سايلانىپ الىپ، وزىنە پارلامەنت ورىنتاعىنا قونجيۋ ءۇشىن جولداما بەرگەن سايلاۋشىلارىنىڭ ءۇمىتىن اقتاۋدى ەستەن شىعارىپ الاتىن پارتيالاردىڭ بارلىعىن جوققا شىعارمايمىز. وسى تۋراسىندا «اق جول» دەمپارتياسىنىڭ توراعاسى، ءماجىلىس دەپۋتاتى ازات پەرۋاشەۆتىڭ فراكتسيا اتىنان سويلەگەن سوزىندە وسى قاعيداتقا شىعارىلعان ۇكىمىنىڭ جەلى ەستى.

ازات پەرۋاشەۆ ءوز پارتياسىنىڭ سايلاۋشىلاردىڭ وتىنىمدەرى بويىنشا جۇمىسىنا قاتىستى ۇستانىمىن جاريا ەتتى.  بيزنەس پەن وتاندىق وندىرۋشىلەردىڭ پارتياسى رەتىندە قولدانبالى ەكونوميكا تۇرعىسىنان شەشىمىن تاپپاعان بىرنەشە تاقىرىپتى سارالاپ شىقتى. ەندى وسى جايىندا از-كەم ءسوز ەتەيىك.

حالىقتى تولعاندىرعان باستى ماسەلە – بۇل ينفلياتسيا مەن باعا ءوسۋى بولىپ تابىلاتىنى جاسىرىن ەمەس. وسى ماسەلەنى قالاي شەشۋگە بولاتىنىن ءماجىلىس دەپۋتاتى ازات پەرۋاشەۆ تارامداپ ايتىپ شىقتى.

ۇلتتىق بانك بيزنەس ءۇشىن نەسيەلەندىرۋدەگى بازالىق مولشەرلەمەنى شارىقتاتۋدا نە ىستەۋ قاجەت؟ بيزنەستى شىعىنعا باتىراتىن ساۋدا مينيسترلىگى مەن اكىمدىكتەر ءتيىستى باعا قالىپتاستىرۋعا مۇمكىندىك بەرمەۋىنە تىيىم سالۋ جانە ۇكىمەتتىڭ قول قۋسىرىپ، مونوپوليستەرگە تاۋاردىڭ وزىندىك قۇنىنا كىرەتىن تاريف باعاسىن وسىرۋگە رۇقسات بەرىپ قويۋشىلىعىنىڭ جولىن كەسۋ باعىتىندا نە ىستەپ، نە قويىلۋى ءبىرىنشى رەت ءسوز بولدى.

«قۇرمەتتى مەملەكەتتىك ورگاندار، سىزدەر ءوزارا ءبىر ىمىراعا كەلىپ، ناقتى ماقساتتارىڭىزدىڭ قانداي ەكەنىن انىقتاپ المايسىزدار ما؟! ايتپەسە، بۇل شىرعالاڭ اققۋ، شايان ءھام شورتان مىسالىنان اۋمايدى. قازىر شىنتۋايتىندا سىزدەر بانك وليگارحتارى مەن ەنەرگەتيكا وليگارحتارىن قولداپ وتىرسىزدار. ال، اقىر اياعىندا بارلىعى شاعىن جانە ورتا بيزنەستىڭ موينىنا ارتىلۋدا، الايدا، ولار دا وسى ەلدىڭ ءبىر بولشەگى»، - دەدى دەپۋتات.

«ققس-تى 12-دەن 16%-عا دەيىن كوتەرۋ نە ءۇشىن كەرەك» دەپ بيلىكتى ءبىر تۇيرەپ الدى پەرۋاشەۆ. وعان قوسا، وفشورلارعا قارجىسىن شىعارمايتىن، ياحتا مەن جەكە ۇشاق ساتىپ الىپ، ءسان-سالتاناتىن پاش ەتپەي، تەك كۇندەلىكتى تاباندى ەڭبەگىمەن ەل ەكونوميكاسىن ىلگەرىلەتۋگە ۇلەس قوسۋشىلار ءۇشىن نەسيەلەردى قازىرگى 22-23%-دان تىم بولماعاندا 10-12%-عا دەيىن تومەندەتۋدى ۇسىندى. «مىنە، وسى ەكى ماسەلەگە بايلانىستى ۇستانىمدارىڭىز سابوتاج با، ساۋاتسىزدىق پا؟»، - دەپ توبەدەن سىلەيتە سوققى جاسادى.

«اق جول» فراكتسياسى وسى باعىتتاعى قول جەتكىزگەن جەتىستىگى رەتىندە وزدەرىنىڭ ساۋالدارىنان كەيىن استانا، قوستاناي مەن قاراعاندىدا مولشەرلەمەنى 4%-دان 2-3%-عا دەيىن تومەندەتكەنىن ماقتانا اتاپ ءوتتى.

«اق جول» دەمپارتياسى رەيدەرلىكتىڭ جاڭا دەرتتىك قۇبىلىس دەندەي باستاعانى توڭىرەگىندە مەملەكەتتىك ورگاندارعا دابىل قاقتى. مىسالعا الماتى وبلىسىنداعى ماكۋلاتۋرا وڭدەۋ زاۋىتى، ورالداعى «كۋبلەي» ەت كونسەرۆىلەرىنىڭ زاۋىتى، «سولنەچنىي» ءسۇت زاۋىتى، الماتىداعى «نۇرتاۋ تەمىر» ءتبو زاۋىتى جانە ت.ب. ورىن العان جايتتى تىلگە تيەك ەتتى.

بۇدان وزگە بارلىق سايلاۋشىلاردى تولعاندىرىپ وتىرعان كاپيتالداردىڭ قايتارىلۋى ماسەلەسىنە توقتالدى. بۇل پرەزيدەنت ق. توقاەۆتىڭ تاپسىرماسى بولاتىن. قوعام مەن پارلامەنت ونى ءبىر اۋىزدان قولداعانىن جاقسى بىلەمىز.

وقىرمانداردىڭ ەسىنە سالا كەتەيىك، «اق جول» فراكتسياسى بارلىق فراكتسيالار قاتىساتىن پارلامەنتتىك تەرگەۋ كوميسسياسىن قۇرىپ، جۇمىسىنىڭ اشىقتىعى مەن جاريالىلىعىن قامتاماسىز ەتۋدى ۇسىنعان بولاتىن.

«سىزدەر قايتادان ەكونوميكاداعى مونوپوليانى جاسىرىپ جاتقان ساياسي مونوپولياعا اينالۋداسىزدار. «نۇر-وتاننىڭ قاتەلىكتەرىن قايتالاماڭىزدار»، - دەگەن پەرۋاشەۆ ءسوزى قازاق قوعامىنا وي سالۋعا ءتيىس.

Abai.kz