قازاقستاندا جوعارى لاۋازىمدى مەملەكەتتىك قىزمەتكەرلەرگە قازاق ءتىلىن ءبىلۋ مىندەتتەلەدى. بۇل تۋرالى قر عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى ەربول تىلەشوۆ ايتتى.

«وسى نەمەسە كەلەسى ايدا ۇكىمەت «قازاقستان رەسپۋبليكاسىندا ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداماسىن» بەكىتەدى. وندا جوعارى لاۋازىمدى مەملەكەتتىك قىزمەتكەرلەرگە مەملەكەتتىك ءتىلدى ءبىلۋدى مىندەتتەۋ ەنگىزىلەدى. العاشىندا بارلىق مەملەكەتتىك قىزمەتكەرگە مىندەتتەۋدى ەنگىزىپ كوردىك، بىراق ءتۇرلى قارسىلىقتار بولدى. تالقىلاۋ بارىسىندا مينيستر، مينيستر ورىنباسارى، اكىم، اكىم ورىنباسارى سەكىلدى تەك جوعارى لاۋازىمدى تۇلعالارعا مەملەكەت ءتىل ءبىلۋ مىندەتەلدى»، - دەدى ەربول تىلەشوۆ قر پرەزيدەنتى ءىس باسقارماسىندا «مەملەكەتتىك ءتىل – تاتۋلىق نەگىزى» اتتى دوڭگەلەك ۇستەلدە.

ونىڭ ايتۋىنشا، جاڭا تۇجىرىمدامادا مەملەكەتتىك تىلدە ءىس-قاعازداردى جۇرگىزۋ، مەملەكەتتىك تىلدە زاڭ قابىلداۋ، اۋدارما ساپاسى ماسەلەلەرى قاراستىرىلعان.

«اسىرەسە قۇجاتتاردىڭ تۇپنۇسقادا مەملەكەتتىك تىلدە دايىندالۋى ماڭىزدى. مۇندا قازاق ءتىلى ءالى كۇنگە دەيىن اۋدارما ءتىلى بولىپ قالۋدا، بۇل شىندىق. قازىر 30 جىلدا ۇلكەن ماماندار لەگى قالىپتاستى، سوندىقتان تالاپ قوزعاۋ كەرەك دەپ ويلايمىن»، - دەدى ەربول تىلەشوۆ.

Abai.kz