وسىعان دەيىن قازاقستان پروكۋراتۋراسى ساياساتكەر عالىمجان جاقيانوۆقا قاتىستى 20 جىل بۇرىنعى ءىستى قايتا قاۋزاپ، تەرگەۋ باستاعانى باق-تا ءمالىم بولعان. ارادا كوپ وتپەي، پاۆلودار وبلىسىنىڭ پروكۋراتۋراسى وبلىستىڭ ەكس-اكىمى عالىمجان جاقيانوۆقا قاتىستى جاڭارعان قىلمىستىق ءىستى جاپقانى ايتىلدى.

«پاۆلودار وبلىسىنىڭ پوليتسيا دەپارتامەنتى پاۆلودار وبلىسى اكىمدىگىنىڭ لاۋازىمدى تۇلعالارىنا جانە باسقا دا تۇلعالارعا قاتىستى الاياقتىق، سەنىپ تاپسىرىلعان بوتەن مۇلىكتى يەمدەنۋ جانە بوپسالاۋ فاكتىلەرى بويىنشا قايتا قوزعالعان قىلمىستىق ءىستى قابىلدادى»، - دەپ حابارلادى وبلىس پروكۋراتۋراسى.

الايدا قىلمىستىق قۇقىق بۇزۋشىلىقتىڭ بولماۋىنا بايلانىستى ءىس تەز جابىلدى.

«ءىس بويىنشا قر قىلمىستىق ءىس جۇرگىزۋ كودەكسىنىڭ 35-بابى 1-بولىگى 2-تارماعى نەگىزىندە، ياعني قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى قىلمىستىق ءىستى توقتاتۋ تۋرالى تۇپكىلىكتى پروتسەسسۋالدىق شەشىم شىعارىلدى»، - دەگەن بولاتىن وبلىستىق پروكۋراتۋرا.

وسى وقيعاعا قاتىستى عالىمجان جاقيانوۆتىڭ ءوزى پىكىر ءبىلدىرىپ: «قازاقستاندا ەشكىم بيلىكتەن باسقاشا ويلاعانى ءۇشىن جانە بەيبىت ساياسي كۇرەسى ءۇشىن قۋدالانباۋى كەرەك»، - دەپتى.

قازاقستاندا ەشكىم بيلىكتەن باسقاشا ويلاعانى ءۇشىن جانە بەيبىت ساياسي كۇرەسى ءۇشىن قۋدالانباۋى كەرەك!

عالىمجان جاقيانوۆ:

- 20 جىل بۇرىن ماعان قاتىستى قوزعالعان قىلمىستىق ىستەردىڭ جاقىندا قايتا اشىلۋىنا بايلانىستى سۇراقتار كوپ بولدى. ماسەلەنىڭ قۇقىقتىق جاعى انىقتالماعانشا پىكىر بىلدىرگىم كەلمەدى.

الدىمەن ايتارىم، بۇل ىستەردىڭ ءبارى مەن قۇسمۇرىن كولونياسىندا وتىرعان كەزىمدە اشىلعان. سونداعى نازارباەۆتىڭ تاپسىرماسىمەن كولونياعا كەلگەن شابارماندار، ۇلتتىق قاۋىپسىزدىك كوميتەتىنىڭ (ۇقك، نەمەسە كنب) باسشىلارى وزدەرىنىڭ ماقساتتارىن جاسىرمادى. ولار مەنى ساياساتتان جانە قازاقستانداعى دەموكراتيا ءۇشىن كۇرەستەن باس تارتۋعا، جازباشا جانە ۆيدەو ارقىلى پرەزيدەنتتەن كەشىرىم سۇراۋعا ماجبۇرلەگىسى كەلدى. تالاپتارىن ورىنداماعان جاعدايدا ۇستىمنەن جاڭا قىلمىستىق ىستەر اشىپ، مەنى تۇرمەگە ماڭگىلىككە قامايمىز دەپ قىسىم جاسادى. ماعان قارسى كوپتەگەن «دالەل ماتەريالدار» بار دەپ قورقىتپاقشى بوپ، اكەلگەن جاشىكتەرىنە قاراي سىلتەگەندەرى ەسىمدە.

مەن بۇل بوپسالاۋلارىنا كونبەي، كنب-مەن «قىزمەتتەسۋدەن» ءۇزىلدى-كەسىلدى باس تارتقاننان سوڭ قىلمىستىق ىستەر قوزعالدى. ۇزىن سانى 10-عا جۋىق، ناقتى قانشا ەكەنىن تەرگەۋشىلەردىڭ وزدەرى دە بىلمەدى. تەگى، ايىپتاۋلاردىڭ زاڭدىلىق ساپاسى وتە تومەن بولعاندىقتان، بۇلار ىستەردىڭ سانىن كوبەيتكەن ءتارىزدى. الايدا، بىرنەشە تەرگەۋ ارەكەتتەرىنەن كەيىن قىلمىستىق قۋدالاۋ ناتيجە بەرمەيتىنىنە جانە دە مەنى ساياسي وكىندىرۋدەن ەشتەڭە شىقپايتىنىنا كنب-نىڭ عانا ەمەس، ەل باسشىلىعىنىڭ دا كوزى جەتتى. امال قالماعان سوڭ، بيلىك مەنى تۇرمەدەن شىعارۋعا ءماجبۇر بولدى. وسىلايشا، 2006 جىلى سوت شەشىمىمەن مەن شارتتى تۇردە مەرزىمىنەن بۇرىن (ۋدو-مەن) بوساتىلدىم.

سودان بەرى قوزعالعان قىلمىستىق ىستەردىڭ ماتەريالدارى ساياسي قۋدالاۋ «كونتوراسىندا» جاتتى. شاماسى، «X ساعاتى» جەتكەندە مەنى نوقتالاۋ ءۇشىن بيلىك سول ىستەردىڭ قاجەتى بولار دەپ ساقتاعان سياقتى. ماعان قارسى قوزعالعان ىستەر ۇمىتىلىپ كەتكەندەي بولدى.

بىراق مەن ۇمىتقان جوقپىن. وسى 20 جىل بويى ءوزىم جانە مەنىڭ ادۆوكاتتارىم ءتيىستى مەملەكەتتىك ورگاندارعا ارىزدار مەن تالاپتاردى جازىپ كەلدىك. ءار جولى ۇقك مەن «قۇقىق قورعاۋ» ورگاندارىنان ءتۇرلى سىلتاۋراتقان ءمانسىز جاۋاپتار كەلىپ تۇردى. ەندى مىنە، «قىلمىس قۇرامى جوق» دەگەن تۇجىرىممەن بارلىق ىستەر رەسمي تۇردە جابىلدى.

بىراق مەن ول ىستەردىڭ جابىلۋىمەن عانا ادىلەت تولىق ورنادى دەپ ەسەپتەمەيمىن. سول زاڭسىز ارەكەتكە قاتىسى بولعان لاۋازىمدى تۇلعالاردى جاۋاپقا تارتۋ جايىندا زاڭگەرلەرمەن كەڭەسىپ وتىرمىن. مەن ونى كەك الۋ ماقساتىمەن جاساپ وتىرعان جوقپىن. شىن مانىسىندە، ماعان جانە باسقا دا ساياسي قۋعىنعا ۇشىراعان ادامدارعا قارسى اشىلعان وسىنداي جالعان ىستەر بيلىكتىڭ ەڭ باسىندا ۇيىمداسقان قىلمىستىق توپ قالىپتاسقانىن كورسەتەدى.

سوندىقتان، ەڭ ماڭىزدىسى، وسىنىڭ بارلىعى وزگەلەرگە ساباق بولۋى ءتيىس. بۇدان بىلاي قىلمىستىق ءىستى ويدان شىعاراتىندار، اسىرەسە، مۇندايدى جاساۋعا بۇيرىق بەرەتىندەر ەرتە مە، كەش پە جاۋاپقا تارتىلاتىنىن ءبىلۋى كەرەك.

قازاقستاندا ەشكىم بيلىكتەن باسقاشا ويلاعانى ءۇشىن جانە بەيبىت ساياسي كۇرەسى ءۇشىن قۋدالانباۋى كەرەك.

Abai.kz