قر سۋ رەسۋرستارى مينيسترلىگى جوعارى جانە جوعارى وقۋ ورنىندارىنىڭ كەيىنگى ءبىلىم بەرۋ باعدارلاماسىنا جاڭا ماماندىقتاردى ەنگىزۋدى ۇسىندى.

قر سۋ رەسۋرستارى جانە يرريگاتسيا مينيسترلىگى جوعارى جانە جوعارى وقۋ ورنىنان كەيىنگى ءبىلىم بەرۋ ماماندىقتارىنىڭ قولدانىستاعى جىكتەۋىشىنە تۇزەتۋلەر ەنگىزىپ، بىرقاتار ماماندىقتاردى قوسۋدى ۇسىندى.

اتاپ ايتقاندا، «گيدروتەحنيكالىق قۇرىلىس جانە نىساندار»، «مەليوراتسيا جانە سۋارمالى ەگىنشىلىك»، «ەلدىمەكەندەردى سۋمەن جابدىقتاۋ جانە سۋ بۇرۋ»، «سۋ رەسۋرستارىن باسقارۋ»، «گيدروتەحنيكالىق مەليوراتسيا»، «سۋ شارۋاشىلىعىنداعى تەحنولوگيالىق پروتسەستەردى اۆتوماتتاندىرۋ جانە باسقارۋ»، «يننوۆاتسيالىق تەحنولوگيالار جانە ولاردى سۋ شارۋاشىلىعىندا پايدالانۋ»، «يرريگاتسيالىق جۇيەلەردەگى گيدروەنەرگەتيكالىق نىساندار»، «گيدرومەليوراتسيالىق جۇمىستاردى مەحانيكالاندىرۋ»، «سۋ شارۋاشىلىعى ەكونوميكاسى» ماماندىقتارى.

ءدال وسى ماماندىقتاردى ماگيستراتۋرا جانە دوكتورانتۋرا باعدارلامالارىنا دا قوسۋ ۇسىنىلادى. ال، بەيىندى جوعارى وقۋ ورىندارىنىڭ ستۋدەنتتەرى گيدروتەحنيكالىق قۇرىلىستاردىڭ بارلىق ءتۇرى بار مينيسترلىكتىڭ ۆەدومستۆولىق باعىنىستى ۇيىمدارىندا وندىرىستىك پراكتيكادان وتەدى دەپ جوسپارلانىپ وتىر.

سونداي-اق، مينيسترلىك قازاقستاندىق ستۋدەنتتەردى سۋ سالاسى ماماندىقتارى بويىنشا جاقىن جانە الىس شەتەلدەردىڭ جوعارى وقۋ ورىندارىندا وقىتۋ ءۇشىن گرانت ءبولۋ ماسەلەسىن دە قاراۋعا نيەتتى. بۇدان بولەك، سۋ شارۋاشىلىعى قىزمەتكەرلەرىنىڭ بىلىكتىلىگىن ارتتىرۋ ورتالىقتارى ۇيىمداستىرىلادى. ال حالىقارالىق سەرىكتەستەرمەن بىرلەسىپ جوعارى وقۋ ورىندارىندا جاڭادان «سۋ ديپلوماتياسى» ماماندىعىن ەنگىزۋ جوسپارلانۋدا.

«كادر تاپشىلىعى ماسەلەسىن شەشۋ ءۇشىن مينيسترلىك سۋ رەسۋرستارىن باسقارۋ، پايدالانۋ جانە قورعاۋ سالاسىنداعى مامانداردى دايارلاۋ جانە ولاردىڭ بىلىكتىلىگىن ارتتىرۋ باعدارلامالارىن جەتىلدىرۋ جونىندە قاجەتتى شارالار قابىلداۋعا نيەتتى. سۋ شارۋاشىلىعى ماماندارىنىڭ جالاقىسىن ارتتىرۋ ماسەلەسى جەكە قارالاتىن بولادى. سونىمەن قاتار، ءبىز باسقا ەلدەردىڭ ءتيىمدى تاجىريبەسىن قابىلدايتىن بولامىز. ول ءۇشىن حالىقارالىق بايلانىس باعىتىندا بەلسەندى جۇمىس جۇرگىزىلىپ جاتىر»، - دەدى قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz