«قازاقستان» شاحتاسىنداعى 5 كەنشى قازا بولعان قايعىلى وقيعاعا 100% جۇمىس بەرۋشى كىنالى. وسىلاي دەپ مالىمدەدى قر تج ءمينيسترى سىرىم ءشارىپحانوۆ ۇكىمەتتىك كوميسسيانىڭ تەرگەۋ قورىتىندىسىن جاريالاپ.

ونىڭ ايتۋىنشا، ءورت تۇتانۋىنا بىرنەشە فاكتور سەبەپ بولعان.

«تەكسەرىس بەلگىلەنگەن تالاپتارعا ساي ءوتتى. كوميسسيانىڭ ساراپتامالىق قورىتىندىسى اپات پەن جازاتايىم وقيعانىڭ نەگىزگى سەبەپتەرىن انىقتاپ بەردى. ءبىرىنشىسى - كومىر كونۆەيەرىندەگى ءورت مەحانيكالىق ەنەرگيانىڭ جىلۋ ەنەرگياسىنا اۋىسۋىنان شىقتى. كونۆەيەردىڭ كەپتەلىپ قالعان روليگىندەگى تاسپا توسەمىنىڭ ۇيكەلۋىنە بايلانىستى وت تۇتانعان. ەكىنشىسى - «قازاقستان» شاحتاسىنىڭ ينجەنەرلىك-تەحنيكالىق قۇرامى تاراپىنان باقىلاۋ ءوندىرىسىنىڭ بولماۋى. سونداي-اق، قاۋىپسىزدىك تەحنيكاسىنىڭ ساقتالماۋى جانە ەنەرگيا-مەحانيكالىق قىزمەتتىڭ ءالسىز باقىلاناتىنى انىقتالدى. ءۇشىنشىسى – قاۋىپسىزدىك تالاپتارىن جانە تەحنيكالىق رەتتەۋ نورمالارىن بۇزۋ. بۇل دەگەنىمىز - سايكەستىك سەرتيفيكاتىنسىز تاسپا توسەمىن پايدالانۋ. سوڭعىسى، جۇمىس ايماعىنىڭ توزاڭدانۋى مەن جانعىش زاتتاردان، تاۋ-كەن قازبالارىنان اۋانىڭ گازدانۋى شاحتا قىزمەتكەرلەرىنىڭ ولىمىنە اكەپ سوقتى»، - دەپ اتاپ ءوتتى قر تج ءمينيسترى سىرىم ءشارىپحانوۆ.

بۇدان باسقا، ەڭبەك زاڭناماسى نورمالارىنىڭ بۇزىلۋى جانە انىقتاۋ جۇيەسىنە قىزمەت كورسەتەتىن مامانداردىڭ جەتكىلىكسىزدىگى، باسقارۋ قۇرىلىمى وزگەرگەن كەزدە ولاردى لاۋازىمعا تاعايىنداعانعا دەيىن جاۋاپتى باسشىلارعا لاۋازىمدىق نۇسقاۋلىقتىڭ بولماعانى انىقتالدى.

«كوميسسيا جۇمىسىنىڭ ناتيجەسى بويىنشا جۇمىس بەرۋشىنىڭ 100% كىنالى ەكەنى انىقتالدى. زاڭنامانى بۇزعان 28 جاۋاپتى تۇلعا بەلگىلى بولدى»، - دەدى سىرىم ءشارىپحانوۆ.

ەسكە سالساق، قاراعاندى وبلىسىنداعى «قازاقستان» شاحتاسىندا 17 تامىز كۇنى  ءورت شىقتى. اپات كەزىندە جەر استىندا قالىپ قويعان 227 كەنشىنىڭ 222-ءسى جەر بەتىنە امان شىعارىلىپ، 8-زارداپ شەكتى.

شاحتانىڭ استىندا قالىپ قويعان بەس كەنشىنىڭ دەنەسى تابىلدى.

Abai.kz