بۇگىن ءماجىلىستىڭ جالپى وتىرىسىندا دەپۋتاتتار «ونلاين پلاتفورمالار جانە ونلاين-جارناما تۋرالى» زاڭ جوباسىن ءبىرىنشى وقىلىمدا ماقۇلدادى. جيىندا ءماجىلىس دەپۋتاتى رينات زايتوۆ وسى زاڭ جوباسىنىڭ ماڭىزدىلىعى مەن تيىمدىلىگى جايىندا ءسوز سويلەدى. 

«نەگىزى بىزدە حالىققا زيان زاڭ شىقپايدى. بىراق ورىندالۋىنا بايلانىستى ىشكى ىستەر مينيسترلىگىنە ءوتىنىشىم بار. وسى زاڭ شىققان كەيىن «ءاۋ» دەپ اۋزىن اشقان قازاقتىڭ اۋىلىمدا جاعدايىم جوق دەپ ايتقاندارعا قارسى قولدانىلىپ كەتپەسە ەكەن دەيمىن،» – دەدى دەپۋتات.

رينات زايتوۆتىڭ ايتۋىنشا، جالپى قازىرگى تاڭدا ونلاين-پلاتفورمالاردا بىرنەشە جالعان اقپارات بەرۋدەن بولەك، جالعان جارناما تاراتۋ، جالعان دارىستەۋ كۋرستارىن اشىپ حالىقتى تىكەلەي زاڭ بۇزۋشىلىققا تاربيەلەۋ (ازاماتتاردىڭ ۇيلەرىنەن شىقپاي تەندەرلەردەن پايدا تابۋى سياقتى), كوپتەگەن تانىمال ادامداردىڭ اتتارىنان اكاۋنت اشىپ، ونلاين لوتەرەيالار وتكىزۋ جانە سولاردىڭ اتىنان جالعان اقپارات تاراتۋ سياقتى زاڭسىز ءىس-ارەكەتتەر كەڭىنەن بەلەڭ الىپ بارادى.

«ول از دەسەڭىزدەر ەلىمىزدە تەرىس ءدىني اعىمعا كىرۋدىڭ بارلىعى وسى ونلاين پلاتفورمالار ارقىلى جۇرەدى. ءبىزدىڭ ەشقانداي مەملەكەتتىك ارنامىز تەرىس ءدىني اعىمعا تاربيەلەمەيدى»، – دەدى.

دەپۋتات اتاپ وتكەندەي، اتالمىش زاڭ جوبالارى وسىندايلاردىڭ ءبارىن اۋىزدىقتاپ،  جۇگەندەۋدىڭ بىردەن-ءبىر جولى. سوندىقتان، بۇل زاڭ جوبالارىن قازىرگى ۋاقىت تالابىنا ساي دەپ تانىپ، ءبىرىنشى وقىلىمدا قولداۋعا شاقىردى.

Abai.kz