قازىرگى تاڭدا ەلىمىزدە 71 مەكتەپتىڭ عيماراتى اپاتتى دەپ تانىلعان، 136 مەكتەپ ءۇش اۋىسىمدا وقىتۋدى جۋرگىزەدى. بۇل تۋرالى قازاقستان رەسپۋبليكاسى وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتى توراعاسىنىڭ ورىنباسارى جومارت قارامباەۆ ايتتى، دەپ جازادى “ادىرنا” ۇلتتىق پورتالى. 

بۇل ماسەلەلەردى شەشۋ ءۇشىن اعىمداعى جىلى بيۋدجەتتىك قارجىلاندىرۋ ەسەبىنەن 132 مىڭ وقۋشى ورنىنا 154 مەكتەپ پايدالانۋعا بەرۋ جوسپارلانۋدا، ونىڭ ىشىندە جاڭا وقۋ جىلىنا دەيىن 65,6 مىڭ وقۋشى ورنىنا 52 مەكتەپ پايدالانۋعا بەرىلەدى.

وسى مەكتەپتەردى پايدالانۋعا بەرۋ 12 اپاتتى جانە 29 ءۇش اۋىسىمدى مەكتەپتەردىڭ ماسەلەسىن شەشۋگە مۇمكىندىك بەرەدى، - دەدى جومارت قارامباەۆ.

سونىمەن قاتار، قازىرگى ۋاقىتتا «جايلى مەكتەپ» ۇلتتىق جوباسى ىسكە اسىرىلىپ جاتقانىن ايتا كەتتى.

ۇلتتىق جوبا شەڭبەرىندە 2026 جىلعا دەيىن قالالاردا جانە بەلسەندى دامىپ كەلە جاتقان (پەرسپەكتيۆالى) ەلدى مەكەندەردە وقۋشى ورىندارىنىڭ اعىمداعى جانە بولجامدى تاپشىلىعىن جابۋ ءۇشىن 740 000 جاڭا وقۋشى ورىندىق (ەكى اۋىسىمدى وقىتۋ كەزىندە) 369 مەكتەپ پايدالانۋعا بەرىلەتىن بولادى.

ماسەلەن، 2023 جىلى ەكى اۋىسىمدا 461,0 مىڭ وقۋشى ورىنعا                            217 مەكتەپتىڭ قۇرىلىسىن باستاپ 2024 جىلى پايدالانۋعا بەرىلەدى. 2024 جىلى ەكى اۋىسىمدا 279,0 مىڭ وقۋشى ورىنعا 152 مەكتەپتىڭ قۇرىلىسىن باستاپ 2025 جىلى پايدالانۋعا بەرۋ جوسپارلانۋدا،- دەدى وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتى توراعاسىنىڭ ورىنباسارى جومارت قارامباەۆ.

فوتو: عالامتوردان

Abai.kz