ۋكراينا رەسەيمەن اراداعى قاقتىعىستى ديپلوماتيالىق جولمەن رەتتەۋدى جالعاستىرۋعا نيەتتى. بۇل تۋرالى زەلەنسكي ءوفيسى باسشىسىنىڭ ورىنباسارى سەرگەي كيسليتسا مالىمدەدى.

كيەۆ اقش-تىڭ قاتىسۋىمەن وتەتىن ۇشجاقتى كەلىسسوزدەردە ءوز ۋاجدەرىن بايانداۋعا دايىن. ۋكراينا كوشباسشىسىنىڭ ءوفيسى اتاپ وتكەندەي، ۋكراينانىڭ بەيبىتشىلىكتى قالامايتىنى تۋرالى پىكىردى تەرىسكە شىعارۋ ءۇشىن ديپلوماتيا جۇمىس ىستەۋى ءتيىس.

«ديپلوماتيا كەز كەلگەن جاعدايدا جۇمىس ىستەۋى كەرەك، ويتكەنى ءبىزدىڭ وپپونەنتتەرىمىز بەن جاۋلارىمىز الەمنىڭ ءارتۇرلى استانالارىندا ءدال وسى ۋكرايندار سوعىستى اياقتاعىسى كەلمەيدى جانە ەسكالاتسياعا ۇمتىلادى دەگەن پىكىردى قالىپتاستىرۋعا تىرىسۋدا»، — دەدى كيسليتسا «ۋكرينفورمعا» بەرگەن سۇحباتىندا.

ول سونداي-اق اقش پرەزيدەنتىنىڭ ارنايى وكىلى ستيۆ ۋيتكوفف پەن دجارەد كۋشنەردىڭ كيەۆكە ساپارى ءالى دە وزەكتى ەكەنىن قوسا ايتتى.

وتكەن تۇندە رەسەي ۋكرايناعا اۋقىمدى سوققى بەردى. كيەۆتە تۇرعىن ۇيلەر قيراپ، بالالار اۋرۋحاناسى مەن مەكتەپ زاقىمدالدى. ەلدىڭ باسقا وڭىرلەرى دە سوققىعا ۇشىرادى. وسى كۇنى ۋكراينالىق ۇشقىشسىز ۇشۋ اپپاراتتارى رەسەي اۋماعىنداعى نىساندارعا شابۋىل جاسادى.

Abai.kz