رەسەيدىڭ باس پروكۋراتۋراسى «WWF Russia - دۇنيەجۇزىلىك تابيعات قورىن» شەتەلدىك اگەنت (ينواگەنت) دەپ جاريالاپ، قوردىڭ رەسەي اۋماعىندا جۇمىس ىستەۋىنە تىيىم سالدى، - دەپ جازادى Mezgil.kz. 

«ۇلىبريتانيا ازاماتى ن. يسدەلدىڭ باسشىلىعىمەن جۇزەگە اساتىن تابيعاتتى قورعاۋ جانە ەكولوگيالىق اعارتۋ ءىسى WWF-تىڭ اتىن جامىلىپ، ەكونوميكالىق سالاعا قاۋىپ توندىرەتىن جوبالارمەن اينالىسۋدا»، - دەلىنگەن باس پروكۋراتۋرانىڭ حابارلاماسىندا.

ۆەدومستۆونىڭ حابارلاماسىنا قاراعاندا، WWF «شەتەلدىك اگەنتتەر تىزىمىندە تۇرعان رەسەيلىك كوممەرتسيالىق ەمەس ۇيىمدارعا ماتەريالدىق جانە ادىستەمەلىك قولداۋ كورسەتكەن، ال ولار زاڭسىز ميتينگتەرگە قاتىسىپ، قۇقىق بۇزۋشىلىقتار جاساعانى ءۇشىن اكىمشىلىك جاۋاپكەرشىلىككە تارتىلعان. بۇل ەلدىڭ ىشكى ىسىنە ارالاسۋ»، دەپتى رەسەيلىك زاڭ ورگانى.

قازاقستان ۇكىمەتى 2017 جىلى جولبارىستى رەينترودۋكتسيالاۋ تۋرالى WWF-پەن كەلىسىمگە كەلىپ، مەموراندۋمعا قول قويعان.

كەيىن قور ەلىمىزگە 10 ميلليون ەۋرو ءبولدى. ول قاراجاتتىڭ ءبارىن جوبانىڭ نەگىزگى  ۇيىمداستىرۋشىلارى رەتىندە رەسەيلىكتەر العان.

2018 جىلى جولبارىستاردى وسىرۋگە ارنالعان ىلە-بالقاش رەزەرۆاتى قۇرىلدى. سودان بەرى بۇل جوبا رەسەيدىڭ ماماندارىنىڭ قولىندا، ياعني WWF Russia جۇزەگە اسىرۋدا.

ەندى سۇراق. قازاقستاننىڭ جولبارىستى رەينترودۋكتسيالاۋ جوباسى نە بولماق؟ رەسەي اقىرى قورعا تىيىم سالعان ەكەن، ەندەشە رەسەي 10 ميلليون ەۋرونى قازاقستانعا قايتارىپ بەرە مە، الدە، تىكەلەي شۆەيتسارياعا اۋدارا ما؟

Abai.kz