قوستانايدا كەيىنگى كەزدەرى سەپاراتيستەردىڭ قاتارىن رەسەي باسقىنشىلارىنىڭ «ازاتتىق سوعىسىن» دارىپتەۋشىلەر تولىقتىرىپ جاتىر.

جاقىندا وسىنداعى ورىس ەتنيكاسى باسىم رۋدنىي دەگەن قالادا جەڭىل اۆتوكولىگىنە تالاي جۇرتقا جەككورىنىشتى كورىنەتىن اتاقتى «Z» تاڭباسىن جاپسىرىپ الىپ، تايراڭداپ جۇرگەن «دياديا ۆوۆانىڭ» تىلەكتەسى جاعاسى جايلاۋدا، تايراڭداپ جۇرگەن كورىنەدى. ونى ۇلتجاندى قازاق جىگىتى ۇستاپ الىپ: «بۇل بىزدە سوعىستى ناسيحاتتاۋدىڭ بەلگىسى بولىپ تابىلادى، سوندىقتان الىپ تاستاعانىڭ ءجون» دەسە، الگى مىقتىڭ: «قازاقستاندا بۇعان تىيىم سالاتىن زاڭ جوق»، دەپ بوي بەرمەيتىن كورىنەدى. شاقىرعان پوليتسيا دا دارمەنسىز. مۇنى دا از دەسەڭىز، وبلىستىق پوليتسيا دەپارتامەنتىنىڭ ءباسپاسوز قىزمەتى اتالمىش جۇرگىزۋشى تاراپىنان ەشبىر قۇقىق بۇزۋشىلىقتىڭ ورىن الماعاندىعىن سالتاناتتى تۇردە ءمالىم ەتتى. بۇعان ەندى كۇلەسىڭ بە، الدە، جىلايسىڭ با؟

دەگەنمەن، كەيىنگى كەزدەرى وسىناۋ قيىن ءتۇيىندى شەشۋگە دەگەن ءبىر جاقسى نيەت بايقالادى. جاقىندا ەلىمىزدىڭ باس پروكۋراتۋراسى وسى سوعىستى اشىق ناسيحاتتايتىن سيمۆول ەسەبىندەگى «Z»، «V» بەلگىلەرىن، كەزىندە جۇرتتىڭ بارىنە جەكسۇرىن بولعان «گەورگي لەنتاسى» دەگەندەرگە تيىم سالۋ جونىندە باستاما كوتەردى دەگەن اقپارات شىققان. ارينە، باستاما زاڭ ەمەس، ول قۇقىقتىق نەگىزگە يە بولعانشا ءبىراز ۋاقىت كەرەك. ونىڭ ۇستىنە، بۇل ويىمىزدى جاۋلىق رەتىندە قابىلداعان قىزىلكوز رەسەي تاراپىنان «ءتايت» دەگەن ەمەۋرىن بايقالعان سەكىلدى. ارادا كۇن وتپەي جاتىپ، اتالعان اقپاراتتى تەرىستەگەن رەسمي جاۋاپ جاريا بولدى.

الايدا، رەسەيدىڭ تاۋەلسىز ۋكرايناعا قارسى باستاعان سوعىسىن ءوز اتىمەن اتاپ، ونىڭ بەلگىلەرىن ءوز ەلىمىزگە تارالۋىنا توسقاۋىل قويۋ – بۇل قازاق قوعامىنىڭ تالابى! سوندا عانا وزدەرىن رەسەيدە جۇرگەندەي ەركىن سەزىنىپ، سول سوعىستىڭ سيمۆولىن كولىكتەرىنە قىستىرىپ قويماسا، بويىنا اس باتپايتىن نيەتى بۇزىقتاردىڭ اۋزىنا قۇم قۇيىلىپ، جولى ءبىرجولتاتا كەسىلەر ەدى.

كەرەك دەسەڭىز، رەسەيدىڭ سوعىس سيمۆولدارىنا تىيىم سالماۋدىڭ ارتى ەرتەڭ قازاقستاننىڭ ازاماتتىق قوعامىندا ءتۇرلى الەۋمەتتىك ارازدىقتارعا سەبەپشى بولاتىنى انىق!

جايبەرگەن بولاتوۆ

Abai.kz