ەرتەڭ شىعىس قازاقستان وبلىسىنىڭ باسشىسى دانيال احمەتوۆتىڭ اكىم دەيتىن داۋدەي قىزمەتى اياقتالادى. 15 شىلدەدە 69 جاسقا تولاتىن «ەڭ ەگدە جاستاعى» اكىمنىڭ ورنىنا كىم كەلۋى مۇمكىن؟ «چەمودان گوسسەكرەتوۆ» Telegram-ارناسى بولجامدى كانديداتتاردىڭ ءتىزىمىن ۇسىنىپتى. ولار:

بۇرىنعى سىرتقى ىستەر ءمينيسترى مۇحتار تىلەۋبەردى,

پرەزيدەنتتىڭ كومەكشىسى اسەت يسەكەشەۆ,

شىعىس قازاقستان وبلىسى اكىمىنىڭ ءبىرىنشى ورىنباسارى الماسحان سماتلاەۆ,

قازاقستاننىڭ رەسەيدەگى ەلشىسى ەرمەك كوشەرباەۆ.

اسەت يسەكەشەۆ 2022 جىلدىڭ اقپان ايىندا پرەزيدەنتتىڭ كومەكشىسى بولدى. 2008 جىلى ءدال وسىنداي لاۋازىمدى اتقاردى. 2012 جىلى يندۋستريا جانە جاڭا تەحنولوگيالار ءمينيسترى بولدى. 2016 جىلدان 2018 جىلعا دەيىن استانا اكىمى بولدى.

مۇحتار تىلەۋبەردى 2023 جىلدىڭ ساۋىرىندە عانا سىرتقى ىستەر ءمينيسترى قىزمەتىنەن كەتتى. سودان بەرى ساياسي قىزمەتتە ەمەس.

الماسحان سماتلاەۆ 2014 جىلدان باستاپ شىعىس قازاقستان وبلىسىندا جۇمىس ىستەيدى. 2014 جىلدان 2016 جىلعا دەيىن اكىمنىڭ كومەكشىسى، 2016 جىلدان 2018 جىلعا دەيىن ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى، 2018 جىلدان 2020 جىلعا دەيىن اكىمنىڭ ورىنباسارى، 2020 جىلدان قازىرگى ۋاقىتقا دەيىن اكىمنىڭ ءبىرىنشى ورىنباسارى قىزمەتىن اتقارىپ كەلەدى.

ال ەرمەك كوشەرباەۆ اۋىلشارۋاشىلىق مينيسترلىگىنىڭ ۆيتسە-ءمينيسترى، قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قىزمەتتەرىن اتقارعان. 2020 جىلدىڭ 29-قاڭتارىنان باستاپ قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى بولىپ تاعايىندالدى.

شىعىس قازاقستان وبلىسىنىڭ اكىمى دانيال احمەتوۆ ءوڭىردى 2014 جىلدان باستاپ باسقارىپ كەلەدى. ول بۇل لاۋازىمعا ءۇش رەت – 2017, 2019 جانە 2022 جىلدارى قايتا-قايتا تاعايىندالعان. بىلتىر پرەزيدەنت توقاەۆ ونىڭ وكىلەتتىگىن ۇزارتقان بولاتىن.

كەيىنگى ۋاقىتتا شىعىس قازاقستان وبلىسىندا بولىپ جاتقان اپاتتى جاعدايلار احمەتوۆتىڭ ورنىنان كەتۋىنە ىقپال ەتۋى ابدەن مۇمكىن. وعان حالىقتىڭ نارازىلىعى ارتا تۇسكەنىن الەۋمەتتىك جەلىلەردەن بايقاۋعا بولادى.

Abai.kz