بۇگىن قر پارلامەنت ءماجىلىسىنىڭ كەزەكتى جالپى وتىرىسى ءوتتى. جالپى وتىرىس بارىسىندا ءماجىلىس دەپۋتاتى ەرمۇرات باپي  بۇگىن جالپى وتىرىستا سالافيزم تاقىرىبىن تاعى قوزعاپ، ۆيتسە-پرەمەر تامارا دۇيسەنوۆاعا ساۋال جولدادى.

«ەلدەگى يسلامدىق سالافيتتىك اعىم ۇلتتىق جانە مەملەكەتتىك مۇددەمىزگە قاتەر ءتوندىرىپ جاتىر. وسى جونىندە ماجىلىستە ساۋال جولداندى. بۇل ساۋالدار – ەرىككەننىڭ ەرمەگى ەمەس، قازاقستان قوعامىن، رۋحاني ورتاسىن بارعان سايىن مەڭدەپ بارا جاتقان سالافيزم، ارابيزم دەرتىنىڭ الدىن الۋ ءۇشىن تۋعان، جاندارمەن ازاماتتىق الاڭداۋشىلىقتىڭ مۇددەسى ەدى. ءبىز مەملەكەتىمىزدىڭ ۇلتتىق تۇتاستىعى مەن حالقىمىزدىڭ ءداستۇرلى ءدىنىن، ۇرپاق بولاشاعىن قاتەرگە بايلاپ بەرە المايمىز. جات ءدىني اعىمداردى اقىل-سانادان دا، اۋىل-قالادان دا قۋىپ شىعۋعا مىندەتتىمىز. دەپۋاتتار قاققان دابىلدى قوعامدا «بۇلار يسلام دىنىنە قارسى شىقتى» دەپ الدەكىمدەر الەۋمەتتىك جەلىدە «ريناتتىڭ 80 پايىزى» سياقتى ءوڭىن اينالدىرىپ، دابىرا سالىپ ءجۇر»، - دەيدى ەرمۇرات باپي.

ە.باپي يسلامعا جانە ەلدەگى ءداستۇرلى مازحابقا، سالافيزم، ۆاحابيزم يدەياسىنا قارسى ەكەنىن ايتتى.

«تامارا قاسىمقىزى، سىزگە ساۋال: قازاق حالقىنىڭ ەجەلدەن ءومىر ءسۇرۋ جانە جات يدەولوگيالىق اعىمعا قارسى ۇكىمەت تاراپىنان باعدارلاما بار ما؟» – دەدى دەپۋتات.

ۆيتسە-پرەمەر تامارا دۇيسەنوۆا تامىز ايىنان باستاپ وسى ماسەلەمەن شۇعىلدانا باستاعانىن جەتكىزدى.

«تەولوگتاردى، ءدىني بىرلەستىكتەردىڭ وكىلدەرىن شاقىردىم. ولاردىڭ پىكىرى دە سىزدەرمەن پىكىرلەس. سىزدەردىڭ ۇسىنىستارىڭىزدى ولار دا قولداپ وتىر. الەۋمەتتىك جەلىلەردە ءارتۇرلى دىندەردى، باعىتتاردى ۋاعىزدايتىن كونتەنتتەرگە توسقاۋىل قوي الماي وتىرعاندارىن مويىندادى. ەكىنشىدەن، ءبىزدىڭ قوعامدا ءدىني ساۋاتتىلىقتىڭ تومەندىگىن، ۇشىنشىدەن، مەملەكەتتىك ورگاندارداعى رەتتەۋ جۇمىستارى مەن ۇيىمداستىرۋ جۇمىسىندا ءالى دە شالالىقتار بار. كەشە مەكتەپتەگى وقۋ جىلى باستالار الدىندا حيدجاب ماسەلەسى بويىنشا مەملەكەتتىك ورگانداردىڭ تولىق جاۋاپ بەرمەۋى قوعامدا ۇلكەن پىكىرتالاسقا اپاردى. ءدىن دەگەن وتە نازىك نارسە. كوپ نارسەنى زاڭدى تۇردە رەتتەۋىمىز كەرەك. شەتەلدىك تاجىريبەلەردىڭ ءبارىن قارادىق. ساۋد ارابياسىنىڭ وزىندە مەملەكەتتىك رەتتەۋ فۋنكتسيالارى كۇشەيتىلىپ جاتىر. سوندىقتان، ۇسىنىستارىڭىزبەن بىرگە زاڭعا وزگەرىس ەنگىزۋ كەرەك. ونداعى ەكى ماسەلەنى قاراۋىمىز كەرەك: مەملەكەتتىك زايىرلىلىق قاعيداتتارىن نىعايتۋ جانە ءدىني بىرلەستىكتەردى مەملەكەتتىك رەتتەۋ تەتىكتەرىن كۇشەيتۋدە وزگەرىس ەنگىزسەك، بۇگىنگى جۇمىسىمىزدى سوندا دۇرىستاۋعا بولادى دەپ ويلايمىن»، - دەدى تامارا دۇيسەنوۆا.

Abai.kz