«كەڭ اۋقىمدى ارانداتۋشىلىقتاردىڭ جولىن كەسۋ، ارميان قارۋلى كۇشتەرىن ءبىزدىڭ اۋماقتاردان قارۋسىزداندىرۋ جانە شىعارۋ، اسكەري ينفراقۇرىلىمدى «بەيتاراپتاندىرۋ» جانە ازەربايجان ازاماتتارىنىڭ قاۋىپسىزدىگىن قامتاماسىز ەتۋ ماقساتىندا ايماقتا «جەرگىلىكتى انتيتەررورلىق شارالار باستالدى»، – دەپ حابارلادى ازەربايجان قورعانىس مينيسترلىگى.

ءازىربايجان قورعانىس مينيسترلىگىنىڭ ايتۋىنشا، كونستيتۋتسيالىق قۇرىلىستى قالپىنا كەلتىرۋ ءۇشىن دە وسىنداي شارالاردى قولعا الىپ وتىر ەكەن.

سونىمەن قاتار، ازەربايجان اسكەريلەرى «الدىڭعى شەپتە جانە تەرەڭدە جوعارى دالدىكتەگى قارۋدى قولدانۋ ارقىلى ارميان قارۋلى كۇشتەرى قۇرامالارىنىڭ پوزيتسيالارى»، اتىس نۇكتەلەرى مەن اسكەري نىساندار جارامسىز بولىپ جاتىر دەپ مالىمدەيدى.

سونداي-اق، ازەربايجان قورعانىس مينيسترلىگى رەسەيلىك بىتىمگەرشىلىك كۇشتەرىنىڭ قولباسشىلىعىن جانە تۇرىك-رەسەي بىرلەسكەن باقىلاۋ ورتالىعىنىڭ باسشىلىعىن «جۇرگىزىلگەن ءىس-شارالار» تۋرالى حاباردار ەتكەنىن مالىمدەدى.

ارمەنيا تارابى وسىعان دەيىن ايماقتا بىرنەشە مارتە پروۆوكاتسيا جاساپ، ازەربايجان پوزيتسيالارىنا وق جاۋدىرعان. سول ارانداتۋشىلىقتاردىڭ شەگى تومەندەگى ەكى فاكت.

ءبىرىنشىسى: قاراباق سەپاراتيستەرىنىڭ 9 قىركۇيەكتەگى زاڭسىز سايلاۋى.

ەكىنشىسى: بۇگىن ازەربايجاننىڭ حوجابەند ايماعىندا بولعان جارىلىس. وندا 6 ادام قازا تاپتى. ازەربايجان تاراپى ارميان ديۆەرسيالىق توپتارى جولعا مينا ورناتقانىن ايتتى. ال ازەربايجان قوعامى قاراباقتاعى ارميان سەپاراتيستەرىنىڭ قولىندا قالعان ايماقتى تولىق قايتارۋ ءۇشىن بۇگىن اسكەري وپەراتسيا باستاۋدى تالاپ ەتكەن.

تالاپ ەتىلگەن وپرەاتسيا باستالدى. رەسەي مەن تۇركيانىڭ بىتىمگەر كۇشتەرى مەن مونيتورينگ ورتالىقتارىنا ەسكەرتۋ جاسالعان.

ءدال قازىر ۇرىس حانكەندى، اگدەرە، شۋشا باعىتتارىندا ءجۇرىپ جاتىر. ازەربايجان، حانكەندى ماڭىنداعى ارمەنيانىڭ ارتيللەريالىق قوندىرعىلارىنىڭ كوزىن جويىپ، حانكەندىگە دروندار ارقىلى شابۋىل جاساۋدا.

فوتو: اشىق دەرەككوزدەن

Abai.kz