كەشە الماتى قالاسىنداعى اۋدانارالىق اكىمشىلىك سوتىندا «تكم» جشس (راحات بازارى كاسىپكەرلەرى) مەن الماتى قالالىق اكىمدىگىنىڭ اراسىنداعى داۋلى سوت ءىسىنىڭ كەزەكتى وتىرىسى ءوتتى. سوت شەشىم شىعارىپ، داۋلى ءىستىڭ ءبىر پاراسىنا نۇكتە قويدى.

سوت راحات بازارى كاسىپكەرلەرىنىڭ شاعىمىن قاناعاتتاندىرىپ، الماتى قالاسى اكىمىنىڭ جەردى پايدالانۋ قۇقىعىن جەتىسۋ اۋداندىق اكىمدىگىنە بەرۋ تۋرالى شەشىمىنىڭ كۇشىن جويدى. بازار ورنالاسقان جەرگە «تكم» جشس-نىڭ ارتىقشىلىق قۇقىقتارى بار ەكەنىن جانە ونى الماتى اكىمدىگى ەسكەرۋگە مىندەتتى ەكەنىن ناقتىلادى. وسىلايشا، سوتتا راحات بازارىنىڭ كاسىپكەرلەرى جەڭىسكە جەتتى.

ءجاميلا تولەنوۆا:

- الماتى قالاسى اۋدانارالىق اكىمشىلىك سوتىنىڭ كەزەكتى پروتسەسسى ءوتتى. سوت شەشىمىمەن الماتى قالاسى اكىمىنىڭ جەر پايدالانۋ قۇقىعىن جەتىسۋ اۋدانى اكىمدىگىنە، اباتتاندىرۋ ءۇشىن بەرۋ تۋرالى وكىمىنىڭ كۇشى جويىلدى.

ءبىز، «تكم» جشس مەن راحات بازارىنىڭ كاسىپكەرلەرى بەس جىلدان بەرى ءوز قۇقىعىمىزدى تابانداپ قورعاپ كەلەمىز. ول ءبىزدىڭ راحات بازارى ورنالاسقان جەر. بۇگىن سوتتان ءبىز اقىرى دەگەندە ادىلەتتى ۇكىم-ۇيعارىمدى ەستىدىك. سوت الماتى اكىمىنىڭ شەشىمى زاڭسىز ەكەنىن انىقتاپ ايتتى. ءبىز «تكم» جشس سول جەردى زاڭدى تۇردە پايدالانىپ كەلدىك. ەشقانداي زاڭ ەرەجەلەرىن بۇزباي، مەملەكەتكە ادال جۇمىس ىستەپ كەلدىك. ءبىزدىڭ جەر پايدالانۋدا ارتىقشىلىق قۇقىمىزدى الماتى اكەمدىگى رەيدەرلىك جولمەن، ورەسكەل بۇزعان ەدى. راحات بازارىنىڭ كاسىپكەرلەرى سول جەردە 25 جىلدان استام ۋاقىت بويى ءوز كاسىپتەرىن جۇرگىزىپ كەلگەن. تارازىنىڭ ءبىر جاعىنا جەرگىلىكتى اتقارۋشى ورگان باسشىلارىنىڭ جەكە امبيتسياسى مەن ەكىنشى جاعىنا ادال كاسىپكەرلەردىڭ مۇددەسى قويىلعان كەزدە، ءبىز تاۋداي اكىمشىلىك كەدەرگىلەرمەن بەتپە-بەت كەلدىك. راحات بازارى دەگەنىڭىز – مىڭنان استام ادام، مىڭنان استام جۇمىسشى، مىڭنان استام قالا تۇرعىنى. ولاردىڭ ەشقايسىسى مەملەكەتكە الاقان جايماي، وزدەرى مەن اينالاسىنداعىلاردى اسىراپ، كاسىپتەرىن دوڭگەلەتىپ، مەملەكەتكە سالىق تولەپ وتىرعان ادامدار. الماتى قالاسى اكىمدىگى ولاردىڭ جانايقايلارىن، ۇندەرىن ەستىگەن جوق، ەستىگىسى كەلگەن جوق. بۇگىن سوت وسى داۋعا نۇكتە قويدى. ءسويتىپ، ءبىز داۋدىڭ العاشقى باستالعان تۇسىنا قايتا ورالدىق. ەندى زاڭعا سايكەس، جەر پايدالانۋ قۇقىمىزدى تالاپ ەتىپ، الماتى اكىمدىگىنە قايرىلامىز. راحات بازارىنىڭ كاسىپكەرلەرىنە جەر بەرۋدى سۇرايمىز.

جانىبەك باشانوۆ، زاڭگەر:

- مەن «تكم» جشس مەن راحات بازارى ساۋداگەرلەرىنىڭ قورعاۋشىسىمىن. بۇگىنگى سوت شەشىمىنە كوڭىلىم تولىپ تۇر. بۇل سوت ەڭ ماڭىزدى پروتسەسستەردىڭ ءبىرى بولدى. ءبىز الماتى اكىمدىگىمەن 2018 جىلدان بەرى سوتتاسىپ كەلەمىز. مىنە، باقانداي بەس جىل بولدى. اقىرى بۇگىن ادىلەتتى، زاڭدى شەشىم شىقتى. اكىمدىك ەندى اپەللياتسياعا بەرۋى مۇمكىن. ال ءبىز ءوزىمىز بەرمەيمىز. ءبىزدىڭ بۇل سوت شەشىمىنە كوڭىلىمىز تولادى. ويتكەنى، سوت وسىنداي شەشىم شىعارۋى كەرەك تە ەدى.

سەيىلبەك بەكەنوۆ، كاسىپكەر:

- سوتتىڭ ءادىل شەشىم قابىلداعانىنا قۋانىپ وتىرمىز. مەنىڭ راحات بازارىندا جۇمىس جاساپ جاتقانىما 27 جىل بولدى. ءبىز راحات بازارىن قورعاۋعا ءالى دە كۇشىمىزدى سالامىز.

ءلاززات كوپەرباەۆا، كاسىپكەر:

- قۇدايعا تاۋبە، ءبىز ءوز قۇقىعىمىزدى قورعاي الدىق. سوتتىڭ ءوزى ايتتى. «تكم» جشس مەن راحات بازارى كاسىپكەرلەرىنىڭ ءدال سول جەرگە ارتىقشىلىق قۇقىقتارى بار. ەندى ول جەرگە ساياباق سالۋ، زاۋىت سالۋ ت.ب. تۋرالى باسقا اڭگىمە بولماۋى كەرەك. سوت بەس جىل دەگەندە اقىرى ءادىل شەشىم شىعاردى. ءبىز ءوز كاسىبىمىز ءۇشىن كۇرەستىك. كۇرەستى ءالى دە جالعاستىرا بەرەمىز.

Abai.kz