وتكەن جىلعى توپالاڭدا جىلى جاققا تايىپ تۇرعان ءنۇرالى سودان بەرى توبە كورسەتكەن جوق، قالبىرعا قۇيعان سىناپ سىندى ۇستاتپاي ءجۇر, - دەپ جازادى DALA INSIDE.

اليەۆكە ىزدەۋ سالىنار كۇن جاقىن. ونىڭ ەلگە ورالعىسى كەلمەيتىن لوگيكاسىن تۇسىنۋگە بولادى.

نازارباەۆ كلانىنىڭ جىلىك مايى جۇقارىپ، ۇزىلۋگە شاق تۇر. اۋلەت وكىلدەرىنىڭ الدى تەرگەلىپ، ءىستى بولۋدا. ولاردىڭ ءىشىپ-جەگەنىن جەلكەسىنەن شىعارۋ پروتسەسى ىلدەبايلاپ بولسا دا، ىلگەرى جۇرۋدە. ايتسە دە، حالىققا «قوس قايراتتى قان قۇستىردىق...» دەگەن ارگۋمەنت ازدىق ەتۋدە. «توقاەۆتىڭ الياعا ءتىسى باتپاي ما؟» دەگەن ساۋال اكتۋالدى بولىپ تۇر.

بىزگە جەتكەن تاعى ءبىر ينسايد بويىنشا قازاقستاننىڭ جارتى بايلىعىن جامباسىنا باسىپ جاتقان تيمۋر قۇلىباەۆتىڭ قازىرگى ءحالى مۇشكىل. نازارباەۆتىڭ كۇيەۋبالاسى الماتىدان ۇزاپ شىعا المايدى، ونىڭ «نەۆىەزدنوي» دەگەن ستاتۋسى بار. قۇلىباەۆ قازاقستاندا قامالىپ قالعانىنا قايعىرىپ، ويسوقتى بوپ ءجۇر.

«جاڭا قازاقستان وسى ارقىلى اسقارۇلىنىڭ ەڭ باستى اكتيۆى «حالىق بانكىندەگى» 70 پايىز ۇلەسىنىڭ 30 پايىزىن ساتۋعا ماجبۇرلەۋدە»، - دەيدى ارنامىزدىڭ دەرەككوزى.

ايتا كەتەلىك، قۇلىباەۆ قارجى ينستيتۋتىن «المەكس» حولدينگى ارقىلى باسقارادى.

مۇنىڭ ءبارىن كورىپ، ءبىلىپ وتىرعان ءنۇرالىنىڭ جاقىن ۋاقىتتا ەلگە ورالۋى نەعايبىل. نازارباەۆتىڭ سۇيىكتى نەمەرەسى ءوزى يەلىك ەتەتىن «ترانستەلەكوم» بايلانىس وپەراتورىنىڭ وسىمەن ءۇشىنشى الدە ءتورتىنشى وتىرىسىنا قاتىسقان جوق.

ونىڭ قاڭتارعا دەيىنگى جوبا-جوسپارلارىنا شىنىمەن دە عالامات-تۇعىن. قاڭتارعا دەيىنگى ءنۇرالى اتاسى مەن اناسىنىڭ قالقاسىنان (وپەكاسىنان) شىعىپ، اۋلەتتىڭ ساياسي دوميناتسياسىن ۇزارتۋ ميسسياسىن ءوز موينىنا الۋعا تاس-ءتۇيىن دايىن وتىرعان.

بۇل تۋرالى ەسكى قازاقستاننىڭ ۇڭعىل-شۇڭعىلىنا ۇڭىلگەن تانىمال بريتان ءجۋرناليسى جواننا ءليلليستىڭ «قارا كولەڭكە» دەيتىن ەڭبەگىندە ەگجەي-تەگجەيلى ايتىلادى. كىتاپتى وقۋعا ەرىنسەڭىز، «داريعا بيلىكتى باسىپ الۋدى كوزدەدى...» دەگەن كنب-نىڭ ەكس-توراعاسى امانگەلدى شابدارباەۆتىڭ سۇحباتىن تاعى ءبىر شولىپ شىقساڭىز بولادى.

DALA INSIDE-قا بەلگىلى بولعانداي «شەتەل اسقان اكتيۆتى قايتارۋ تۋرالى» زاڭ كۇشىنە ەنگەلى اليەۆتىڭ PR قىزمەتى مەن شەتەل لوببيستەرى ءنۇرالىنىڭ ۇنامدى بەينەسىن قالىپتاستىرۋعا شۇعىل كىرىسكەن. الدىمەن «نازارباەۆتىڭ نەمەرەسى جابايى تابيعاتتىڭ جاناشىرى. قار بارىسىنىڭ قامقورشىسى، ءتۇز تاعىسىن ساقتاپ قالۋعا ولشەۋسىز ۇلەس قوسقان ادام...» دەگەن باعىتتى بايقاستاپ كورمەك.

ەسكى قازاقستاننىڭ وكىلدەرىن جاۋاپقا تارتپاي كوڭىلى كونشىمەيتىن قازاق قوعامىن مۇنداي تۇزى جوق، سۋ تاتىعان اقپاراتپەن الداي المايسىڭ. سوعان قاراعاندا الگىندەي كونتەنت شەتەلدىك اۋديتورياعا ارنالعان سىندى. بىزدىڭشە، مۇنىڭ استارىندا ساياسي جانە قارجىلىق ستراتەگيا جاتىر. ءالتۋريستىڭ وبرازىن سومدايتىن ءنۇرالى وسى ارقىلى شەتەلدەگى اكتيۆىن زاڭداستىرا الادى ءارى سالىقتىق جەڭىلدىكتەرگە يە بولادى.

اليەۆتىڭ بيزنەس-يمپەرياسى تۋرالى از ايتىلعان جوق. «Unit Telecom» توو-سى ارقىلى «ترانستەلەكومنىڭ» 75 پايىزىنا يەلىك ەتەتىن ءنۇرالى تەمىرجولداعى باعا ساياساتىنا ىقپال ەتتى. وپەراتور پويىز بيلەتىنىڭ باعاسىن مىڭ قۇبىلتىپ، بۇدان تۇسكەن ءتۇسىم تىكەلەي اليەۆتىڭ ءاميانىنا اۋىپ وتىرعان. مۇنى ادەتتە افەرا دەپ ايتادى. كومپانيا (25 پايىز ۇلەسى قتج-عا تيەسىلى) بىلتىر ءوزىنىڭ توپ-مەنەدجەرلەرىنە 560,9 ملن تەڭگە ديۆيدەنت تولەگەن.

بۇعان دەيىن قارجىمين جاماۋباەۆ «كومپانيا مەملەكەتكە قايتا ما؟» دەگەن ساۋالعا جاۋاپ بەرە الماي داعدارعان ەدى. اليەۆتىڭ قازىرگى تۇرعىلىقتى مەكەنى اراب امىرلىكتەرى دەپ تۇسپالدايمىز. استانا اكىمىنىڭ ورىنباسارى بولعان تۇستا (2014-2016 ج) ءنۇرالى شەتەلدىك ينۆەستيتسياعا جاۋاپ بەرگەن. سول جىلدارى ابۋ-دابيدىڭ شەيحى ءال-ناقايانمەن ءجيى جۇزدەسكەن اليەۆ ءوزىنىڭ Capital Holding كومپانياسى ارقىلى ەميراتتاعى جىلجىمايتىن مۇلىككە ينۆەستيتسيانى ءۇيىپ-توكتى دەۋگە نەگىز بار. Capital Holding بەرتىنگە دەيىن داڭقتى بوكسشى گەننادي گولوۆكينگە دەمەۋشى بولعانىن بىلەمىز.

ال سول جاعالاۋ ءالى كۇنگە «ەسكى قازاقستاننان تونەتىن قاۋىپ سەيىلگەن جوق» ەسەپتەيدى. بۇل تۋرالى الداعى ۋاقىتتا تارقاتىپ ايتامىز.

Abai.kz