پرەمەر-ءمينيستردىڭ ءبىرىنشى ورىنباسارى رومان سكليار «ارسەلوار ميتتال تەمىرتاۋ» كومپانياسىنىڭ ورنىنا رەسەيلىك «سەۆەرستال» كومپانياسىنىڭ كەلەتىنى تۋرالى اقپاراتقا پىكىرىن ايتتى. 

«ولاي ەمەس، رەسەي كومپانيالارىنان ەشكىم كەلىسسوز جۇرگىزىپ جاتقان جوق. تاعى دا ءتۇسىندىرىپ ايتايىن، ەشقاندا كەلىسسوز ءجۇرىپ جاتقان جوق»، - دەدى ءبىرىنشى ۆيتسە-پرەمەر اقوردادا تىلشىلەر سۇراعىنا وراي.

سونداي-اق رومان سكليار ازىرگە ينۆەستور قاي ەلدەن كەلەتىنىن ايتۋ ەرتە ەكەنىن اتاپ ءوتتى.

«ءيا، شىنىمەن دە، كومپانيا قوندىرعىلاردى جوندەۋ، ينۆەستيتسيالار بويىنشا مىندەتتەمەلەرىن كەشىكتىرۋدە. كاسىپورىندا ادام قازاسىمەن بايلانىستى قايعىلى وقيعالار بولىپ جاتىر. ونىڭ ءبارى ءبىزدى الاڭداتپاي قويمايدى. سوندىقتان ءوندىرىستى دامىتۋعا اقشا قۇيىپ، ءتيىمدى جۇمىس ىستەي الاتىن وزگە ينۆەستورلاردى تارتۋ باعىتىندا جۇمىس جۇرگىزىلىپ جاتىر. ونىڭ ىشىندە ەڭبەك قاۋىپسىزدىگى – نەگىزگى باسىم باعىت. قازىر قاي ەلدىڭ ينۆەستورلارى كەلۋى مۇمكىن ەكەنىن ايتا المايمىن، ەرتە بولادى»، - دەدى ءبىرىنشى ۆيتسە-پرەمەر.

Abai.kz