الەۋمەتتىك جەلىلەردە بەرليندەگى مۇستافا شوقايدىڭ بەيىتى بۇزىلادى دەگەن اقپارات تارادى، دەپ حابارلايدى Halyq Uni. 

الەۋمەتتىك جەلىدە بەرليندەگى تۇرىكتەردىڭ شايىتتەر زيراتىندا جاتقان مۇستافا شوقايدىڭ بەيىتى تۇسىرىلگەن ۆيدەو جاريالاندى.

«قازاق ەلى، قازاق باۋىرلار. مۇستافا شوقاي اتامىزدىڭ جاتقان جەرى. بەرلين قالاسى. مەشىتتىڭ قاسىندا. بۇنى قازاقستانعا الىپ كەتىڭىزدەر دەپ جاتىر.  مۇنىڭ ءبارى بۇزىلادى، ءبارى كەتەدى ەكەن. توپىراعىمەن بىرگە الىپ كەتۋگە بولادى ەكەن. رۇقسات دەيدى»، – دەلىنگەن بەينەجازبادا.

الايدا ۆيدەونى ءتۇسىرىپ، تاراتقان ادامنىڭ كىم ەكەنى بەلگىسىز.  وسى ماسەلەنى انىقتاۋ ءۇشىن قازاقستاننىڭ مادەنيەت جانە سپورت مينيسترلىگىنە حابالاستىق. مادەنيەت كوميتەتىنىڭ مالىمەتىنشە، بۇل بەيىت ەلىمىزدىڭ تاريحي-مادەني مۇراسى بولىپ سانالمايتىندىقتان، ۆەدومستۆونىڭ بۇل ماسەلەدەن حابارى بولماي شىقتى.

تۇركيادا تۇراتىن تاريحشى عالىم، شوقايتانۋشى، ميمار سينان كوركەمونەر ۋنيۆەرسيتەتiنiڭ پروفەسسورى ابدۋاقاپ قارا اتالعان اقپاراتتى جوققا شىعاردى.

بىرەۋلەر بەرليندە تۇرىكتەردىڭ شايىتتەر زيراتىندا جاتقان مۇستافا شوقايدىڭ بەيىتىن الىپ كەتىندەر دەپ ايتتى دەپ بايبالام سالىپ ۆيدەو تاراتىپ ءجۇر. بۇل نەگىزسىز حابار. ويتكەنى بۇنى تاراتۋشىلار بۇل مالىمەتتى قاي رەسمي مەكەمەدەن العانىن ايتپايدى. ۆيدەودا بەيىتتى كورسەتىپ بايبالام سالىپ تۇرعان ادام ءوزىن تانىستىرمايدى، كىم ەكەنىن ايتپايدى. بەينەسىن دە كورسەتپەيدى. جاسىرىنادى.  ەگەر بۇل اقپارات راس بولسا، ولار نەگە الدىمەن بەرليندەگى قازاقستان ەلشىلىگىنە دە، قازاقستاننىڭ باسقا مەكەمەلەرىنە دە ايتپايدى. بۇل بىزگە مۇنىڭ جالعان ەكەنىن كورسەتەدى. ونىڭ شوقاي، ءتىپتى قازاق جاناشىرى ەمەس ەكەنىن دە كورسەتەدى، – دەپ جازدى ابدۋاقاپ قارا.

شوقايتانۋشى قازاقستاندىقتاردى جالعان اقپاراتقا سەنبەۋگە شاقىردى.

ەگەر مۇنداي وقيعا راس بولسا، جولدان كەتىپ بارا جاتقان بىرەۋگە ەمەس،  سول بەيىتكە قارايتىن رەسمي تۇرىك مەكەمەسى ياعني بەرليندەگى تۇركيا ەلشىلىگى قازاقستان ەلشىلىگىنە حابارلايدى. مۇنداي نەگىزسىز بايبالام حابارلارعا ءمان بەرمەڭىزدەر. الەۋمەتتىك جەلىدە كوبىرەك ءلۇپىل الام دەپ وتان ءۇشىن، تاۋەلسىزدىك ءۇشىن جانىن بەرگەن ۇلى تاريحي تۇلعالاردىڭ ارۋاعىن ويىنشىققا اينالدىرماڭىزدار. اللانىڭ دا حالىقتىڭ دا لاعىنەتىنە ۇشىرايسىڭدار، – دەپ قوستى ابدۋاقاپ قارا.

بۇعان دەيىن، قازاق جەرىنەن شىققان ۇلتىمىزدىڭ بىرقاتار ءبىرتۋار تۇلعالارى شەت مەملەكەتتەردە جەرلەنگەنىن جازعان ەدىك. الايدا ولاردىڭ كەسەنەلەرى مەن بەيىتتەرى ەلىمىزدىڭ مۇلىكتىك مۇراسى بولىپ سانالمايدى.

«اتالعان نىسانداردىڭ بارلىعى شەت ەلدەردىڭ اۋماعىندا بولۋىنا وراي سول ەلدەرگە تيەسىلى مەملەكەتتىك جەرلەردە، ۇيىمدارىنا، ۆەدومستۆولارىنا تيەسىلى جەرلەردە ورنالاسقان. وسى ورايدا، ولاردى كۇتىپ ۇستاۋ، ساقتاۋ، پايدالانۋ، اكىمشىلىك ەتۋ جۇمىستارى سول ەلدەردىڭ ۇلتتىق زاڭناماسىنا سايكەس جۇرگىزىلەدى جانە ولار قازاقستاننىڭ مۇلىكتىك كەشەندەرى ەمەس»، – دەدى مينيسترلىك.

Abai.kz