قازاقستانداعى مەرەكەلىك كۇندەردىڭ تىزبەسى جاڭا مەرەكەلەرمەن تولىقتى. ۇكىمەت باسشىسى ءتيىستى قاۋلىعا قول قويدى. بۇل تۋرالى اقپارات جانە قوعامدىق دامۋ ءمينيسترى دارحان قىدىرالى الەۋمەتتىك جەلىدەگى پاراقشاسىندا ءبولىستى.

«حالىقارالىق بەكىتىلگەن كۇندەرگە سايكەس «انالار كۇنى» مەرەكەسى مامىر ايىنىڭ ەكىنشى جەكسەنبىسىندە، «اكەلەر كۇنى» مەرەكەسى ماۋسىمنىڭ ءۇشىنشى جەكسەنبىسىندە اۋقىمدى تۇردە اتاپ وتىلەدى.

حالقىمىزدىڭ «وتان وتباسىنان باستالادى» دەگەن ناقىل ءسوزىنىڭ ءمانى تەرەڭدە جاتسا كەرەك. مەملەكەت باسشىسى قاسىم-جومارت توقاەۆ: «بەرەكەلى ءارى باقىتتى وتباسى قۋاتتى ەلدىڭ تىرەگى»، – دەگەنى بەلگىلى.

وتباسىن نىعايتاتىن فاكتورلاردىڭ ءبىرى – اۋلەت مۇشەلەرىنىڭ بىرگە ۋاقىت وتكىزۋى، ورتاق قۋانىشتى بىرگە اتاپ ءوتۋى ەكەنى انىق. مينيسترلىككە قاراستى قازاقستاندىق قوعامدىق دامۋ ينستيتۋتىنىڭ «قازاقستاندىق وتباسىلار» ۇلتتىق بايانداماسىندا كورسەتىلگەندەي، ەلىمىزدەگى وتباسىلىق داستۇرلەردىڭ دىڭگەگى – اۋلەت مۇشەلەرىنىڭ تۋعان كۇنىن اتاپ ءوتۋ ەكەن. بۇل ساۋالناماعا قاتىسقان 86%-دان استام رەسپوندەنتتىڭ وي-پىكىرى. سونداي-اق وتباسىلاردىڭ جارتىسىنان كوبى جاڭا جىل، 8 ناۋرىز، 22 ناۋرىز جانە تاعى باسقا مەملەكەتتىك مەرەكەلەردى اتاعان.

سول سەبەپتى بەكىتىلگەن ءازىز اكەلەر مەن ارداقتى انالارعا ارنالعان بۇل اتاۋلى مەرەكەلەر ۇلتتىق بولمىسىمىزعا ساي جاڭا مازمۇندا تويلانىپ، جالپىحالىقتىق سيپات الادى دەگەن ويدامىز.

اتالعان مەرەكەلەر وتباسى ينستيتۋتىن نىعايتۋعا، انالارىمىز بەن اكەلەرىمىزدىڭ مارتەبەسىن كوتەرۋگە، وتباسىلىق قۇندىلىقتاردى دامىتۋعا، اۋلەتتەگى جاقىندىقتىڭ، قۇرمەت-ىقىلاستىڭ بەرىك ورناۋىنا جانە وتباسىنداعى بەرەكە-بىرلىكتىڭ ارتۋىنا ىقپال ەتەدى دەپ سەنەمىز.

اكەلەر كۇنى دەمەكشى، وسىدان 40 جىل بۇرىن ارداقتى اكەمىز ماڭگىلىك ساپارعا اتتانعان ەدى. ومىردەن ەرتە وزعان اكەمىزدىڭ جارقىن بەينەسى، ول تۋرالى جىلى ەستەلىكتەر ءالى كۇن جادىمىزدا. سوندىقتان اكەگە، اناعا قۇرمەت، كوز تىرىسىندە قادىرىنە جەتۋ ءاردايىم كوڭىل تورىندە تۇرۋعا ءتيىس دەپ بىلەمىز.

بۇگىنگى بالالار قۇقىعىن قورعاۋ كۇنىندە پايدا بولعان ءمانى زور مەرەكەلەر قۇتتى بولسىن! اكەلەرىمىز بەن انالارىمىز امان بولسىن!»،-دەدى مينيستر.

Abai.kz