وزبەكستان 30 ساۋىردە رەفەرەندۋم وتكىزگەنىن بۇعان دەيىن جازدىق. كونستيتۋتسيانى وزگەرتۋگە سايلاۋعا قاتىسقان ەل ازاماتتارىنىڭ 90,21 پايىزى قولداپ داۋىس بەرگەن. جاڭا كونستيتۋتسيا پرەزيدەنتتىڭ وكىلەتتىگىن بەس جىلدان جەتى جىلعا دەيىن ۇزارتۋ، ءولىم جازاسىنا تىيىم سالۋ، ەل ازاماتىن شەت مەملەكەتكە ەكستراديتسيالاۋعا تىيىم سالۋدى قاراستىرعان.

وسىناۋ ساياسي وقيعا بىلتىر قازاقستاندا وتكەن رەفەرەندۋمنان كوشىرىپ العانداي اسەردە قالدىرادى. پرەزيدەنتتەردىڭ باسشىلىقتا وتىرۋ مەرزىمىندە عانا ەمەس، رەفەرەندۋمنان سوڭ ىلە-شالا پرەزيدەنت سايلاۋىن وتكىزۋگە اسىعۋى دا وسىنى ايعاقتايدى. ءبىر ايىرماشىلىعى، بىزدە قابىلدانعان نورما بويىنشا پرەزيدەنت ءبىر رەت قانا باسشىلىق ەتۋگە مۇمكىندىك السا، ال وزبەك اعايىن ءبىر پرەزيدەنت ەكى رەت وتىرسا دا حاقىلى دەيدى.

كەشە ميرزيەەۆ سايلاۋ جۇيەسىن وزگەرتۋ تۋرالى جارلىققا قول قويدى. جارلىقتا وزبەكستان بۇدان بىلاي سايلاۋدى پروپورتسيانالدى جۇيەمەن ەمەس، ارالاس جۇيەمەن، ياعني، پروپورتسيانالدى-ماجوريتارلى جۇيەمەن وتكىزەدى دەپ جازىلعان. دەمەك، وزبەك ازاماتىنا سايلاۋعا ءتۇسۋ ءۇشىن پارتيا ۇسىنۋى مىندەت ەمەس.

وزبەكستاندا مەرزىمىنەن بۇرىن بولاتىن پرەزيدەنت سايلاۋى 9 شىلدەدە وتەدى. ناۋقان مامىردىڭ 10-ى كۇنى باستالىپ كەتتى. كانديتتار 17 مامىردان باستاپ 1 ماۋسىمعا دەيىن ۇسىنىلادى.

وزبەكستان ەكولوگيا پارتياسى اتقارۋ كەڭەسى مامىردىڭ 11-ءى كۇنى كەزەكتەن تىس پلەنۋم وتكىزىپ، پرەزيدەنتتىككە كانديدات ۇسىنۋ ماسەلەسىن تالقىلادى. ناتيجەسىندە، اتالمىش پارتيا باسشىسى ابدىشۇكىر حامزاەۆ سايلاۋعا تۇسەتىن بولدى. 2021 جىلى پرەزيدەنت سايلاۋىنا قاتىسىپ، سايلاۋشىلاردىڭ 4,1 پايىز داۋىسىنا يە بولعان ەكوپارتيانىڭ قازىرگى باسشىسى ميرزيەەۆتەن 16 جاس كىشى.

ال ميرزيەەۆتىڭ ءوزىن ءبىر ەمەس، ەكى پارتيا ۇسىنىپ وتىر. 2016 جىلدان بەرى وزبەكستانعا باسشىلىق ەتىپ كەلە جاتقان ونىڭ كانديداتۋراسىن مامىردىڭ 12-ءسى كۇنى اۋەلى «وزبەكستاننىڭ ليبەرال-دەموكراتيالىق پارتياسى» ۇسىنسا، بۇگىن مۇنى «ۇلتتىق قايتا جاڭعىرۋ» پارتياسى قولدايتىنىن ءمالىم ەتتى. بيلىكتىڭ بار تارماعىنا ءوز ادامدارىن ورنالاستىرىپ ۇلگەرگەن ول وسى سايلاۋدا جەڭىسكە جەتسە، 2040 جىل، ياعني 83 جاسقا دەيىن جىلى ورنىن سۋىتپايتىنداي قۇقىققا يە بولادى.

Abai.kz