ءماجىلىس توراعاسى ەرلان قوشانوۆ مەملەكەت باسشىسىنىڭ تاپسىرماسىمەن ماعجان جۇماباەۆتىڭ تۋعانىنا 130 جىل تولۋىنا ارنالعان سالتاناتتى ءىس-شاراعا قاتىستى.

مەرەيتويعا ارنالعان جيىن اقىننىڭ تۋعان جەرى سولتۇستىك قازاقستان وبلىسى م.جۇماباەۆ اۋدانىنىڭ سارىتومار اۋىلىندا ءوتتى. ءماجىلىس سپيكەرى پرەزيدەنت قاسىم-جومارت توقاەۆ ماعجان جۇماباەۆتىڭ 130 جىلدىعىن جوعارى دەڭگەيدە اتاپ ءوتۋدى تاپسىرعانىنا توقتالدى.

ەرلان قوشانوۆ اقىننىڭ جەرلەستەرىن مەرەيتويمەن قۇتتىقتاپ، مەملەكەت باسشىسىنىڭ قۇتتىقتاۋ حاتىن وقىپ بەردى.

– ماعجان جۇماباەۆ – قازاقتىڭ عانا ەمەس، تۇتاس تۇركى جۇرتىنىڭ ماقتانىشى. اقىننىڭ وتانعا دەگەن شەكسىز سۇيىسپەنشىلىككە تولى جىرلارى حالقىمىزدىڭ جۇرەگىنە جول تاۋىپ، رۋحانياتىمىزدىڭ التىن قورىنا ەندى. مەن تۇركىستاندا وتكەن ۇلتتىق قۇرىلتايدا جاستاردىڭ بويىنا ىزگى قاسيەتتەردى ءسىڭىرۋ قاجەتتىگىنە ەرەكشە توقتالدىم. بۇل ۇلتىمىزدىڭ جاڭا ساپاسىن قالىپتاستىرۋ ءۇشىن وتە ماڭىزدى. وسى ورايدا ماعجاندى تانۋ، ماعجاندى تانىتۋ – تاربيەلىك ءارى تاعىلىمدىق ءمانى بار ماسەلە. سول سەبەپتى ونىڭ شىعارماشىلىعىن تەرەڭ زەردەلەپ، جان-جاقتى دارىپتەۋ كەرەك. ارتىندا ولمەيتۇعىن ءسوز قالدىرعان اقىننىڭ مول ادەبي مۇراسى تالاي بۋىنعا ونەگە بولارى ءسوزسىز. ونىڭ ومىرشەڭ ولەڭدەرى حالىقپەن بىرگە جاساي بەرەدى، – دەلىنگەن پرەزيدەنت قۇتتىقتاۋىندا.

ءماجىلىس توراعاسى قىزىلجار ءوڭىرى ۇلتىمىزدىڭ تاعدىرى مەن تاريحىنا وشپەس ءىز قالدىرعان ۇلى پەرزەنتتەردى دۇنيەگە اكەلگەن كيەلى مەكەن ەكەنىن ەرەكشە اتاپ ءوتتى.

– سارىتومارلىقتار سوناۋ زاماننىڭ قيىن كەزىندە، ماعجاننىڭ اتىن اتاۋعا تيىم سالىنعان ۋاقىتتا دا اتاقتى جەرلەستەرىنىڭ اتىن وشىرمەي، جان-جۇرەگىمەن قاستەرلەپ كەلدى. ەستەرىڭىزدە بولسا، وسىدان وتىز جىل بۇرىن ماعجان جۇماباەۆتىڭ 100 جىلدىق مەرەيتويى رەسپۋبليكا كولەمىندە تۇڭعىش رەت اتالىپ وتكەن بولاتىن. سودان بەرى وتىز جىل وتسە دە، حالقىمىزدىڭ ماعجان تۇلعاسىنا، ماعجان مۇراسىنا دەگەن ىقىلاسى مەن ماحابباتى وزگەرگەن ەمەس. قايتا جىل وتكەن سايىن ەسەلەپ ارتىپ كەلەدى، – دەدى ەرلان قوشانوۆ.

ەلىمىزدە بولىپ جاتقان وڭ وزگەرىستەر ۇلتىمىزدىڭ ۇلى تۇلعالارىنىڭ، سونىڭ ىشىندە ماعجان جۇماباەۆتىڭ يدەيالارىمەن ۇندەسىپ جاتقانىن تىلگە تيەك ەتتى.

– ماعجان دەگەندە – حالقىمىزدىڭ حح عاسىرداعى الماعايىپ، اۋىر تاعدىرى كوز الدىمىزعا كەلەدى. اقىننىڭ «كۇنشىعىستان كۇن كەلەدى – مەن كەلەم» دەگەن ءبىر جول ولەڭى بۇگىنگى تاۋەلسىز قازاقستاننىڭ ارمانى مەن مۇراتىنىڭ ۇرانىنداي. بۇگىنگى ۇرپاق وسى كۇنگە، وسى ارمانعا، وسى مۇراتقا ۇمتىلۋى قاجەت، – دەدى ءماجىلىس توراعاسى.

مەرەكە اياسىندا وبلىستا حالىقارالىق اقىندار ايتىسىنىڭ فينالى، ات سپورتى مەن قازاقشا كۇرەستەن جارىس ءوتتى.

Abai.kz