مويىندالماعان تاۋلى قاراباق رەسپۋبليكاسىنىڭ ومبۋدسمەنى گەگام ستەپانياننىڭ سوزىنشە، جەكسەنبىدە تاۋلى قاراباقتان بوسقىندار مىنگەن سوڭعى اۆتوبۋس كەلگەن. اۆتوبۋستا 15 ادام بولعان. ونىڭ سوزىنشە، ءوز بەتىمەن شىعا المايتىن ادامدارعا ەرىكتىلەر كومەكتەسكەن. ستەپانيان قاراباقتا قالىپ قويعان، جاردەمگە مۇقتاج ادامدار تۋرالى اقپارات بولسا، ول جونىندە قىزىل كرەستتىڭ حالىقارالىق كوميتەتىنە حابارلاسۋعا شاقىردى.
ارمەنيا بيلىگىنىڭ مالىمەتىنە قاراعاندا، 1 قازان كەشكە دەيىن تاۋلى قاراباقتان 100 514 ادام كەلگەن.
ەرەۆان ساناعىنا قاراعاندا، بيىل جىل باسىندا تاۋلى قاراباقتا 120 مىڭ ادام ءومىر سۇرگەن. الايدا ناقتى مالىمەت جوق. مويىندالماعان تاۋلى قاراباقتىڭ بۇرىنعى وكىلدەرىنىڭ سوزىنشە، قازىر ايماق بوساپ قالعان.
جەكسەنبىدە ازەربايجان پرەزيدەنتى اكىمشىلىگى تاۋلى قاراباقتا ەڭبەك جانە الەۋمەتتىك قورعاۋ مينيسترلىگى مەن كوشى-قون قىزمەتى ىسكە كىرىسكەنىن مالىمدەدى. ولار قاراباق ارمياندارىنىڭ ازەربايجان قوعامىمەن ارالاسۋىنا كومەكتەسۋگە ءتيىس دەگەن.
ازىرگە ازەربايجان اسكەرىنىڭ ايماق ورتالىعى حانكەندى (ستەپاناكەرت) قالاسى مەن مويىندالماعان رەسپۋبليكا باقىلاۋىندا بولعان وزگە دە ەلدىمەكەندەرگە كىرگەنى جونىندە اقپارات جوق.
ارمەنيا بيلىگى قاراباقتان قونىس اۋدارعاندارعا كومەك كورسەتىپ جاتىر. ارمەنيا پرەمەر-ءمينيسترى نيكول پاشينيان قونىس اۋدارعانداردىڭ اربىرىنە 250 دوللارعا جۋىق اقشا تولەۋ، ءار ادامعا ايىنا 100 دوللار شاماسىندا بەرۋ جونىندە قاۋلى شىعارعان. باعدارلاما التى ايعا ەسەپتەلگەن.
فوتو: اشىق دەرەككوزدەن
Abai.kz
