Anadolu اگەنتتىگىنىڭ حابارلاۋىنشا، تۇركيا پرەزيدەنتى سوچيگە ءبىر كۇندىك جۇمىس ساپارىمەن بارعان. ول پۋتينمەن ايماقتىق جانە جاھاندىق ماسەلەلەردى، سونداي-اق ەكىجاقتى قارىم-قاتىناستاردى تالقىلايدى.

كوشباسشىلار اراسىنداعى كەلىسسوزدەردىڭ كۇن تارتىبىندە بىلتىر جاھاندىق ازىق-تۇلىك داعدارىسىن ايتارلىقتاي جەڭىلدەتكەن قارا تەڭىز استىق باستاماسىن قالپىنا كەلتىرۋ دە بار. 17 شىلدەدە رەسەي تۇركيا مەن بۇۇ دەلدالدىق جاساعان ۋكراينانىڭ قارا تەڭىزدەگى 3 پورتىنان استىق ەكسپورتىن قالپىنا كەلتىرۋ تۋرالى كەلىسىمگە قاتىسۋىن توقتاتتى، – دەپ جازدى تۇرىك بۇقارالىق اقپارات قۇرالى.

تۇرىك تاراپى 2022 جىلدىڭ شىلدەسىندە جاسالعان استىق كەلىسىمى دەپ اتالاتىن كەلىسىمدى قالپىنا كەلتىرۋگە كۇش سالىپ وتىر. سونىمەن قاتار، انكارا كيەۆ پەن ماسكەۋدى رەسەي-ۋكراينا قاقتىعىسىن توقتاتۋ ءۇشىن بەيبىت كەلىسسوزدەرگە كوشۋگە شاقىرادى.

ەسكە سالا كەتسەك، بۇعان دەيىن، ياعني 2023 جىلدىڭ شىلدەسىندە رەجەپ تايپ ەردوعان ىستامبۇلدا ۋكراينا پرەزيدەنتى ۆلاديمير زەلەنسكيمەن دە استىق كەلىسىمىن تالقىلاعان بولاتىن.