قارا قالامنىڭ كيەسى اعىلشىن مەن نەمىستەن، ورىس پەن جويتتەن ماڭگى كوشپەك ەمەس دەپ كىم كەسىم ايتادى. وركەنيەتكە جانتالاسىپ ۇمتىلعان وزىق دامۋدىڭ اسەرى مە الەم شىعىستى جەر جاراتىلعالى بەرى وقىپ كەلە جاتسا دا، سونىڭ ىشىندە جاپون جازۋشىلارىنىڭ كىتاپتارىن قايتارا جانىعا پاراقتاي باستاعان. ريۋنوسكە اكۋتاگاۆا، ياسۋناري كاۆاباتا، يۋكيو ميسيما، كەندزابۋرو وە، كەندزي ناكاگامي شىعارمالارىنان سوڭ، عالامدىق «مۋراكامي فەنومەنىن» قالىپتاستىرعان حارۋكي...
مۋراكامي فەنومەنىنىڭ» باستى عاجايىبى – گەوگرافيالىق شالىمى، ازيالىق تانىم اقيقاتىن مۇلدەم باسقاشا ءتۇسىندىرۋى، شىعارمالارىنا وقىرمان قاي تىلدە كوز جۇگىرتسە دە جاپونشا وقىپ وتىرعانداي اسەردە قالاتىنى، كىتاپتارىنىڭ مۇقاباسىنىڭ وزىنەن ءداستۇرلى جاپون مادەنيەتىنىڭ ءمورى انىق تانىلاتىنى. تۋىندىسى قاي تىلگە اۋدارىلسا دا قازىر اقش-تا تۇراتىن حارۋكي مىرزامەن ەدەنگە توسەلگەن جالاڭ دزابۋتون ۇستىندە وتىرىپ ەركىن اڭگىمەلەسكەندەي كۇيگە تۇسىرەتىنى بار.
مۋراكامي فەنومەنىنىڭ تاماشاسى - جاپون مادەنيەتىن الەمدىك وركەنيەتپەن بايلانىستىرۋىندا، سايكەستەندىرۋىندە.
مۋراكامي فەنومەنىنىڭ كەرەمەتى - الەم وقىرمانىن جاپون ادەبيەتىنە بەيىمدەۋىمەن، الەمدىك كىتاپحاناعا جاپون جازۋشىلارىن تارتۋدان كورىنەدى.
مۋراكامي فەنومەنىنىڭ ەرەكشەلىگى – كوپسالالىعىمەن تاڭقالدىرۋىندا. حارۋكي جالعىز جازۋشىلىق دارىن يەسى عانا دەگەنگە ءتىل بارا ما: ول شەبەر رەجيسسەر - وقىرماندى شىعارمالارىنا ءۇڭىلدىرىپ-اق تاماشا كينولار كورسەتە الادى.

قارا قالامنىڭ كيەسى اعىلشىن مەن نەمىستەن، ورىس پەن جويتتەن ماڭگى كوشپەك ەمەس دەپ كىم كەسىم ايتادى. وركەنيەتكە جانتالاسىپ ۇمتىلعان وزىق دامۋدىڭ اسەرى مە الەم شىعىستى جەر جاراتىلعالى بەرى وقىپ كەلە جاتسا دا، سونىڭ ىشىندە جاپون جازۋشىلارىنىڭ كىتاپتارىن قايتارا جانىعا پاراقتاي باستاعان. ريۋنوسكە اكۋتاگاۆا، ياسۋناري كاۆاباتا، يۋكيو ميسيما، كەندزابۋرو وە، كەندزي ناكاگامي شىعارمالارىنان سوڭ، عالامدىق «مۋراكامي فەنومەنىن» قالىپتاستىرعان حارۋكي...
مۋراكامي فەنومەنىنىڭ» باستى عاجايىبى – گەوگرافيالىق شالىمى، ازيالىق تانىم اقيقاتىن مۇلدەم باسقاشا ءتۇسىندىرۋى، شىعارمالارىنا وقىرمان قاي تىلدە كوز جۇگىرتسە دە جاپونشا وقىپ وتىرعانداي اسەردە قالاتىنى، كىتاپتارىنىڭ مۇقاباسىنىڭ وزىنەن ءداستۇرلى جاپون مادەنيەتىنىڭ ءمورى انىق تانىلاتىنى. تۋىندىسى قاي تىلگە اۋدارىلسا دا قازىر اقش-تا تۇراتىن حارۋكي مىرزامەن ەدەنگە توسەلگەن جالاڭ دزابۋتون ۇستىندە وتىرىپ ەركىن اڭگىمەلەسكەندەي كۇيگە تۇسىرەتىنى بار.
مۋراكامي فەنومەنىنىڭ تاماشاسى - جاپون مادەنيەتىن الەمدىك وركەنيەتپەن بايلانىستىرۋىندا، سايكەستەندىرۋىندە.
مۋراكامي فەنومەنىنىڭ كەرەمەتى - الەم وقىرمانىن جاپون ادەبيەتىنە بەيىمدەۋىمەن، الەمدىك كىتاپحاناعا جاپون جازۋشىلارىن تارتۋدان كورىنەدى.
مۋراكامي فەنومەنىنىڭ ەرەكشەلىگى – كوپسالالىعىمەن تاڭقالدىرۋىندا. حارۋكي جالعىز جازۋشىلىق دارىن يەسى عانا دەگەنگە ءتىل بارا ما: ول شەبەر رەجيسسەر - وقىرماندى شىعارمالارىنا ءۇڭىلدىرىپ-اق تاماشا كينولار كورسەتە الادى.
ول سۋرەتشى: كىتاپتاعى جاپوندىق ناقىشتاعى بوياۋلاردى ايتپاي-اق قويعانىم دۇرىس، باستىسى ول وقىرماندى كەيىپكەرىنە اينالدىراتىن قىلقالامشى. ونى وقىپ بىتكەن سوڭ، ءوزىڭىزدىڭ بامبۋكتەن نەمەسە ساباننان تىگىلگەن جازدىق اياق كيىم كيىپ، جايدارى جىميىپ وتىرعانىڭىزدى بايقايسىز.
حارۋكي جاننىڭ ەمشىسى: ادامزات مىنەز-قۇلقى قاينارىنىڭ باسىندا وتىرعان، ۇستىندە اق حالاتى بار مەيىرىمدى پسيحياتردى كورمەسەڭىز، ماعان كەلىڭىز.
مۋراكامي فەنومەنىنىڭ تابەت اشارلىق ءيىسى مەن ءدامى بار: ءبىر ۋاقىتتا وقىرمان ءوزىنىڭ جاپون اسحاناسىندا ىشىنە شوكىمدەپ قانا ءشوپ-شالام سالىنعان الدىنداعى ونشاقتى ۇساق تاباققا قاراپ وتىرعانىن بايقاپ، سەلك ەتە تۇسەر.
مۋراكامي فەنومەنى تۋرالى ايتقاندا ونىڭ تارتىلىس كۇشىنە توقتالۋ ءلازىم. ءتىپتى بۇل نارسەنى ارباۋ تۋرالى ۇعىممەن الماستىرساق پا ەكەن؟..
حارۋكي مۋراكامي كىتاپقا عاشىق بولۋدى ۇيرەتەتىن، ونى جاقسى كورۋدى ناسيحاتتايتىن جازۋشى.
باعزىداعى داڭقى -  شىڭ، تۇرقى - زاڭعار دەپ باعالانعان ادەبيەتتىڭ دەڭگەيىن بۇگىندە ءساننىڭ ولشەمىمەن شامالايمىز، تۇپكى ماعىناسى الەم-جالەم مودانى تىقپالامايتىن جەر قالماپتى-اۋ، اقىرعىسى جازباگەرىڭىز دە مودنىي... وسىلاي ءسوز ساپتايتىنداردىڭ تىلىمەن جەتكىزسەك، حارۋكي اسا ءساندى قالامگەر. ويتكەنى، اسا مارتەبەلى پروزا دا اياۋلى «art» تەندەنتسيالارىنىڭ شەڭبەرىنە كىرىگەدى. مۋراكامي كىتاپتارىنىڭ تاماشا ءيىسى بار، پالەن دەگەن گۇلدىڭ ءيىسى دەگەندەي انىقتاما دا ايتا المايمىن، قايدان شىعاتىنى بەلگىسىز، قانداي جۇپار ەكەنى دە اڭعارىلۋسىز جاعىمدى ءبىر سامال، ءسىرا، تۇيسىكتىڭ اڭقىماسى. ونىڭ كىتابىن كورسەڭ كەۋدەڭدە قۋانىش گۇلى ونەدى. سوڭعى سويلەم مەنىكى ەمەس، مارحابات بايعۇت اعامىزدىكى: «...جازۋ جاعىنان جاپىرىپ بارادى. جارتى الەمىڭىزدى بيلەپ الدى. ...الدەبىر اۋەنى الديلەپ كەتە بارار. سيقىرلاي جەتەكتەي جونەلەر. كىتابىن كورسەڭىز، قۋانىپ كەتەسىز»،-دەپ مۋراكامي فەنومەنىنىڭ باعاسىن ادەمى بەرىپ ەدى.
بۇل جاپون سونشالىقتى نە جازىپ قويىپ ەدى دەيسىز عوي، كادۋىلگى ءومىر: كەيىپكەرلەرى كادۋىلگىشە دجينسى ماتاسىنان تىگىلگەن كيىمدەر كيەدى، كادۋىلگى سىرالاردى سىمىرەدى، قۇلاقتى كۇندە كەمىرىپ جاتقان اۋەندەر تىڭدايدى، كينو كورەدى، باردىڭ بيىك ۇستەلىندە اياعىن ايقاستىرىپ وتىرادى. بىراق، ىشتە ءبىر تۇيتكىل بار، ولار بارلىق جەردەن ءوزىن ىزدەيدى. حارۋكيدىڭ قۇپياسى وسىندا جاتىر. مۋراكامي كەيىپكەرلەرى الدەقاشان جوعالىپ كەتكەن وزدەرىن ىزدەيدى نەمەسە ءوزى سەكىلدى جوق ىزدەگەن بىرەۋگە تاۋىپ بەرۋگە كومەكتەسەدى. مەيىرباندىقتى ايالاۋعا، ايرىلىپ قالماۋعا، كەشىرۋ مەن قايعىلارعا كوندىگۋگە ۇيرەتەدى. باستىسى، ولاردى الدان ۇلكەن جاقسىلىقتار كۇتىپ تۇرعانىن ۇدايى سەندىرەدى. وسى تۇرعىدان العاندا مۋراكامي فەنومەنى – مەدەت بەرۋشى، جاقسىلىقتارعى سىلتەۋشى كۇش رەتىندە دە تانىلادى. ونىڭ شىعارماشىلىق كرەدوسى -  جاقسىلىقتارعا سەنۋ مەن سەزۋ.
مۋراكامي كەيىپكەرلەرى ءوز ويلارىن اشىق ايتپايدى، يشارامەن، ۇيالشاق كوزقاراسپەن، ىم، نازار ارقىلى جەتكىزەدى، ايتپاقشى، ولار ءۇشىن كوكەيدەگىسىن سوزبەن جەتكىزۋدەن گورى حاتقا جازىپ جونەلتۋ وڭاي. وندا حات جازۋ ستسەنالارى كوپ ۇشىراسادى. حات جازۋ داعدىسى ونىڭ كەيىپكەرلەرى ءۇشىن ءۇمىتتىڭ قۇرالى. سال اۋرۋىمەن اۋىراتىن جانە ەشقاشان جازىلمايتىنىنا سەنەتىن ون جەتى جاسار قىز ءوز سۇيىكتىسىنە ارناعان حاتىن راديونىڭ تىكەلەي ەفيرى ارقىلى وقيدى نەمەسە ومىردەن قوشتاسقانىم دۇرىس دەپ تۇجىرعان جىگىت سوڭعى ساعاتتارىندا كەننەديدىڭ كەزدەيسوق ءولىمىن ەسكە ءتۇسىرىپ وتىرىپ، ءوزى دوسىم دەپ ساناعان الدەبىر تاكسي جۇرگىزۋشىسىنە ارناپ حات قالدىرادى.
حارۋكي ءومىردى جازۋمەن قاتار، ءولىم ستيلىنە دە ەرەكشە ورىن بەرەدى. ونىڭ كەيىپكەرلەرى ءولىمدى ومىرگە قاراما-قارسىلىق رەتىندە ەمەس، ءومىردىڭ قۇرامداس بولىگى رەتىندە، ءتىپتى ومىردەن دە ماندىرىك قۇبىلىس دەپ بايىپتايدى.
مۋراكامي نوتامەن ەمەس، ارىپتەرمەن ساز جازاتىن تاماشا مۋزىكانت، ءاربىر سويلەمىنەن سىڭعىر ەسەدى، وقىرمان اۋامەن ەمەس، مۋزىكامەن تىنىستاپ وتىرعانىن سەزبەيدى دە، تۇنىق جانە سونشالىقتى اقىلدى اۋەن ويناپ تۇرعان قۇلاققاپتى قاپسىرا كيىپ ونى پاراقتاي بەرمەك. ونىڭ بارلىق شىعارمالارى ءان سالىپ تۇرادى.
«...مەنى قىزىقتىرعانى - ونداعى ەسكى دجاز پلاستينكالارىنىڭ عاجايىپ كوللەكتسياسى. دجاز پلاستينكالارىنىڭ ەسكى كوللەكتسيالارىنا قاتىستى ءسوز بولعان كەزدە، سىبىزعى داۋىسىنا اربالعان كوبراعا ۇقساپ، قارسى تۇرار بار ەرىك - كۇشىمدى جوعالتامىن» («لەكسينگتانداعى ەلەستەر»),-دەيدى ول.
بولمەلەر ادەتتە اس ءۇي، جاتىن، قوناقجاي، بالالار بولمەسى، جۇمىس بولمەسى، كىتاپحانا دەپ بولىنەدى، ارى كەتسە داۋلەتتى ادامنىڭ ۇيىندە سپورتپەن شۇعىلداناتىن، كينو قارايتىن بولمە بولۋى مۇمكىن. ال، حارۋكيدىڭ مۋزىكاعا قۇمارلىعى سونشالىقتى ونىڭ كەيىپكەرىنىڭ ۇيىندە مۋزىكا بولمەسى بار: «ۋاقىت تاسقىنىنىڭ تىنىسىن سەزدىرەر بۇل مۋزىكالىق بولمەدە ساعات ءتىلى باياعىدا توقتاپ قالعان. ...ءبىر جاق قابىرعاسىن الىپ تۇرعان ستەللاجدا الفاۆيتتىك ءتارتىپ بويىنشا ءتىزىلىپ قويىلعان ەسكى پلاستينكالار تۇر، ولاردىڭ ناقتى سانىن ءتىپتى كەيسي دە بىلە بەرمەيدى. ول بار بولعانى شامالار: التى نەمەسە جەتى مىڭ، شامامەن وسىنداي» («لەكسينگتانداعى ەلەستەر»). باجايلاعانعا جەتى مىڭ دەگەن سۇمدىق دۇنيە ەمەس پە، ال، اۆتور ءۇشىن بۇل از، ءتىپتى تۇك تە ەمەس. سوندىقتان كەيىپكەردىڭ اۋزىنا «تاعى دا ءدال وسىندايى كارتون جاشىكتەردە بۋىلىپ، توبەدەگى شاتىردىڭ استىندا جاتىر» («لەكسينگتانداعى ەلەستەر») دەگەن ءسوز سالادى. جازۋشى بالا كەزىنەن مۋزىكانىڭ تالعامپاز تىڭدارمانى ەدى جانە اۋەنگە دەگەن ىنتىقتىعى جاسى جيىرماعا جەتكەندە توكيونىڭ تىنىش جاتقان ءبىر ايماعىنان دجاز-بار اشۋعا مۇرىندىق بولعان. «پيتەر كەت» دەپ اتالاتىن بۇل ورىننىڭ ءالى كۇنگە بار-جوعىن بىلمەيمىز، بىراق، ونىڭ بارلىق سۇيىكتى وقىرماندارىن ساكۋرا اعاشى گۇلدەگەن ءبىر كەرەمەت كۇنى سولاي قاراي جول تۇسىرۋگە جازسىن.
الەمدىك ميفولوگيانىڭ جالىنا جارماسىپ الىپ جاساپ كەلە جاتقان جازۋشىلار مول. بىراق، اسا مارتەبەلى ماەسترو ولاردىڭ توبىنان ەمەس. بۋددانىڭ جاپون اعىمى ءالسىز سەزىلگەنىمەن، جازۋشى بۇل قۋاتتان دا قارىزعا ەشتەمە الماپتى. ءوز سەزىمى، ءوز قيالى – ءتاتتى وتىرىكتەر جانە تۇگەل ويدان شىعارىلعان، بىراق، سونشالىقتى شىنايى ءھام سەنىمدى سيۋجەتتەر. ول وقىرماندى تاڭقالدىرۋ مەن تاڭداندىرۋ ءۇشىن عانا جازادى. ارا-تۇرا قورقىنىشتى ترانسفورماتسيا اۋراسىن تۋىناتىپ، ۇرەيلەنۋگە دە رۇحساتىن بەرگەن.
تەگى جاپون دەگەنگە مۋراكامي ميستيكالارىن بۋددانىڭ اڭىزدارىنا اپارىپ ويلانباستان تەلي سالاتىندارعا وكپەم بار، بۇل اۆتور دايىن ميفتى قاشان پايدالانىپ ەدى، ءتىپتى، بۇرىننان باردى يەكەمدەگەن كەزى دە از، دۇرىسى ءوزى جاسايدى. مىنا ءبىر اڭگىمەگە قارالىق، مەكتەپتىڭ تۇنگى قاراۋىلى ءوز كۇزەتىن ءمىنسىز اتقارىپ، ۇركەر اۋعاندا عيماراتتى ارالاپ كەلە جاتقان. كەنەت ۇلكەن اينادان بۇعان قاراپ تۇرعان ءوزىن كورەدى. ارتىنشا بۇل جەردە ەشقاشان اينانىڭ بولماعانىن، قابىرعادان تاپ ءوزى سەكىلدى بىرەۋدىڭ قاراپ تۇرعانىن بايقايدى. ايتۋىنشا ميستيكا دەگەنىمىز – ادامنىڭ ءوزى. ءوزىن-ءوزى ىزدەۋى، ءوزىن-ءوزى تانۋى، ەلەس دەگەنىمىز نەگىزى ادامنىڭ ءوز قيالىندا جاتسا كەرەكتى دەگەن وي. سوندىقتان ونىڭ باۋىر توسەگەن جانرىن «پسيحولوگيالىق تريللەر» دەپ تەك باتىستىق جاڭا ادەبيەتكە بالاپ تاستاۋ قيانات بولار، ميستيكالىق پەرسوناجدار چەحوۆتىڭ قارا كىسىسى، بۋلگاكوۆتىڭ جىن-جىبىرلارى، دوستوەۆسكيدىڭ دەلقۇلىلارى بولىپ سوناۋ جىلدارى-اق كلاسسيكالىق ادەبيەتكە كىرىپ ەدى عوي...
مەن ءۇشىن رادلوۆ پەن پوتانين قازاق، قازاق اتامنىڭ بەل بالاسى، ۇلتىم ءۇشىن قىرۋار ەڭبەك قالدىرعان، دۇرىسى ماعان جانى اشىعان، ەرتەڭىم ءۇشىن دەپ ەجەلگىم مەن كونەمدى جيىپ-تەرىپ بەرگەندى نەگە بولەكتەۋىم كەرەك؟ سول سەكىلدى، قازاق پروزاسىنىڭ سوڭعى جىلدارداعى جاقسى شىعارمالارمەن تولىعۋىندا مۋراكامي تۋىندىلارىنىڭ ۇلەسى جوق دەي الماسسىز. تۇلعانىڭ ەكىگە جارىلۋىن، جارماقتانۋدى (ت.ابدىكتىڭ «وڭ قولىنان» تامىر تارتاتىن «عاراسات مايدانىن» ايتىپ وتىرماعانىما سەنىڭىز) جاڭالىق كورسەڭىز، اۋەلى حارۋكيدىڭ «سترانە چۋدەس بەز تورموزوۆ» دەپ اتالاتىن فەنتەزي جانرىنداعى تۋىندىسىنا كوز جۇگىرتىڭىز. پارالەلدى ءومىر سۇرەتىن ادامداردىڭ ورتاسىنا توپ ەتە تۇسەسىز.
ال، حارۋكي ءۇشىن سيۋجەتتىڭ ناشارى جوق. ءسىز جامان-جاۋتىك دەگەن سيۋجەتتىڭ ءوزى ونىڭ قالامىندا تۇرلەنىپ، جارقىراي نۇر شاشىپ كەتەدى. الگى وقيعانىڭ ءبىز كورمەگەن، ءبىز ءتىپتى دە نازار سالماعان ءبىر قالتارىسىن تاۋىپ الادى دا، وقىرماندى دا ءتاپ-ءتاۋىر تامساندىرىپ قويادى. ونىڭ «كەنگرۋ ءۇشىن ءساتتى كۇن بولدى» دەيتىن اڭگىمەسىنىڭ ارقاۋى حايۋاناتتار باعىنا قۇربىسىن ەرتىپ بارعان جىگىتتىڭ حود-دوگ جەپ، كولا ءسىمىرىپ تۇرىپ قايداعى ءبىر كەنگرۋدىڭ جاڭا تۋىلعان بالاسىن تاماشالاۋى. بىرەۋدىڭ دۇنيەسىن جاسىرىپ قاپ قايتەمىز، وقيعانىڭ بارى وسى-اق. بىراق، ناق وسى تۇستا اۆتور تابيعاتتى ۇزدىگە سۋرەتتەمەي-اق، كىسىنىڭ اق شاشىنان باستاپ، توپىليىنىڭ تۇمسىعىنا جۇققان باتپاققا دەيىن سانامالاپ پورترەت جاساماي-اق، پالساپاعا ۇرىنىپ قالماي-اق ادامدار ءومىر سۇرەتىن ورتانى جاقسى جازۋعا بولاتىنىن كورسەتەدى. ونىڭ ۇستىنە كەنگرۋدىڭ جاڭا تۋعان بالاسىن تاماشالاۋ ءۇشىن مىسىعىن تاماقتاندىرىپ بولعان سوڭ، باستارىنا كۇنقاعار كەپەشتەرىن كيىپ، ەلەكتريچكامەن حايۋاناتتار باعىنا جەتكەن، دۇڭگەرشەكتەن بالمۇزداق الىپ جەپ، سوڭىرا سىرا ىشۋگە بەت العان ەكەۋ تۋرالى جازۋ ءۇشىن سۋرەتتەۋ دە، پورترەت تە، ءپالساپا دا كەرەك ەمەس قوي...
مۋراكامي بارلىق ۋاقىتتا، بارلىق تالعام ءۇشىن قۋانىش دەپ ايتقان جوقپىن، ونىڭ كەيبىرەۋلەر ءۇشىن وسال جازبالارى دا بار: سۇرعىلت، دىمقىل، ايانىش تا تۋعىزبايدى، ەشقانداي دا جاقسىلىق تا سەزىنبەيسىڭ، بويىڭنان وكىنىشتى دە بايقامايسىڭ، ايتەۋىر ءبىرىنشى سويلەمىنەن باستاپ، سوڭعى نۇكتەسىنە دەيىن سوزىلمالى بايانداۋلاردى وقىپ شىعۋ ءۇشىن سەن دە بىرنەشە كۇن بويى سۇيرەتىلەسىڭ... بوس پاتەردە وتىرىپ ۇرىنارعا قارا تاپپاعان جاس، كوشەدەن ۇشىراتقان بەيتانىس قىزدى توسەككە قالاي شاقىرعانىم دۇرىس دەپ باس قاتىرعان ناپسىقۇمار، الدەبىر ەلەكتروندى گيتاردى سابالاپ وتىرعان شالا تالانتتى، ماعىناسىز ساياحاتتار مەن ەرتەڭگىلىك اس تۋرالى جازبالاردان سوڭ كىتاپتى مۇلدەم قولعا الماۋ تۋرالى ويلار باس كوتەرۋى دە مۇمكىن. ول شىعارماشىلىق توڭكەرىس جاسايمىن دەگەن ويمەن وسى سالاداعى كەيبىر قۇندىلىقتاردى قۇلدىراتىپ تا العان. رومان-پوپسا، سەنتيمەنتالدى رومان جانرىنداعى دۇنيەلەرى بۇعان دالەل. جازۋشى قاي زاماندا دا ادام بولمىسىن ايقىن كورسەتۋىمەن ەكشەلسە، ونىڭ كەي شىعارمالارىندا رۋحاني شەكارانى ەستەن شىعارىپ، كەيىپكەردى تىم قاتتى «شەشىندىرىپ» جىبەرەتىن تۇستارى دا بار. مىسالى «نورۆەجسكي لەس» رومانىنداعى ۆاتانابە ستۋدەنتتىڭ ارسىز ىستەرى. تاپ وسى رومان ارقىلى وقىرمان ناوكونى عانا ەمەس، حارۋكيدىڭ ءوزىن دە جوعالتىپ العان سىڭايلى كۇي كەشەدى (سوندىقتان، ءوز باسىم مۋراكاميدى وقۋدى وسى كىتاپپەن باستاماۋعا كەڭەس بەرەمىن).
...بىراق، ءسىز ءۇشىن، ول ءۇشىن، تاعى بىرەۋ ءۇشىن بۇل شىعارمالار عالامات دەپ باعالانادى. بۇل-داعى، مۋراكامي فەنومەنىنىڭ ءبىر ەرەكشىلىگى، ول بارلىق ادامدارعا جانە بارلىق جاستاعىلارعا ارناپ جازادى. سويتە تۇرا، وقىرمان ونىڭ كەيىپكەرى شاتتانسا قۋانىپ، قايعىرسا مۇڭايىپ، The Beates توبىنىڭ اندەرىن بىرگە تىڭداپ، سويا تۇزدىعىنا بوكتىرىلگەن قياردى دا بىرگە جەگەندەي كۇي كەشەدى.
حارۋكي مۋراكامي تۇيسىكتىڭ جازۋشىسى.

Abai.kz