مۇساباەۆتىڭ قايتا قامالۋىنا 7 قازاندا قاماۋداعى بەلسەندى مارات جىلانباەۆتى قولداپ، شاعىن مارافونعا قاتىسۋى تۇرتكى بولعان. بۇل جونىندە «بەلسەندىلەرەكسترەميستەمەس» قۇقىق قورعاۋشىلار توبى جازدى.

سوت قاۋلىسىنا قاراعاندا، مۇساباەۆتى «بەيبىت جيىن وتكىزۋ ءتارتىبىن بۇزدى» دەپ ايىپتاعان. بەلسەندىنىڭ ءوزى سوتتا تاعىلعان ايىپپەن كەلىسپەيتىنىن، شاعىن مارافون ميتينگىگە جاتپايتىنىن مالىمدەگەن.

ازاماتتىق بەلسەندى مارات مۇساباەۆ 10 قازاندا استانادا جالعىز ءوزى پيكەت وتكىزىپ، ادامداردى مارات جىلانباەۆتىڭ سوتىنا كەلۋگە شاقىرعان. ەرتەسىنە اكىمشىلىك سوت ونى «بەيبىت جيىن وتكىزۋ ءتارتىبىن بۇزدى» دەپ ايىپتاپ، 15 تاۋلىككە قاماۋ جونىندە شەشىم قابىلداعان.

قازاقستاننىڭ التى قالاسىندا 25 قازانعا بەلگىلەنگەن نارازىلىق ميتينگى قارساڭىندا كەم دەگەندە جيىرما شاقتى بەلسەندى ۇستالىپ، بەس كۇننەن جيىرما كۇنگە دەيىن قاماۋعا الىندى. ولاردىڭ كوبىسىنە «زاڭسىز ميتينگىگە قاتىستى» دەگەن ايىپ تاعىلدى.

بەلسەندىلەر 25 قازاندا بەيبىت جيىن وتكىزۋ تۋرالى وتىنىشتەرىن اكىمشىلىكتەرگە وتكىزگەن، بىراق جەرگىلىكتى بيلىكتەن قولداۋ تاپپاعان.

Abai.kz