9 ماۋسىم كۇنى بوزاشى مۇناي تۇبەگىندەگى «وڭتۇستىك قاراتۇرىن» مۇناي-گاز كەن ورنىندا تۇتانعان ءورت ءالى لاۋلاپ جاتىر.

«ءورت بولعان ورىنعا ورتكە قارسى قىزمەت پەن كومەكشى تەحنيكانىڭ جيىنتىق جاساعىنان قۇرالعان 33 تەحنيكا جانە جەكە قۇرامنىڭ 89 ادامى، سونداي-اق ارنايى تەحنيكا جىبەرىلدى. قاجەتتى كۇشتەر مەن قۇرالداردىڭ بارلىعى كەزەكشىلىك رەجيمىندە»، - دەپ حابارلادى ماڭعىستاۋ وبلىسى توتەنشە جاعدايلار دەپارتامەنتىنىڭ ءباسپاسوز قىزمەتىنەن.

ماڭعىستاۋ وبلىسىنىڭ اكىمى نۇرلان نوعاەۆ كەن ورنىنداعى ءورتتىڭ شىعۋ سەبەبى، قاراپايىم قاۋىپسىزدىك شارالارىنىڭ ساقتالماۋىنان ەكەنىن ايتتى.

ماماندار ۇڭعىما كراتەرىن اۋىر بۇرعىلاۋ ەرىتىندىسىمەن تولتىرۋدى نەمەسە گاز قىسىمىن تومەندەتۋ ءۇشىن ىرگەدەن قوسىمشا ۇڭعىما قازۋدى ۇسىنعان، نەمەسە گاز قىسىمىنىڭ تومەندەۋىنەن وت وزدىگىنەن ءسونۋى دە ىقتيمال دەگەن پىكىر ايتادى.

ەستەرىڭىزگە سالا كەتەيىك، ءورت «وڭتۇستىك قاراتۇرىن» مۇناي-گاز كەن ورنىندا 9 ماۋسىم تۇنگى ساعات 03.25-تە ۇڭعىمانى بۇرعىلاۋ جۇمىستارى كەزىندە، №303 ۇڭعىماداعى بۇرعىلاۋ قۇرالى كوتەرىلىپ كەتىپ، جەر استىنان گاز-سۋ قوسپاسى اتقىلاۋى سەبەبىنەن پايدا بولعان. بىر ادام زارداپ شەكتى.

13 ماۋسىم ساعات 08:30-داعى جاعداي بويىنشا كراتەرگە 302 تەكشە مەتر ەرىتىندى توگىلگەن.

سۋرەت: ماڭعىستاۋ وبلىسى اكىمدىگىنىڭ ءباسپاسوز قىزمەتى

Abai.kz