سوت پروتسەسى سوتتالۋشىنىڭ قاتىسۋىنسىز ءوتتى، ويتكەنى 2022 جىلدىڭ قازان ايىندا وۆسياننيكوۆا قىزىمەن بىرگە ءۇي قاماۋىنان قاشىپ، شەتەلگە كەتىپ قالعان. قازىر وعان قاۋىپ ءتونىپ تۇرعان جوق.

جۋرناليستكە 2022 جىلدىڭ شىلدەسىندە كرەمل جانىندا پيكەتكە شىققانى ءۇشىن "ساياسي جەككورۋشىلىك نەگىزىندە" رەسەي ارمياسى تۋرالى "جالعان" اقپارات تاراتتى دەگەن ايىپ تاعىلدى. سول كەزدە وۆسياننيكوۆا ۋكراينادا ولتىرىلگەن بالالاردىڭ سۋرەتتەرى بەينەلەنگەن جانە "پۋتين – كىسى ءولتىرۋشى، ونىڭ ساربازدارى  – فاشيستەر" دەگەن جازۋى بار پلاكات كوتەرگەن ەدى.

باستاپقىدا پروكۋرورلار بۇل پيكەت ءۇشىن 9,5 جىلعا باس بوستاندىعىنان ايىرۋدى تالاپ ەتتى، بىراق سوت ءجۋرناليستى سىرتتاي 8,5 جىلعا باس بوستاندىعىنان ايىردى.

ەستەرىڭىزگە سالا كەتەيىك، بۇل وۆسياننيكوۆانىڭ العاشقى كوپشىلىك دەمونستراتسياسى ەمەس. ول ءوزىنىڭ العاشقى نارازىلىعىن كەشكى جاڭالىقتاردىڭ تىكەلەي ەفيرىندە جەتكىزگەن. 2022 جىلدىڭ ناۋرىز ايىندا ءبىرىنشى ارنانىڭ قىزمەتكەرى رەتىندە وۆسياننيكوۆا "سوعىستى توقتاتىڭدار! ۇگىت-ناسيحاتقا سەنبەڭىزدەر، بۇلار سىزدەردى الداپ جاتىر" دەگەن جازۋى بار پلاكاتپەن “ۆرەميا” جاڭالىقتار باعدارلاماسىنىڭ تىكەلەي ەفيرىنە شىققان. سول كۇنى ول ميتينگىلەرگە شىعۋعا شاقىرعان بەينەۇندەۋ جازدى. بۇل ءۇشىن جۋرناليست "حابارلاماسىز قوعامدىق ءىس-شارانى ۇيىمداستىرعانى ءۇشىن" كىنالى دەپ تانىلىپ، 30 مىڭ رۋبل ايىپپۇل ارقالادى.