رەسەي پرەزيدەنتىنىڭ الەم حالىقتارىنىڭ اراسىندا ابىرويى جوق. مۇنى حالىقارالىق Pew Research زەرتتەۋ ورتالىعى ساۋالناماسىنىڭ قورىتىندىسىندا ايتادى.

Pew Research الەۋمەتتانۋ كومپانياسى ءارتۇرلى كونتينەنتتەگى 24 ەلدىڭ تۇرعىندارىنا ساۋالناما جۇرگىزىپ، ولاردىڭ كوپشىلىگىنىڭ ۆلاديمير پۋتينگە تەرىس كوزقاراستا ەكەنىن انىقتاعان. ولاردىڭ قاتارىنا، برازيليا، وڭتۇستىك افريكا جانە ارگەنتينا سەكىلدى ەلدەر كىرگەن.

24 مەملەكەت بويىنشا پۋتينگە سەنبەيتىندەر ورتاشا ەسەپپەن 82% قۇرادى. وسى ەلدەردىڭ ىشىندە تەك ەكەۋى عانا ءۇندىستان (59%) جانە يندونەزيا (43%) حالقى پۋتينگە كوبىرەك سەنىم ارتادى ەكەن.

دەگەنمەن پۋتينگە تەرىس كوزقاراستى ۇندىلەر سانى سوعىس باستالعان سوڭ وسە تۇسكەن. مىسالى، 2019 جىلى رەسەي باسشىسىن جاقتىرمايتىندار ۇلەسى 13% بولسا، قازىر 30% -عا جەتكەن.

ءپۋتيندى قولدامايتىندار سانىنان ەۋروپا ەلدەرى الدا. پولشادا - 98%، فرانتسيادا، گەرمانيادا، يسپانيادا، شۆەتسيادا- 82% - دان 96% - عا دەيىنگى ارالىقتا. گرەكيا ەلى بۇل كورسەتكىشتەن تومەن -66%.

برازيليادا ساۋالناماعا قاتىسقانداردىڭ 77% -ى، وڭتۇستىك افريكادا 50%-ى پۋتينگە سەنبەيدى.

ساۋالناماعا قاتىسقان الەم حالىقتارىنىڭ ۋكراينا پرەزيدەنتى ۆلاديمير زەلەنسكيگە دەگەن كوزقاراسى جاقسى. ورتا ەسەپپەن 51%-ى ۋكراين كوشباسشىسىنا سەنەدى، ال پۋتينگە تەك 11% سەنىم بىلدىرگەن.

ەۋروپا ەلدەرىنىڭ ىشىندە ۆەنگريانىڭ زەلەنسكيگە دەگەن كوزقاراسى ناشار، ويتكەنى ەلدىڭ ۆيكتور وربان باستاعان باسشىلىعى ۋكراينامەن بۇرىننان قاقتىعىسىپ كەلەدى. ۆەنگرلەردىڭ 11%-ى عانا زەلەنسكيگە سەنىم بىلدىرگەن.

Abai.kz