قازاقستاننىڭ قورعانىس ءمينيسترى رۋسلان جاقسىلىقوۆ قازاقستاننىڭ قارۋلى كۇشتەرى ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ اۋماعىنا بارمايتىنىن ايتتى. 

بۇگىن ماجىلىستە تىلشىلەر مينيسترگە الەۋمەتتىك جەلىلەردە تاراپ جاتقان قاۋەسەتكە قاتىستى سۇراق قويعان بولاتىن.

«قازاقستان ساربازدارىن ۇقشۇ اياسىندا ۋكراينا مەن رەسەي شەكاراسىنا جىبەرىلۋى مۇمكىن دەگەن اقپارات تاراپ جاتىر. بۇل قانشالىقتى شىندىققا جاناسادى؟»، - دەپ سۇرادى جۋرناليستەر.

«قورعانىس ءمينيسترى رەتىندە قازاقستان رەسپۋبليكاسىنىڭ قارۋلى كۇشتەرى ەلىمىزدىڭ اۋماعىندا تۇرعانىنان تولىق سەنىممەن جاريالايمىن. ءبىز بىتىمگەرشىلىك ميسسيالارىن تەك بىرىككەن ۇلتتار ۇيىمى باعىتىندا عانا ىسكە اسىرامىز. ۇجىمدىق قاۋىپسىزدىك تۋرالى شارت ۇيىمى ەلدەرى اۋماعىنا اسكەر جىبەرمەيمىز جانە مۇنداي جوسپار جوق. ءبىز ەشقايدا بارمايمىز»، - دەدى رۋسلان جاقسىلىقوۆ.

Abai.kz