بيلىك تىيىمدارى مەن قۋدالاۋلارى مۇنداي باعدارلاما ورناتۋشىلاردى استىرتىن جۇمىس ىستەۋگە ماجبۇرلەدى. VPN ورناتۋ – تۇركىمەنستاندا قاۋىپتى جۇمىس.

اشعاباتتا VPN ورناتۋشىلاردى تاعى ۇستاي باستادى. ولاردىڭ كەيبىرى 15 تاۋلىككە قامالدى. ازاتتىقتىڭ تۇركىمەن قىزمەتى تىلشىلەرىنىڭ حابارلاۋىنشا، قاۋىپسىزدىك قىزمەتتەرى بىرنەشە ادامدى قولعا تۇسىرگەن.

"3 قازاندا ۇستالعان ادامداردى قاۋىپسىزدىك قىزمەتى الداۋ ارقىلى انىقتاعان. ولار پوليتسيا باسقارماسىنا ءتۇستى. 15 تاۋلىككە قامالىپ، 15 مىڭ مانات ايىپپۇل سالىندى " دەيدى دەرەككوز.

تۇركىمەن بيلىگى ەلدە ينتەرنەتتى تولىق باقىلاۋدا ۇستاۋعا تىرىسىپ جاتىر. VPN ورناتۋشىلارعا عانا ەمەس، وسىنداي قىزمەت قولدانۋشىلارعا دا قىسىم كۇشەيدى. مەملەكەت قىزمەتكەرلەرى مەن وقۋشىلاردىڭ تەلەفوندارىن تەكسەرۋ ادەتتەگى ىسكە اينالعان. جوعارى وقۋ ورىندارىندا مۇعالىمدەردەن الەۋمەتتىك جەلىلەرگە كىرمەۋ جونىندە قولحات الادى.

تۇركىمەنستان ءباسپاسوز بەن ينتەرنەت بوستاندىعى رەيتينگىندە الەم ەلدەرى ىشىندە ەڭ سوڭعى ورىنداردىڭ بىرىندە تۇر. 2022 جىلى تۇركىمەنستان ينتەرنەتى ەڭ قىمبات ءارى باياۋ ىستەيتىن ەلدەر تىزىمىنە ەنىپ، ينتەرنەتتى ءجيى بۇعاتتايتىن ون ەلدىڭ قاتارىنان تابىلدى.