ءماجىلىستىڭ اگرارلىق ماسەلەلەر كوميتەتىنىڭ توراعاسى سەرىك ەگىزباەۆتىڭ جەتەكشىلىگىمەن نۇرا توپتىق سۋ قۇبىرىن جوندەۋ ماسەلەسىنە ارنالعان جيىن ءوتتى. وعان قۇزىرلى مەملەكەتتىك ورگانداردىڭ وكىلدەرى قاتىستى.

ءماجىلىس توراعاسى ەرلان قوشانوۆتىڭ 1 ماۋسىمداعى اقمولا وبلىسىنا جۇمىس ساپارى بارىسىندا ديقاندار وسى ماسەلەنى كوتەرگەن ەدى. سۋسىز وتىرعان ءوڭىر حالقى پالاتا سپيكەرىنە شاعىمدارىن جەتكىزدى. وسىعان بايلانىستى ەرلان قوشانوۆ ماجىلىستەگى اگرارلىق ماسەلەلەر كوميتەتىنە جاعدايدى جەكە باقىلاۋعا الۋدى تاپسىرعان بولاتىن.

نۇرا ماگيسترالدىق سۋ قۇبىرى 1979 جىلى پايدالانۋعا بەرىلگەن. ول اقمولا وبلىسىنىڭ ەگىندىكول، اتباسار، قورعالجىن، استراحان جانە تسەلينوگراد اۋداندارىن قامتيدى. قۇبىردىڭ پايدالانىلاتىن بولىگى – 336 شاقىرىم. بۇگىندە ونىڭ ەگىندىكول، اتباسار، قورعالجىن اۋداندارىنا سۋ جەتكىزەتىن 34 شاقىرىمى تەز ارادا جوندەۋدى قاجەت ەتىپ وتىر.

– ەكولوگيا مينيسترلىگى، قارجى مينيسترلىگى، «قازسۋشار» مەكەمەسى مەن اكىمشىلىك وكىلدەرىمەن بىرگە ماسەلەنى شەشۋ جولدارىن ىزدەدىك. ەكولوگيا مينيسترلىگىنىڭ بايانداماسىن تىڭداساق، جىلدىڭ سوڭىنا دەيىن تەك قۇجاتتاردى راسىمدەۋدى اياقتايدى ەكەن. كۇننىڭ ىستىعىندا باسقانى ايتپاعاندا، اۋرۋحانالار دا سۋسىز قالىپ وتىر. سوندىقتان ديقاندار دابىل قاعىپ، جانايقايلارىن جەتكىزدى، – دەدى كوميتەت توراعاسى س.ەگىزباەۆ.

قۇبىر جۇمىسىنىڭ توقتاۋىنا بايلانىستى وڭىردە وتىزعا جۋىق ەلدى مەكەن سۋسىز قالعان. وبلىستىق ءماسليحات دەپۋتاتى ابىلقايىر وشاقباەۆ ماسەلەنىڭ بىرنەشە جىلدان بەرى شەشىمىن تاپپاي كەلە جاتقانىن ايتىپ، بۇگىندە ەگىندىكول، اتباسار، قورعالجىن اۋداندارىنىڭ حالقى كولدىڭ سۋىن پايدالانىپ وتىرعانىن باسا ايتتى.

– ەكولوگيا مينيسترلىگى اكىمشىلىك زاڭ جۇزىندە توتەنشە جاعداي جاريالاسا، جۇمىستى جەدەلدەتۋگە مۇمكىندىك تۋاتىنىن ايتىپ وتىر. توتەنشە جاعداي جاريالاندى. ەندى سوعان قاراي مينيسترلىك 20 ماۋسىمعا دەيىن سۋ قۇبىرىنىڭ بارلىق قۇجاتىن اياقتاپ، يندۋستريا جانە ينفراقۇرىلىمدىق دامۋ مينيسترلىگىنە ساراپتاماعا بەرەدى. نورماتيۆ بويىنشا 45 جۇمىس كۇنى ىشىندە ساراپتاۋ كەرەك. بىراق ءبىز كەم دەگەندە ءبىر جۇمانىڭ ىشىندە اياقتاۋدى تالاپ ەتىپ جاتىرمىز. ودان سوڭ قارجى مينيسترلىگى قارجى بولەدى. ءبارىمىز بىرىگىپ، وسى ماسەلەنى جوق دەگەندە ءبىر اي ىشىندە شەشىپ، تامىز ايىندا ناقتى قۇرىلىس جۇمىستارىن باستاپ كەتۋگە بار كۇشىمىزدى سالامىز، – دەدى سەرىك ەگىزباەۆ.

ءوز كەزەگىندە ەكولوگيا جانە تابيعي رەسۋرستار ءبىرىنشى ۆيتسە-ءمينيسترى نۇركەن شاربيەۆ ماگيسترالدىڭ سۋ شىعىنىن ازايتۋعا كومەكتەسەتىن 320 شاقىرىمىن جوندەۋگە ارنالعان جوبالىق-سمەتالىق قۇجاتتامالاردىڭ جاساقتالىپ جاتقانانىن ايتىپ، دەپۋتاتتاردان كاسىپورىننىڭ قارجىلىق-ەكونوميكالىق جاعدايىن جاقسارتۋ ءۇشىن 600 ملن. تەڭگە كولەمىندە قاراجات ءبولۋ مۇمكىندىگىن قاراستىرۋدى سۇرادى.

كوميتەت توراعاسىنىڭ پىكىرىنشە، قۇرىلىس جۇمىستارى شامامەن جىل سوڭىنا دەيىن جالعاسادى. ماسەلە شەشىمىن تاپقانشا وڭىردەگى توتەنشە جاعداي رەجيمى ساقتالادى.

ەلىمىزدە سۋ ماسەلەسىن شەشۋگە مەملەكەت باسشسىسى ەرەكشە ءمان بەرىپ وتىر. سوندىقتان بۇل جاعداي دەپۋتاتتاردىڭ تۇراقتى باقىلاۋىندا بولادى.

Abai.kz