تۇركىستان وبلىسىنداعى «بۋدەنوۆسكوە» ۋران كەنىشى رەسەيلىك كورپوراتسياعا ءوتتى. بۇل تۋرالى اقپارات «قازاتومپروم» كومپانياسىنىڭ جىلدىق ەسەبىندە جازىلعان.

2022 جىلدىڭ سوڭىندا ستەپنوگورسك تاۋ-حيميا كومبيناتىنىڭ قۇرىلتايشىلار قاتارىنا رەسەيلىك «روساتومنىڭ» ەنشىلەس كومپانيالارى:  «ۋرنايۋم ۋان گرۋپ» پەن «لوگيستيچەسكي تسەنتر ياتتس» كاسىپورىندارى قوسىلعان. رەسەيلىك باق «قازاقتان مەن رەسەي يادرولىق سالادا جەتىستىككە جەتىپ جاتىر» دەپ داۋرىعا جازىپ جاتىر.

«ۋرانيۋم ۋان گرۋپ» 2022 جىلدىڭ 14 جەلتوقسانىندا ستەپنوگورسك تاۋ-حيميا كومبيناتىنىڭ يەسى اتاندى. اتالعان كومپانيا 2016 جىلدىڭ 6 قازانىنان باستاپ «بۋدەنوۆسكوە» كەنىشىندەگى №5,6,7- ۋچاسكەلەرگە «قازاتومپروممەن» بىرلەسە يەلىك ەتكەن. 2009 جىلى «روساتوم» باسقا دا ءتورت كەنىشتى ساتىپ العان ەدى. ەندەشە رەسەيلىك اتوم ءمونوپوليسى «بۋدەنوۆسكوە» كاسىپورنىن تولىق باقىلاۋىنا الدى دەۋگە نەگىز بار»، - دەپ جازادى ازاتتىق.

رەسەيلىك «روساتوم» 2013 جىلى قازاقستاندا جۇمىس ىستەگەن «ۋرانيۋم ۋان» كانادالىق كومپانياسىنىڭ اكتسياسىن تولىق ساتىپ الدى. وسىدان كەيىن «قازاقستاندىق ۋراندى رەسەي مەنشىگىنە الا باستادى» دەيدى ساراپشىلار.

قازاقستاندا ۋران ءوندىرۋ بويىنشا الەمدە كوش باستاپ تۇر. ەلىمىزدە ۋران قورىنىڭ 12 پايىزى شوعىرلانعان. ۋران قازاقستاننىڭ 6 وڭىرىندە وندىرىلەدى.

«قازاقستان ۇكىمەتى ەلدەگى ۋران وندىرەتىن 13 جوبانىڭ تەك ۇشەۋىنە عانا يەلىك ەتەدى، قالعاندارىن شەتەلدىك اكتسيونەرلەرمەن بىرگە جۇزەگە اسىرادى. كاسىپورىنداردىڭ كوبىندە رەسەيلىك «روساتوم» اكتسيالارىنىڭ ۇلەسى باسىم. بيىل قاڭتاردا قازاقستان رەسەيگە تاسىمالدايتىن ۋران كولەمىن كۇرت ارتتىردى»، دەلىنگەن دۇنيەجۇزىلىك اتوم قاۋىمداستىعىنىڭ دەرەگىندە.

Abai.kz