تۇركىستان وبلىسى مادەنيەت جانە تۋريزم باسقارماسىنىڭ «تۇركىستان مۋزىكالىق دراما تەاترى» مكقك كەزەكتى III ماۋسىمىن جاڭا قويىلىممەن اشادى.

تۇركىستان مۋزىكالىق-دراما تەاترى كەزەكتى III ماۋسىمىن وزبەكتىڭ كورنەكتى جازۋشى-دراماتۋرگى سايد احمادتىڭ «كەلىندەر كوتەرىلىسى» پەساسى بويىنشا قويىلاتىن سپەكتاكلدىڭ پرەمەراسىمەن اشادى. پەسانى قازاق تىلىنە اۋدارعان – اسقار سۇلەيمەنوۆ. الەمنىڭ 14 ەلىنىڭ ساحناسىندا  قويىلىپ،  كينو وندىرىسىندە  ەلەۋلى تۋىندىعا اينالعان  بۇل شىعارما 40 جىل وتسە دە ماڭىزدىلىعىن ءالى جويعان جوق. شىعارما تۇڭعىش رەت 1978 جىلى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا كورسەتىلدى. قازىرگى كۇنى قازاقستاندىق تەاترلاردىڭ باسىم بولىگى  سايد احمادتىڭ «كەلىندەر كوتەرىلىسى» سپەكتاكلىن قويدى دەسەك قاتەلەسپەيمىز.

وزبەك دراماتۋرگىنىڭ 40 جىلدان استام تاريحى بار «كەلىندەر كوتەرىلىسى»  كومەدياسى تۇركىستان مۋزىكالىق دراما تەاترى ساحناسىندا زاماناۋي كەلبەتكە يە بولادى. ينستسەنيروۆكانىڭ اۆتورى جانە رەجيسسەرى داۋرەن سەرعازين  كورشى وتىرعان ەكى  مەملەكەتتىڭ ورتاق قۇندىلىقتارىن ءتيىمدى پايدالانىپ، جاڭاشا سيپاتتا مۋزىكالىق كومەديا جاساپ شىعاردى. كومەديادا ەنە مەن كەلىن اراسىنداعى قارىم-قاتىناس عانا ەمەس، جالپى قوعامدا ورىن الىپ وتىرعان ماسەلەلەر دە كورسەتىلەدى. ادام بالاسىنىڭ ەركىندىگى، تاڭداۋ قۇقىعى، پسيحولوگيانىڭ جەدەل دامۋ اسەرى سياقتى كۇندەلىكتى ومىردە كەزدەسەتىن ماسەلەلەر نەگىزگە الىنعان. استارلى ازىلگە تولى كومەديا كورەرمەن قاۋىمدى كۇلكىگە قارىق قىلا وتىرىپ، تەرەڭ ويعا باتىرادى.

سپەكتاكلدە رولدەردى تۇركىستان مۋزىكالىق دراما تەاترىنىڭ جاس ارتىستەرى مەن ەلىمىزدىڭ الدىڭعى قاتارلى تەاترلارىنان شاقىرىلعان ارتىستەر سومدايدى. رولدەردە: قر ەڭبەك سىڭىرگەن قايراتكەرى ءداريا ءجۇسىپ، قر ەڭبەك سىڭىرگەن قايراتكەرى قونىسبەك بەگايداروۆ، قر ەڭبەك سىڭىرگەن قايراتكەرى ءالىمحان مىرزاحان، قر مەملەكەتتىك پرەزيدەنت ستيپەندياسىنىڭ يەگەرى اينۇر راحيپوۆا، قر پرەزيدەنتىنىڭ مادەنيەت سالاسىنداعى مەملەكەتتىك ستيپەندياسىنىڭ يەگەرى جانداۋلەت باتاي، وتاندىق بىرنەشە تاريحي فيلمدەردە باستى ءرولدى سومداعان باقىت حادجيباەۆ جانە مەيىرعات امانگەلدين، قازاق كينوسىنىڭ بەلدى اكتريسالارى قارلىعاش تۇرسىنبەكوۆا، تولقىن نۇربەكوۆا جانە تۇركىستان مۋزىكالىق دراما تەاترىنىڭ جاس تالانتتى ارتىستەرى.

ستسەنوگرافى: ولجاس دارۋباەۆ، حورەگرافى: ءمادينا مۇراتپەكوۆا، كوركەمدىك جەتەكشىسى: اينۇر كوپباساروۆا.

س. احمادتىڭ «كەلىندەر كوتەرىلىسى» كومەديالىق قويىلىمىنىڭ پرەمەراسى 2023 جىلى 21-22 قازان كۇندەرى ساعات 19:00-دە باستالادى.

سپەكتاكلدىڭ پرەمەراسىنا ارنالعان ءباسپاسوز ءماسليحاتى 2023 جىلى 18 قازان كۇنى ساعات 15:00-دە بولىپ ءوتتى. ءماسليحات بارىسىندا كورەرمەندەردى قىزىقتىرعان سۇراقتار قويىلىپ، باستى رولدەگى ارتىستەر تاراپىنان تولىققاندى جاۋاپتار بەرىلدى.

قويىلىمنىڭ رەجيسەەرى داۋرەن سەرعازينگە ونلاين كورەرمەندەر تاراپىنان قويىلعان «قازىرگى كەلىن مەن ەنە ماسەلەسى سپەكتاكلدە قاي جاعىنان كورىندى؟» دەگەن سۇراققا:

- نەگىزى «كەلىندەر كوتەرىلىسى» پەساسى دا، تاقىرىبى دا ەسكى بولعاندىقتان، ونى بۇگىنگى زامانعا ساي ىقشامداپ، مۋزىكالىق كومەديا جانرىنا اينالدىردىق. ارينە، ەنە مەن كەلىن ماسەلەسى اسىرەسە قازاق قوعامىندا ەسكىرمەيتىن تاقىرىپ. دەگەنمەن، سىزدەرگە تۇسىنىكتى بولۋ ءۇشىن زاماناۋي ەرەكشەلىكتەردى دە ەسكەرىپ، كوپ وزگەرتۋلەر ەنگىزدىك. – دەپ كورەرمەننىڭ قىزىعۋشىلىعىن ودان ءارى ارتتىرا ءتۇستى.

كەزەكتى ءبىر سۇراق قوناقتار اراسىنان باقىت حادجيباەۆقا قويىلدى:

- تۇركسىتان مۋزىكالىق دراما تەاترىنىڭ ەرەكشەلىگى نەدە؟

- بۇل مادەنيەتكە جاڭا لەپ الىپ كەلگگەن وزگەشە تەاتر. قالعان تەاترلاردا تۇراقتى اكتەرلار وينايدى. ال بۇل تەاتردا، بايقاساڭىزدار، اكتەرلاردى قازاقستاننىڭ تۇكپىر-تۇكپىرىنەن شاقىرتىپ، ارنايى پەسا الىپ، كوللابوراتسيا جاسايدى. بۇل بۇرىن سوڭدى قازاقستاندا بولماعان. وزدەرىڭىز ويلاڭىزدار ەندى، ءبىز «جاستار تەاترىنداعى» قانداي دا بولماسىن سپەكتاكلدەردە بەلگىلى ءبىر ارىپتەستەرىمىزبەن قايتا ويناۋعا تۋرا كەلەدى. بۇل جەردە ەندى باسقا مەكتەپتەن كەلگەن اكتەرلارمەن بىرىگىپ، جۇمىس جاساۋ ءبىز ءۇشىن ۇلكەن تاجىريبە. الارىمىز دا، بەرەرىمىز دە كوپ دەپ ويلايمىن.

ال تەاترىمىزدىڭ جاس اكتەرى اق-سۇلتان انۋاربەكتەن «جاستار تەاترىنىڭ» اكتەرلارىمەن جۇمىس جاساۋدىڭ ەرەكشەلىگىن ايتىپ بەرۋىن سۇرادى. ايتا كەتەيىك، سپەكتاكلدىڭ رەجيسسەرى داۋرەن سەرعازين مەن قويىلىمدا ونەر كورسەتەتىن 3 اكتەر «جاستار تەاترىنىڭ» ارتىستەرى.

- «جاستار تەاترى» - قازاق ونەر وردالارىنىڭ ىشىنەن ويىپ تۇرىپ ورىن الاتىن تەاترلاردىڭ ءبىرى. ولار ءبىر ۇستازدان - قازاقستان رەسپۋبليكاسىنىڭ ەڭبەك سىڭىرگەن قايراتكەرى نۇرقانات جاقىپباي اعامىزدان  ءبىلىم العان، ءبىر مەكتەپتىڭ بالالارى. ول كىسىمەن مەن ءوزىم دە جۇمىس جاساعان بولاتىنمىن، ەندى ونىڭ شاكىرتتەرىمەن دە قارا شاڭىراعىمىز «تۇركىستان مۋزىكالىق دراما تەاترىندا» جۇمىس جاساۋ بۇيىرعان ەكەن. وسىنداي باقىت، داۋرەن، جانداۋلەت اعالارىمىزدان ءتالىم-تاربيە الىپ، ءبىر ساحنادا ونەر كورسەتۋ – مەن ءۇشىن ۇلكەن مارتەبە. ەندەشە، ءبىزدى 21-22-ءشى قازان كۇنى پرەمەرامىزدا ارىپتەس بوپ ءبىر ساحنادا ويناپ جۇرگەندە كورەتىن بولاسىزدار!- دەپ تەاترىمىزدىڭ جاس اكتەرى ءوز ءسوزىن اياقتادى.

بۇگىنگى ءباسپاسوز ءماسليحاتىنىڭ ءبىر ەرەكشەلىگى - باق وكىلدەرىنەن بولەك، قالامىزدىڭ تانىمال بلوگەرلەرى دە كەلىپ، ارتىستەرمەن سۇراق-جاۋاپ الماستى. قويىلىمنىڭ تاقىرىبى مەن ارتىستەر قۇرامى وقۋشىلار مەن ستۋدەنتتەردىڭ دە قىزىعۋشىلىعىن تۋدىردى. قالا جاستارى اكتەرلەرمەن سۋرەتكە ءتۇسىپ، قولتاڭبا الدى.

Abai.kz