اقتوبەدەگى «U-STUDY» تەستىلەۋ ورتالىعى ارقىلى بىلىكتىلىك ساناتىن ارتتىرۋدى وڭدى-سولدى ساۋداعا سالعاندار قىلمىستىق جاۋاپقا تارتىلدى. اقشاعا ساتىلعان سەرتيفيكاتقا مۇعالىمدەر عانا ەمەس، ديرەكتورلار دا قىزىققان. وڭىردە ءبىلىم سالاسى قىزمەتكەرلەرى ۇقك-ءنىڭ باقىلاۋىنا الىندى، دەپ حابارلادى orda.kz.

اقتوبە وبلىسى بويىنشا 800-گە جۋىق ءبىلىم سالاسىنىڭ قىزمەتكەرى كۇدىكتىلەر تىزىمىندە تۇر. ولارعا جالعان سەرتيفيكات ساتىپ العان بولۋى مۇمكىن دەگەن دەرەك بويىنشا تەكسەرۋ جۇمىستارى ءجۇرىپ جاتىر.

بىلىقتار «U-STUDY» تەستىلەۋ ورتالىعىنا جۇرگىزىلگەن تەكسەرىس كەزىندە بەلگىلى بولدى. پايداكۇنەمدىككە سالىنعاندار بىلىكتىلىك ارتتىرۋ تۋرالى سەرتيفيكات ساتقان. قىسمىستىق ءىس بويىنشا ءتورت ادام جاۋاپقا تارتىلدى. سوت ءتورت بىردەي ادامعا قاتىستى كوممەرتسيالىق ۇيىمداردا باسقارۋ لاۋازىمدارىن 3-5 جىلعا دەيىن باسقارۋ قۇقىعىنان ايىرىپ، 3-7 ميلليونعا دەيىن ايىپپۇل سالدى.

جالعان سەرتيفيكات العان كۇدىكتىلەر تىزىمدە مۇعالىمدەردەن بولەك بىرنەشە مەكتەپ ديرەكتورى دا  بار.  بىلىكتىلىكتىلىگىن ارتتىرۋ ءۇشىن ءتۇرلى قۋلىققا بارعان ۇستازدار ارەكەتىنەن ءبىلىم باسقارماسى دا حاباردار.

«ءتىزىم بويىنشا 885 ادام بار. 800-گە جۋىق اقتوبەنىڭ ادامى. ولار 2021-2022 جىلدارى ارالىعىندا تەست تاپسىرعان. تەستىلەۋدەن وتپەگەن، تىزىمدە جۇرگەن ادامدار دا بار. سوندىقتان ءتىزىم قايتا ناقتىلانىپ جاتىر. ول جەردە مۇعالىم دە، مەكتەپ ديرەكتورى دا بار. زاڭ بۇزۋشىلىقتار بىلىكتىلىكتى ارتتىرۋعا قاتىستى تەست الاتىن جەكە سەرىكتەستىككە تەرگەۋ جۇرگىزۋ كەزىندە انىقتالدى. بۇل جونىندە ءالى تولىق ايتا المايمىز. قر ۇقك تاراپىنان ءتىزىم كەلدى. بۇل سول جەكە سەرىكتەستىككە قاراستى قوزعالعان ءىس. ءتىزىم ءالى ناقتىلانباعان. ويتكەنى ول تىزىمدە تەستىلەۋدەن مۇلدەم وتپەگەن ادامداردىڭ اتى-ءجونى ءجۇر. سوندىقتان دا قازىرگى تاڭدا ۇقك-نە قايتا ءتىزىم بەرۋدى، ناقتىلاۋدى سۇرادىق» ،- دەدى اقتوبە وبلىسى ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.

قازىرگى ۋاقىتتا تەست جاۋاپتارىن ساتىپ الدى دەگەن كۇدىككە ىلىنگەندەرگە قاتىستى  قر سىبايلاس جەمقورلىققا قارسى ءىس-قيمىل اگەنتتىگىڭ وبلىستىق دەپارتامەنتىنە، پروكۋراتۋراعا قۇقىقتىق باعا بەرۋگە حات جولدانعان.

«ول پەداگوگتەرگە قانداي شارا قولدانۋعا بولاتىنىن سۇراپ وتىرمىز. ءبىلىم سالاسىنداعى پەداگوگتەردىڭ بىلىكتىلىگىن باعالاۋدىڭ قر وقۋ-اعارتۋ مينيسترلىگىنىڭ بۇيىرىعى بار. بۇيرىققا سايكەس ەرەجە بۇزعان نەمەسە تىيىم سالىنعان زاتتاردى قولدانۋ دەگەن بار. وسى سياقتى ەرەجە بۇزۋشىلىق انىقتالعان جاعدايدا ەكى شارا قولدانۋعا بولادى. ءبىرىنشىسى پەداگوگتاردىڭ ساناتىن پەداگوگ دەگەن بىلىكتىلىك ساناتىنا دەيىن تومەندەتۋ، ەكىنشىدەن، بەس جىلعا دەيىن قايتادان بىلىكتىلىك ساناتىن كوتەرۋگە تىيىم سالۋ. ءتىزىم ناقتىلانعاننان كەيىن ءبىلىم باسقارماسى تاراپىنان وسى ەكى شارا قولدانىلادى»،- دەدى بەرتىلەۋوۆا.

اقتوبە وبلىسى ءبىلىم باسقارماسى باسشىسى ورىنباسارىنىڭ ايتۋىنشا، پەداگوگتاردىڭ بىلىكتىلىگىن باعالاۋ پروتسەسىن ءبىلىم باسقارماسى باقىلامايدى. داۋعا اينالعان تەستىلەۋ جەكە سەرىكتەستىك پەن قر وقۋ-اعارتۋ مينيسترلىگى اراسىنداعى مەملەكەتتىك-جەكەمەنشىك سەرىكتەستىك اياسىندا جۇرگىزىلگەن.

Abai.kz