ءىىم مالىمەتىنشە، اقتوبە تۇرعىنىنىڭ ارىزىنان كەيىن تەرگەۋ باستالعان. ول باۋىرىنىڭ شىمكەنتتەگى كىرپىش شىعاراتىن كاسىپورىننان الماتىعا قاشىپ كەلگەنىن، بىراق ول جەردە ونى بەلگىسىز بىرەۋلەر ۇرلاپ الىپ كەتكەنىن ايتقان.

وسىنداي ارىز تۇسكەن سوڭ الماتى پوليتسياسىنىڭ قىزمەتكەرلەرى شىمكەنتكە بارىپ، 1992, 1994 جانە 1992 جىلدارى تۋعان ءۇش «جۇمىس بەرۋشىنى» ۇستاعان.

ەكى كىرپىش زاۋىتى اۋماعىندا وزبەكستاننىڭ 60-تان استام ازاماتى جۇمىس ىستەپ جۇرگەنى انىقتالعان. ولاردى زاۋىتقا جۇمىسقا شاقىرىپ، قۇجاتتارىن تارتىپ الىپ، ايلىق تولەمەي، ۇنەمى ۇرىپ-سوعىپ، قورقىتىپ وتىرعان.

25 جابىرلەنۋشى «سانا سەزىم» قۇقىق قورعاۋ ورتالىعىنان كومەك الىپ جاتىر، قالعاندارى جەكە قۇجاتتارى جوق بولۋىنا بايلانىستى ۋاقىتشا تۇراققا ورنالاستىرىلدى.

كىرپىش زاۋىتتارىنىڭ قوجايىندارىنىڭ ۇستىنەن قىلمىستىق ءىس قوزعالدى. ولارعا «ەڭبەك كۇشىن پايدالانۋ ءۇشىن زاڭسىز ۇستاۋ»، «كىسىگە بيلىگىن جۇرگىزۋ» ايىپتارى تاعىلدى.

Abai.kz