ارىستان مۇحامەديۇلىنا رەيدەرلىك جولمەن «ديپلومات» قوناق ءۇيىن تارتىپ الدى دەگەن ايىپ تاعىلىپ، تاعى دا سوت ءوتىپ جاتىر.

ايىپتاۋ دەرەكتەرىنە سايكەس، 2019 جىلى «ديپلومات» قوناقۇيىنە يەلىك ەتىپ وتىرعان ك. ەسىمدى كاسىپكەر ا.مۇحامەديۇلىنان كومەك سۇراعان. مۇحامەديۇلى بولسا ول كاسىپكەرگە 2,5 ملرد تەڭگە بەرۋگە كەلىسىپ، ونىڭ ورنىنا جاۋاپكەرشىلىگى شەكتەۋلى سەرىكتەستىگىنىڭ 71 پايىز كاپيتالىن قايىن ەنەسىنىڭ اتىنا راسىمدەۋدى سۇراعان. تەرگەۋ تاراپى ەكس-مينيستر سول كەزدە قوناقۇيدى ءوز بيلىگىنە الۋدى جوسپارلاعان دەگەن پايىمدا.

مامىلە جاسالعاننان كەيىن بىرنەشە ۋاقىت ءوتىپ، ا.مۇحامەديۇلى ك. ەسىمدى كاسىپكەردەن كاپيتالدىڭ قالعان 29 پايىزىن بەرۋىن تالاپ ەتكەن. تيىسىنشە ول باس تارتقان. سودان كەيىن ايىپتالۋشى «ديپلومات» قىزمەتكەرلەرىنە ءوزىن وسى كەشەن يەلەرىنىڭ ءبىرى رەتىندە كورسەتىپ، ولاردان جشس ديرەكتورىن قوناقۇيگە كىرگىزبەۋىن تاپسىرعان. دەرەكتەرگە ساي، ارتىنشا ا.مۇحامەديۇلى سەرىكتەستىك قاتىسۋشىلارىنىڭ جينالىسىن ۇيىمداستىرىپ، حاتتامانى قولدان جاساپ، جشس باسشىسى اتانادى.

سوتتا ارىستانبەك مۇحامەديۇلى تاعىلعان ايىپپەن كەلىسپەدى.

ەسكە سالايىق، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەديۇلى 2022 جىلى 28 مامىردا قاماۋعا الىنعان ەدى.

بيىلعى 20 ماۋسىمدا سوت ۇكىمىمەن ا.مۇحامەديۇلى 8 جىلعا باس بوستاندىعىنان ايىرىلدى.

سونىمەن قاتار ونىڭ سىبايلاستارى دا سوتتالدى.

فوتو: اشىق دەرەككوزدەن

Abai.kz