جاقسىنىڭ ايتقانى كەلمەيدى،

جاماننىڭ ساندىراعى كەلەدى.

شىنىمدى ايتايىن، ورىس حالقىنا ليبەرالدى قۇندىلىقتاردى اكەلگەن، اسىرەسە، فەدەراتسيا قۇرامىنداعى ۇلتتىق قۇرىلىمدارعا «بەريتە ستولكو سۋۆەرەنيتەتا، سكولكو سموجەتە پروگلوتيت» دەپ، ولارعا شىنىمەن دە دە ءبىرشاما ەركىندىك بەرگەن بوريس ەلتسيننەن كەيىن اۆتوريتارلىق جۇيەنى قايتا قالپىنا كەلتىرگەن، وپپوزيتسيانى ءتۇپ-تامىرىمەن جويعان ۆلاديمير پۋتين بيلىك باسىنا كەلگەندە ءبىراز شوشىعان مەن كەيىن جاس ءارى ءبىلىمدى، ليبەرالدىق كوزقاراستاعى، جۇمساق مىنەزدى دميتري مەدۆەدەۆ تاققا ورنىققاندا «شۇكىر» دەگەنمىن. سول كەزدە ءوز باسىم بۇل ازاماتتى قولداپ ەدىم. ءتىپتى سول سىڭايدا ماقالا دا جازعانمىن. شىنىمەن دە مەدۆەدەۆ باسقارعان تۇستا سولتۇستىك كورشىمىز قايتا تۇلەي باستاعانداي ەدى.

وكىنىشكە وراي، ءۇمىتىمىز عۇمىرى تىم قىسقا بولدى ءارى ول اقتالا قويمادى: ساياساتتانۋدا «تاندەم» دەگەن ۇعىم پايدا بولىپ، پرەزيدەنت مەدۆەدەۆ پرەمەر-مينيستر ءپۋتيننىڭ ايتقانىنان شىعا الماي قالدى. ودان كەيىنگىسى بەلگىلى: كەشەگى مەملەكەت باسشىسى بۇگىندە رەسەي قاۋىپسىزدىك كەڭەسىنىڭ ءرولى مەن فۋنكتسياسى تۇسىنىكسىزدەۋ ورىنباسارى عانا.

ءجا، ءوز تاعدىرى مەدۆەدەۆتىڭ وزىنە، لجەدميتريدى، ياعني جالعان ءدميتريدى دە كورگەن تاريح قوي بۇل.

مەنىڭ ايتايىن دەپ تۇرعانىم باسقا جايت: ءبىز كۇنى كەشە ليبەرال ءارى جالپىادامزاتتىق قۇندىلىقتاردىڭ جاقتاۋشىسى ساناپ جۇرگەن دميتري بۇگىندە رەسەي مەملەكەتىنىڭ قىلىشىنان قان تامعان، اينالاسىنا وت پەن وق شاشقان يمپەريالىق وتكەنىن كوكسەيتىن، تۇلا بويى مەن وي-ساناسى باسقىنشىلىق يدەياسىمەن ۋلانعان، ناعىز كسەنوفوب، رەسەيدىڭ ۋكرايناعا قارسى سوعىسىنىڭ اقتاۋشىسى جانە ۇجىمدىق باتىسقا قارسى ساياساتىنىڭ جارشىسىنا اينالدى!

ءوز باسىم انونيم، ياعني بۇركەنشىك ات جامىلعان اككاۋنتتارعا، سونىڭ ىشىندە Telegram ارنالارعا سەنبەيمىن. بىراق بەلگىلى تۇلعالاردىڭ رەسمي ارنالارىن وقىپ تۇرامىن.

مىنە، كۇنى كەشە كرەمل ساياساتىنىڭ ساندۋعاشى مەدۆەدەۆ ءوز Telegram-ىندا بىلايشا كوسىلىپتى (اڭگىمە ۋكرايناداعى سوعىستى توقتاتۋ جولدارىن تالقىلاۋعا ارنالعان دجيددادا وتكەن حالىقارالىق جيىن حاقىندا، رەسەي تاراپ رەتىندە وندا شاقىرىلماعان-دى، بالكىم، مەدۆەدەۆ سوعان رەنجىپ وتىرعان بولار):

«سترانى ۋكراينى نيكوگدا نە بىلو دو 1991 گ. ونا وسكولوك روسسيسكوي يمپەري». ياعني، ۋكراينا سەكىلدى مەملەكەت 1991 جىلعا دەيىن بولماعان-مىس، ول رەسەي يمپەرياسىنىڭ ءبىر سىنىعى عانا ەكەن.

بۇعان نە دەيسىز، ۋكراينا سىقىلدى رەسەي يمپەرياسى مەن ودان كەيىن 1917 جىلدان 1991-جىلعا دەيىن سوۆەت وداعىنىڭ قۇرامىندا بولعان قازاق سوۆەتتىك سوتسياليستىك رەسپۋبليكاسىنىڭ ازاماتى؟! ىمدى تۇسىنبەگەن، دىمدى تۇسىنبەي مە؟!

مەدۆەدەۆ: «ۋكراينا ناحوديتسيا ۆ ستادي پولۋراسپادا، ا چاست ەيو تەرريتوري ۆەرنۋلاس ۆ روسسيۋ». ياعني، ءبىرتۇتاس، ۋنيتارلى مەملەكەتتى كرەملدىك پروپاگاندا، «زەلەنىە چەلوۆەچكي» جانە باسقىنشىلىق سوعىس ارقاسىندا ءوز قولىمەن بولشەكتەۋگە تىرىسىپ جاتقان اگرەسسوردىڭ ءسوزىنىڭ سيقى وسىنداي.

ايتىڭىزشى، ءوز ىشكى سەپاراتيستەرىنەن ارىلا الماي وتىرعان، سول كرەملدىك پروپاگاندا كۇنى-ءتۇنى ءار قازاقتىڭ ءۇيىنىڭ تورىنەن قۇلاقتى سارسىتىپ، سانانى ساسىتىپ سارناعان، سوعىس بولا قالسا، جاۋعا تويتارىس بەرۋگە ءتيىس اسكەرى جەمقورلىق پەن جونسىزدىككە بەلشەسىنەن باتقان، زاماناۋي قارۋ-جاراعى مەن اسكەري تەحنيكاسى جەتىمسىز، شەكاراسى اشىق-شاشىق، ونىڭ ۇستىنە، باسقارۋشى توپتارى بيلىككە تالاسقان ءارى حالقىنىڭ بيلىككە سەنىمى ازايىپ بارا جاتقان قازاقستان وسىنداي كۇن تۋا قالسا، نە قاۋقار تانىتا الادى؟

مىڭگىرلەگەن مەدۆەدەۆ نەنى مەڭزەيدى؟ الدە، راسىندا دا «جاقسىنىڭ ايتقانى كەلمەيدى، جاماننىڭ ساندىراعى كەلەدى» مە؟

ۋكراينانىڭ قىرىمىن باسىپ العاندا، كەيىن وعان قارسى سوعىس اشقاندا كرەمل ءوز ءۋاجى رەتىندە «دەناتسيفيكاتسيا» «دەميليتاريزاتسيا»، «ورىستىلدىلەردىڭ قۇقىن قورعاۋ» سىقىلدى تەزيستەردى العا تارتقان-دى. قازىر ول سەبەپتەر ۇمتىلعانداي، كوپ ايتىلمايدى. ونىڭ ەسەسىنە، ءپۋتيننىڭ اتاقتى سوزىنەن كەيىن مىنا مەدۆەدەۆ جاڭعىرتىپ وتىرعان وسىنداي، تاريحتى كوپە-كورىنەۋ بۇرمالاۋشىلىققا نەگىزدەلگەن سەبەپتەر ءجيى ايتىلا باستادى.

ولاي بولسا، وسىناۋ شىلعي وتىرىكتى جوققا شىعارىپ، شىندىقتى بارشا جۇرتقا جەتكىزە الاتىن، كرەملدىك پروپاگاندورلارمەن تەرەزەسى مەن تەزيستەرى تەپە-تەڭ تالاسا الاتىن، ولاردى اشكەرەلەپ، جەرمەن-جەكسەن ەتەتىن ءبىزدىڭ يدەولوگتار، تاريحشىلار، ساراپشىلار قايدا؟ نەگە ولار ءۇنسىز؟ دەر كەزىندە، الدىن-الا جاۋاپ قايتارماساق، ۋكرايناعا قاتىستى ۋاجدەر ەرتەڭ بىزگە دە قارايلاي ايتىلماي ما؟

كەلەسى جىلى رەسەيدە پرەزيدەنت سايلاۋ وتەدى. ءوز ەلەكتوراتىنىڭ ىشكى قيىندىقتارعا قاتىستى نارازىلىعىن باسقا جاققا اۋدارۋ ءۇشىن «كىشىگىرىم جەڭىمپاز سوعىس» تاكتيكاسى تاعى دا قولدانىلماي ما؟ ول ارام ويدىڭ ءبىر نىسانى ءبىز بولا قالساق شە؟! ۋكرايناعا قاتىستى دىتتتەگەنىنە جەتە الماي، ابدەن شارشاعان پۋتين بۇگىندە اشۋلى ارىستانداي، امالى تاۋسىلعان ول ءوز بيلىگىن ساقتاپ قالۋ ءۇشىن كەز كەلگەن قادامعا بارا الادى!

مەدۆەدەۆتىڭ تە قارقىنى قاتتى: «ۆپروچەم، ي سامي پەرەگوۆورى پوكا نە نۋجنى. ۆراگ دولجەن پريپولزتي نا كولەنياح، موليا و پوششادە». ياعني، كەلىسسوز سەكىلدى كەز كەلگەن داعدارىس پەن قاقتىعىستى شەشە الاتىن وركەنيەتتى جولدان الدىن-الا ءۇزىلدى-كەسىلدى باس تارتىپ وتىر. قارسىلاس جاق الدىنا جورعالاپ كەلۋىن تالاپ ەتەدى ەكەن.

ءبىر نارسە انىق - قازىرگى زامانداعى سوعىس شەكارادان ءوتىپ، باسقانىڭ جەرىن باسىپ الۋدان باستالمايدى: ونىڭ باستاۋى باسقادا. ماسەلەن، مەدۆەدەۆ سەكىلدى رەسەي قاۋىپسىزدىگى سالاسىنداعى ەكنىشى ادامنىڭ مىناداي مىڭگىرىندە نەمەسە سول ەلدى باسقا رەسمي تۇلعاسىنىڭ زىركىلىندە.

سونداي ارانداتۋلارعا مىڭگىرلەمەي زىركىل تانىتاتىن كەز كەلدى دەپ سانايمىن!

ايتپەسە، بۇعا بەرسەڭ، سۇعا بەرەدى، ەرتەڭگى كۇنى كەش بولادى!

ءامىرجان قوسان

Abai.kz