قازاقستان قورعانىس مينيسترلىگى "قازاقستان رەسەيگە اسكەري تەحنيكا تاسىمالداپ جاتىر" دەگەن اقپاراتتى جوققا شىعاردى. بۇعان دەيىن الەۋمەتتىك جەلىدە قازاقستاننىڭ باتىس وڭىرىندە "اسكەري تەحنيكا تيەلگەن جۇك كولىكتەرىنىڭ رەسەيگە اكەتىلىپ جاتقانى" جونىندە اقپارات تاراعان. 

"قازاقستاندىق اسكەري تەحنيكانى رەسەيگە جونەلتىپ جاتىر دەگەن مالىمەت شىندىققا جاناسپايدى. اتالعان اسكەري تەحنيكانىڭ قازاقستانعا قاتىسى جوق، بۇل حالىقارالىق ۋاعدالاستىقتار شەڭبەرىندە قازاقستان اۋماعى ارقىلى رەسەيگە جوسپارلى جوندەۋ جۇرگىزۋ ءۇشىن جىبەرىلىپ جاتقان ءۇشىنشى ەلدىڭ مەنشىگى" دەپ جازىلعان مينيسترلىك حابارلاماسىندا.

ۆەدومستۆو حابارلاماسىندا ءۇشىنشى ەلدىڭ اتىن اتامايدى. مينيسترلىك 2022 جىلدىڭ 27 تامىزىنان باستاپ قازاقستاندا قارۋ-جاراق پەن اسكەري تەحنيكانى ەكسپورتتاۋعا تىيىم سالىنعانىن ايتىپ وتەدى.

ءبىر كۇن بۇرىن "باسە" تەلەگرام-ارناسىندا اسكەري تەحنيكا تيەلگەن جۇك كولىكتەرى تۋرالى بىرنەشە سۋرەت جاريالانعان. "شەكارالاس اقساي قالاسى، بقو. بەلسەندىلەردىڭ ايتۋىنشا، اسكەري تەحنيكا رەسەيگە كەتىپ بارادى. توقاەۆ پۋتينگە كومەكتەسىپ جاتىر" دەپ جازىلعان جازبادا. مينيسترلىكتىڭ حابارلاماسى ءدال وسى جازبامەن بايلانىستى ما، جوق پا، ول دە بەلگىسىز.

الەۋمەتتىك جەلىلەردە بۇعان دەيىن دە تەمىر جول جانە جۇك كولىكتەرى ارقىلى تاسىمالدانىپ جاتقان اسكەري تەحنيكانىڭ سۋرەتتەرى مەن ۆيدەولارى جاريالانعان. كەيبىر كەزدە جەلى قولدانۋشىلار "قازاقستان اسكەردى ۋكرايناعا جىبەرگەلى جاتىر" دەپ بولجاعان. ال قورعانىس مينيسترلىگى اقپاراتتاردى جوققا شىعارعان. بىلتىر ناۋرىزدا وسىنداي اقپارات تاراعان كەزدە مينيسترلىك "مەسسەندجەرلەردە تارالعان ۆيدەولاردا اسكەري تەحنيكانىڭ اسكەر دايىندىعى كەزىندەگى ءىس-قيمىلى بەينەلەنگەن" دەپ تۇسىندىرگەن.

فوتو: اشىق دەرەككوزدەن

Abai.kz