پارتيالاردىڭ سايلاۋالدى ساپارلارى بىرتىندەپ مارەسىنە جاقىنداپ كەلەدى.

داۋىس بەرۋگە ساناۋلى كۇن قالعاندا شتابتار تۇرعىندارمەن، ەڭبەك ۇجىمدارىمەن جانە كاسىبي قاۋىمداستىقتارمەن تىكەلەي كەزدەسۋگە باسىمدىق بەرە وتىرىپ، وڭىرلەرگە ساپارلارىن اياقتاپ جاتىر. باعدارلامالارىن تانىستىرۋمەن قاتار، كانديداتتار تۇرعىنداردىڭ وتىنىشتەرى مەن ۇسىنىستارىن تالقىلادى. وسىلايشا، ناۋقاننىڭ وڭىرلىك كەزەڭى قورىتىندىلاندى.

«ادىلەت» پارتياسىنىڭ رەسپۋبليكالىق سايلاۋالدى شتابى قوستاناي وبلىسىنىڭ ەڭبەك ۇجىمدارىمەن بىرقاتار كەزدەسۋ وتكىزدى. اتاپ ايتقاندا، قوستانايداعى KIA Qazaqstan جانە «ميلح» كاسىپورىندارىندا، سونداي-اق رۋدنىيداعى سوكولوۆ-سارىباي كەن-بايىتۋ وندىرىستىك بىرلەستىگى مەن «كازوگنەۋپور 2015» كاسىپورنىندا بولدى. كەزدەسۋلەردە وتاندىق ءوندىرىستى دامىتۋ، كادر دايارلاۋ، ەڭبەك قاۋىپسىزدىگى جانە جۇمىسشىلارعا بەرىلەتىن الەۋمەتتىك كەپىلدىكتەر تالقىلاندى. ءوڭىر جۇرتشىلىعىمەن كەزدەسۋگە ءبىلىم بەرۋ، دەنساۋلىق ساقتاۋ، مادەنيەت، اۋىل شارۋاشىلىعى جانە ۇكىمەتتىك ەمەس ۇيىمدار سالاسىنىڭ وكىلدەرى قاتىستى. تالقىلاۋ بارىسىندا ورتالىقسىزداندىرۋ، رەسۋرستاردى ءبولۋ، كوممۋنالدىق ينفراقۇرىلىمدى جاڭعىرتۋ، سونداي-اق اۋىل مەكتەپتەرىنىڭ جاعدايى قاراستىرىلدى. شاعىن جيناقتى مەكتەپتەر مەن اۋىلدىق جەرلەردەگى تىرەك ءبىلىم بەرۋ مەكەمەلەرىنىڭ جەلىسىن دامىتۋ مۇمكىندىگىنە ەرەكشە نازار اۋدارىلدى. سونىمەن قاتار كەڭ جولاقتى ينتەرنەتكە قولجەتىمدىلىكتى كەڭەيتۋ جانە حالىقتىڭ تسيفرلىق داعدىلارىن دامىتۋ ماسەلەلەرىن قامتيتىن تسيفرلاندىرۋ تاقىرىبى تالقىلاندى. قوستاناي وبلىسى شتابتىڭ ساپار كەستەسىندەگى قورىتىندى وڭىرلەردىڭ ءبىرى بولدى. بۇعان دەيىن كانديداتتار ەلىمىزدىڭ 18 وڭىرىنە بارعان.

جالپىۇلتتىق سوتسيال-دەموكراتيالىق پارتيا قوستانايدا ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلاردى الەۋمەتتىك قولداۋ جانە ينكليۋزيۆتى ورتانى دامىتۋ ماسەلەلەرىنە ارنالعان كەزدەسۋ وتكىزدى. سەمەيدە كانديدات رۇستەم سارمانوۆ قارتتار مەن مۇگەدەكتىگى بار ادامدارعا ارنالعان مەديتسينالىق-الەۋمەتتىك مەكەمەنىڭ قىزمەتكەرلەرىمەن جانە قىزمەت الۋشىلارىمەن كەزدەستى. وندا تۇرۋ جاعدايلارى، قىزمەتكەرلەردىڭ جالاقىسى جانە الەۋمەتتىك سالا ماماندارىنىڭ ەڭبەك قۇقىقتارى تالقىلاندى.

«بايتاق» پارتياسى تارازدا ەكولوگتەردىڭ، ۇكىمەتتىك ەمەس ۇيىمدار مەن جۋرناليستەردىڭ قاتىسۋىمەن «قازاقستاننىڭ جاسىل بولاشاعى» اتتى دوڭگەلەك ۇستەل وتكىزدى. كەزدەسۋ بارىسىندا قاتتى تۇرمىستىق قالدىقتاردى باسقارۋ، ەلدى مەكەندەردى كوگالداندىرۋ جانە ەكولوگيالىق باستامالاردى دامىتۋ ماسەلەلەرى تالقىلاندى. اقتوبە وبلىسىنىڭ حرومتاۋ اۋدانىندا پارتيا بەلسەندىلەرى تۇرعىندارمەن ەكولوگيا ماسەلەلەرى بويىنشا كەزدەستى. ال ماڭعىستاۋ وبلىسىنىڭ تۇپقاراعان اۋدانىنداعى جەرگىلىكتى مۋزەيدە وتكەن كەزدەسۋدە پارتيانىڭ قورشاعان ورتانى قورعاۋ سالاسىنداعى باعدارلامالىق باعىتتارى تانىستىرىلدى.

قازاقستان حالىق پارتياسى ءارتۇرلى وڭىرلەردە بىرقاتار كەزدەسۋ وتكىزدى. جۇماعالي يسمايلوۆ الماتى كوپسالالى كلينيكالىق اۋرۋحاناسىنىڭ جانساقتاۋ بولىمىنە بارىپ، مەديتسينا قىزمەتكەرلەرىمەن اڭگىمەلەستى. كەنجەگۇل سەيتجان جۇمىس توبىنىڭ قۇرامىندا سايلاۋ ۋچاسكەلەرىنىڭ مۇگەدەكتىگى بار ادامدار ءۇشىن قولجەتىمدىلىگىن، اتاپ ايتقاندا، تاكتيلدى سىزبالار مەن برايل قارپىمەن جازىلعان ماتەريالداردىڭ جاعدايىن تەكسەردى. پارتيا توراعاسى نۇرسۇلتان شوقانوۆ الماتىدا شىعارماشىلىق زيالى قاۋىم وكىلدەرىمەن كەزدەستى. وندا مادەني مۇرانى ساقتاۋ، مۋزەي قورلارىن تسيفرلاندىرۋ جانە قازاقستاندىق نىسانداردى يۋنەسكو تىزىمىنە ەنگىزۋ ءۇشىن ىلگەرىلەتۋ ماسەلەلەرى ءسوز بولدى. سونداي-اق ءاليحان بوكەيحان اۋدانىنداعى قيىن ومىرلىك جاعدايعا تاپ بولعان ادامداردى قايتا الەۋمەتتەندىرۋ ورتالىعى مەن ماڭعىستاۋ وبلىستىق «بالبوبەك» قۋىرشاق تەاترىنىڭ ەڭبەك ۇجىمدارىمەن كەزدەسۋلەر ءوتتى.

«اۋىل» پارتياسىنىڭ كانديداتتارى مەن Auyl Jastary جاستار قاناتىنىڭ ەرىكتىلەرى ورالدا الداعى داۋىس بەرۋگە وراي 200-گە جۋىق ادامنىڭ قاتىسۋىمەن «ءبىزدىڭ تاڭداۋىمىز» اتتى فلەشموب وتكىزدى.

«اق جول» پارتياسىنىڭ سايلاۋالدى شتابى استانادا «استانا-تەپلوترانزيت» كاسىپورنىنىڭ 140-تان استام قىزمەتكەرىمەن كەزدەستى. كەزدەسۋ بارىسىندا مىندەتتى الەۋمەتتىك مەديتسينالىق ساقتاندىرۋ، ەڭ تومەنگى جالاقى مەن زەينەتاقىنى ەسەپتەۋ، سونداي-اق يپوتەكالىق نەسيە بەرۋ كەزىندە كوپبالالى وتباسىلاردى قولداۋ شارالارى تالقىلاندى. باتىس قازاقستان وبلىسىندا پارتيا وكىلدەرى «Ringo Milk» ءسۇت جانە مال شارۋاشىلىعى كەشەنىنىڭ ەڭبەك ۇجىمىمەن جانە ورالداعى №24 «كۇنشۋاق» بوبەكجاي-باقشاسىنىڭ ۇجىمىمەن كەزدەستى. وندا ءوندىرىس، اۋىل شارۋاشىلىعى جانە ءبىلىم بەرۋ سالاسى قىزمەتكەرلەرىن الەۋمەتتىك قورعاۋ ماسەلەلەرى تالقىلاندى. پارتيا قوستاناي، اتىراۋ جانە اباي وبلىستارىندا دا كەزدەسۋلەر جالعاسىپ جاتقانىن حابارلادى.

Respublica پارتياسى سولتۇستىك قازاقستان وبلىسىندا بىرقاتار كەزدەسۋ وتكىزدى. پەتروپاۆلدا كانديداتتار NQDC كومپانياسىنىڭ «فانتازيا» ساۋدا ءۇيىنىڭ قۇرىلىس الاڭىنا بارىپ، ءوڭىردى دامىتۋ جانە جۇمىس ورىندارىن اشۋ ماسەلەلەرىن تالقىلادى. سونداي-اق ولار پەتروپاۆلداعى Alageum Electric ەلەكتروتەحنيكالىق زاۋىتىندا بولدى. مۇندا تۇراقسىز باعا، كادر تاپشىلىعى جانە ەنەرگەتيكا سالاسى ونىمدەرىن وتكىزۋ ماسەلەلەرى ءسوز بولدى. پەتروپاۆلدا وتكەن پارتيا جاقتاستارىنىڭ فورۋمىندا زاڭنامالىق جۇمىستىڭ ناتيجەلەرى مەن وڭىرلىك ماسەلەلەر تالقىلاندى. كوتەرىلگەن تاقىرىپتاردىڭ قاتارىندا مەكتەپتەگى تاماقتانۋ مەن ستۋدەنتتىك ينفراقۇرىلىمدى دامىتۋ ماسەلەلەرى بار.

وسىلايشا، 18 تامىزدا پارتيالاردىڭ سايلاۋالدى بەلسەندىلىگى نەگىزىنەن تۇرعىندارمەن، ەڭبەك ۇجىمدارىمەن جانە كاسىبي قاۋىمداستىق وكىلدەرىمەن تىكەلەي قارىم-قاتىناس فورماتىندا ءوتتى. بۇل رەتتە كۇن ءتارتىبى سان الۋان بولدى: پارتيالار ونەركاسىپتى دامىتۋ جانە جۇمىسپەن قامتۋ، الەۋمەتتىك قورعاۋ جانە ينكليۋزيا، ەكولوگيا، ءبىلىم بەرۋ، مادەنيەت، كاسىپكەرلىك پەن ينفراقۇرىلىم ماسەلەلەرىن تالقىلادى. باعدارلامالاردى تانىستىرۋمەن قاتار، كەزدەسۋگە قاتىسۋشىلار ەلەكتر جەلىلەرىنىڭ جاعدايى مەن ەڭبەك ەتۋ شارتتارىنان باستاپ، سايلاۋ ينفراقۇرىلىمىنىڭ قولجەتىمدىلىگى مەن وتباسىلاردى قولداۋعا دەيىنگى وڭىرلىك جانە الەۋمەتتىك ماسەلەلەردى كوتەردى. داۋىس بەرۋگە ساناۋلى كۇن قالعاندا پارتيالاردىڭ ناۋقانى وڭىرلىك الاڭداردا جانە سايلاۋشىلارمەن ءوزارا ءىس-قيمىلدىڭ جاريا فورماتتارى ارقىلى قاتار جالعاسىپ جاتىر.

Abai.kz