسكەرلەرىنىڭ اسكەري ينستيتۋتى كوماندالىق ماماندىقتار بويىنشا كادرلار دايارلاۋدىڭ كوشباسشىسى. قازاقستان وفيتسەرلەر كورپۋسىنىڭ 50 پايىزى وسى ءبىلىم ورداسىنان وقىعاندار.

قۇرلىق اسكەرلەرىنىڭ اسكەري ينستيتۋتى التى ماماندىق جانە 14 بىلىكتىلىك بويىنشا جوعارى اسكەري-كاسىپتىك ءبىلىم بەرۋ باعدارلاماسىمەن وفيتسەرلىك كادرلاردى دايارلايدى.

اقتوبەدەگى كەڭەس وداعىنىڭ باتىرى تالعات بەگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى قر قك اۋە قورعانىسى كۇشتەرىنە قاجەتتى ۇشۋ جانە ينجەنەرلىك-تەحنيكالىق قۇرامدى دايارلايدى.

الماتىداعى راديوەلەكترونيكا جانە بايلانىس اسكەري-ينجەنەرلىك ينستيتۋتى اۋە قورعانىسى، بايلانىس، باسقارۋدىڭ اۆتوماتتاندىرىلعان جۇيەلەرى، اقپاراتتى وڭدەۋ جانە قاۋىپسىزدىك ماماندارىن دايارلاۋ ورتالىعى بولىپ تابىلادى. ينستيتۋت التى ماماندىق پەن توعىز بىلىكتىلىك بويىنشا وفيتسەرلەردى دايارلايدى.

قازاقستاننىڭ تۇڭعىش پرەزيدەنتى اتىنداعى ۇلتتىق قورعانىس ۋنيۆەرسيتەتى ماگيستراتۋرا جانە دوكتورانتۋرا باعدارلامالارى بويىنشا جوعارى وقۋ ورنىنان كەيىنگى دايىندىقتى جۇرگىزەدى.

Abai.kz