قازاق ەلىندەگى وسى اپتاداعى ايتۋلى وقيعا – ءبىر كەزدەردەگى بۇرىنعى پرەزيدەنتتىڭ "كۇلشەلى بالاسى" بولىپ, كەيىن قىلدان تايعان مۇحتار ءابليازوۆتىڭ توڭىرەگىندەگى شۋ. ءبىزدىڭ سايت بۇعان دەيىن وسى جاھانعا تانىمال تۇلعانىڭ ناعاشىسىنىڭ ەلگە قانداي كەيىپتە ورالعاندىعى تۋراسىندا جازعان بولاتىنبىز.

ەكونوميكالىق جۇيەنىڭ اياق استىنان وزەرۋى ەلىمدەگى ۇركەردەي توپقا ەرتەگىدەي بايلىق سىيلادى. بىراق سولاردىڭ كوپشىلىگى اياق استىنان قولىنا تيگەن بايلىقتىڭ قادىرىن بىلە المادى. ءبىز مىنە وسى توپقا  بتا بانكتىڭ بۇرىنعى قوجايىنى مۇحتار ءابليازوۆتى جاتقىزامىز. جالپى مۇقاڭ ەلىمىزدىڭ باق تاپتىرماس كەيىپكەرى رەتىندە ەل قۇلاعىن اندا-ساندا ءبىر شۋلاتىپ قويادى. بۇل جولعى شۋ اقش سوتى مۇحتار ءابليازوۆتىڭ بتا بانكتەن اقشا ۇرلاپ، ونى اقش-قا جىلىستاتقانىن مويىنداعانى بولدى.

ەندى باسى اشىق دۇنيەنى تارامداتا تارقاتىن بولساق. 31 شىلدە كۇنى اقش-تىڭ نيۋ-يوركتىڭ وڭتۇستىك وكرۋگى بويىنشا وكرۋگتىك سوتىنىڭ سۋدياسى دجون گ.كولتل Triadou SPV S.A.-عا قاتىستى سوت ۇكىمىن شىعاردى.

Triadou SPV مۇحتار ءابىليازوۆتىڭ كۇيەۋ بالاسى ءىلياس حراپۋنوۆ قۇرعان جانە باقىلايتىن كومپانيا ەكەندىگى وسى سوت بارىسىندا راستالىپ، سوتتالۋشى تۇلعانىڭ بتا-دان ۇرلانعان 70 ميلليون دوللاردان استام اقشانى نيۋ-يوركتەگى جىلجىمايتىن مۇلىككە جانە اقش-تىڭ باسقا جەرلەرىندە ينۆەستيتسيالاعانى دالەلدەندى.

نيۋ-يوركتىڭ وڭتۇستىك وكرۋگى بويىنشا وكرۋگتىك سوتىنىڭ سۋدياسى دجون گ.كولتل شىعارعان سوت شەشىمى القابيلەردىڭ 2022 جىلعى جەلتوقسانداعى ۇكىمىنەن كەيىن شىقتى. ناتيجەسىندە  Triadou SPV كومپانياسى باسشىسى ءىلياس حراپۋنوۆتىڭ قارجى جىمقىرعانى جانە زاڭسىز بايۋى ءۇشىن جاۋاپقا تارتىلىپ وتىرعانى ءسوز ەتىلدى.

سوت قورىتىندىسىندا: "سوتتا ۇسىنىلعان دالەلدەر اقش-تاعى Triadou اتىنان ينۆەستيتسيالانعان قاراجات ءابىليازوۆتىڭ باسقا فرونتتىق كومپانيا ارقىلى بتا-دان ۇرلاعان 115,3 ميلليون دوللارعا تىكەلەي قاتىسى بار ەكەنىن كورسەتەدى" دەپ اتاپ كورسەتىلدى.

الاياقتىققا بارعان ءىلياس حراپۋنوۆ ءوز قاراۋىنداعى كومپانياسىن ءۇشىنشى ءبىر تۇلعا فيليپپ گلاتتسقا ساتقانىمەن ونىڭ كوزبوياۋشىلىق بولعاندىعى جان-جاقتى دالەلدەنىپ، اتالعان قارجىنى ءىلياس حراپۋنوۆ جەكە ءوزى تولەيتىن بولادى دەپ شەشىلدى.

جىعىلعانعا جۇدىرىق دەگەندەي ءوزى بىلىعىپ ءجۇرىپ، كەشەگى جانە بۇگىنگى قازاق بيلىگىن سىناعىش مۇحتار ابليازوۆقا 5 شىلدەدە پوليتسيا ورگاندارىنان 30 كۇن ىشىندە فرانتسيادان كەتىپ، ونى قابىلداۋعا دايىن ەلگە كوشۋى كەرەتىگى جايلى بۇيرىق العاندى تىم اۋىر سوققى بولدى. بۇنى قازاق بارار جەرى، باسار تاۋى قالعان جوق دەيدى.

Abai.kz