اقش كونگرەسسمەنى جەيمس كومەر جۋىردا اقش پرەزيدەنتى بايدەنگە قاتىستى بايانداما جاساپ، قازاقستاننىڭ تەرەڭ قالتالى وليگارحتارى بەرگەن قىرۋار اقشا جايلى ايتتى، دەپ جازادى Mezgil.kz. 

اقش ساياساتشىسىنىڭ سوزىنشە، 2014 جىلى جو بايدەن مەن ونىڭ وتباسى قازاقستان، رەسەي مەن ۋكراينا بيزنەسمەندەرىنەن 20 ملن دولارعا جۋىق اقشا العان. ول كەزدە جو بايدەن اقش-تىڭ ۆيتسە-پرەزيدەنتى بولعان. بۇل تۋرالى «Forbes» جازدى.

«كوميتەت جو بايدەن مەن ونىڭ وتباسىنىڭ بانكتىك شوتىنا بىرقاتار شەت مەملەكەتتەردەن ميلليونداعان دوللارلاردىڭ اۋدارىلعانىن اشكەرەلەدى. قاراجاتتار قىتاي، قازاقستان، رەسەي، ۋكراينا مەن رۋمىنيادان اۋدارىلعان. بۇل سومانىڭ بايدەن وتباسىنا نە ءۇشىن اۋدارىلعانى، قانداي قىزمەت تۇرلەرى ءۇشىن اۋدارىلعانى كوميتەتكە بەيمالىم»، - دەلىنگەن باياندامادا.

كوميتەت بۇل اقپاراتتى بانكتەر بەرگەن تولەم دەرەگىنەن العانىن ايتتى. كوميتەت توراعاسى، كونگرەسسمەن جەيمس كومەر پرەزيدەنت جو بايدەنگە قاتىسى بولۋى مۇمكىن حالىقارالىق قارجى وپەراتسيالار تۋرالى ەسەپ جاريالادى. قۇجاتتا جو بايدەننىڭ ۇلى حانتەر بايدەن نەگىزىن قالاعان فيرمالاردىڭ ۇشەۋى جونىندە ءسوز بولادى. ولار: «Rosemont Seneca Partners»; «Rosemont Seneca Thornton» جانە «Rosemont Seneca Bohai».

ازاتتىقتىڭ جازۋىنشا، كەڭەس راقىشەۆ سينگاپۋرلىق «Novatus Holdings» كومپانياسىنىڭ كومەگىمەن 142 300 دوللار قاراجاتتى «Rosemont Seneca Bohai» ەسەپشوتىنا اۋدارعان. ەرتەسىنە ءدال وسى كولەمدەگى اقشا نيۋ-دجەرسيدەگى اۆتوسالونعا حانتەردىڭ سپورت كولىگى ءۇشىن اۋدارىلعان.

كەڭەس راقىشەۆ قازاقستاننىڭ 2023 جىلعى ەڭ اۋقاتتى 50 ادامىنىڭ رەيتينگىندە 15-ءشى ورىندا تۇرعان ادام. «Forbes»راقىشەۆتىڭ دۇنيە-مۇلكىن 570 ملن دوللار دەپ كورسەتكەن. 2021, 2022 جىلدارى راقىشەۆتىڭ اۋقاتى 1 ملرد دوللانعا جۋىق بولعان.

Abai.kz