ەلوردا ماڭىنداعى ءورتتى ءسوندىرۋ جالعاسۋدا، بۇگىن تاڭەرتەڭ وقيعا ورنىنا 51 توننا سۋ شاشىلدى، دەپ حابارلايدى قالالىق توتەنشە جاعدايلار دەپارتامەنتى.

«ەلوردالىق ءورت سوندىرۋشىلەر قورعالجىن تاسجولى مەن قوسشى قالاسىنا اينالما جول اراسىنداعى قۋراعان ءشوپ جانە قامىس ورتىمەن ەكىنشى تاۋلىك كۇرەسىپ جاتىر. قازىرگى ۋاقىتتا ماماندار قۋراعان ءشوپ ورتتەرىنىڭ جەكەلەگەن وشاقتارىن سوندىرۋدە. ءورتتىڭ جالپى اۋدانى 80 گەكتارعا جەتتى»، - دەپ جازىلعان قالالىق تج دەپارتامەنتىنىڭ اقپاراتىندا.

بۇگىن تاڭەرتەڭ «قازاۆياقۇتقارۋ» اق ءورت ورنىنا 17 رەت سۋ شاشتى – بۇل 51 توننا سۋ. ءورت ءسوندىرۋ باستالعاننان بەرى قورعانىس مينيسترلىگى مەن «قازاۆياقۇتقارۋ» اق تىكۇشاقتارى 59 رەت – شامامەن 198 توننا سۋ شاشقان.

«وقيعا ورنىندا استانا قالاسى، اقمولا جانە قاراعاندى وبلىستارى تجد جەكە قۇرامىنىڭ 185 ادامى مەن 37 تەحنيكاسى، قالا اكىمدىگىنىڭ 6 سۋارۋ ماشيناسى جۇمىلدىرىلدى. قالا اكىمدىگى، سونداي-اق استانا قالاسىنىڭ ەرىكتىلەر كلۋبىنىڭ باستاماسىمەن ەلوردالىق ءورت سوندىرۋشىلەر ىستىق تاماقپەن جانە سۋسىنمەن قامتىلدى»، - دەپ حابارلادى دەپارتامەنت.

سونىمەن بىرگە، استانا قالاسىنىڭ توتەنشە جاعدايلار دەپارتامەنتى تۇرعىنداردان ءورت قاۋىپسىزدىگى ەرەجەلەرىن ساقتاۋدى، بالالاردىڭ وتپەن ويىنىن توقتاتۋدى، تەمەكى تۇقىلىن تاستاماۋدى سۇرايدى. ءورت انىقتالعان جاعدايدا 101 نومىرىنە دەرەۋ حابارلاۋ قاجەت.

فوتو:«NewTimes.kz»

Abai.kz