امەريكانىڭ ايگىلى CNN ارناسى سارسەنبى كۇنى گازا ايماعى دەنساۋلىق ساقتاۋ باسقارماسىنىڭ مالىمەتىن جاريالادى. وندا يزرايلدءىڭ كەك الۋ وپەراتسياسىنان 7000 مىڭنان استام پالەستينالىقتىڭ قازا تاپقانى ايتىلعان.

مۇنىڭ ىشىندە 2665-ءى بالالار، 132-ءى جاسقا دا تولماعان. 6747 قۇرباننىڭ اتى-ءجونى انىقتالعان، 281-ءنىڭ تۇلعاسى انىقتالۋ ۇستىندە ەكەن. وسى قاندى مالىمەتكە بايلانىستى تىلشىلەردىڭ سۇراعىنا جاۋاپ بەرگەن اق ءۇي باسشىسى بايدەن مىرزا يزرايلدىڭ قاراپايىم بۇقارالاردى ولتىرگەنىن جوققا شىعارماعانىمەن، پالەستين تاراپتىڭ ناقتى دەرەگىنە كۇمانمەن قارايتىنىن جەتكىزگەن.

ونىڭ الدىندا چيكاگو قالاسىنىڭ سىرتىندا 6 جاسار ارعى تەگى پالەستينالىق بالانى ەرەسەك ادام قاتىگەزدىكپەن ولتىرگەن. ساقشىلارعا بالامەن ورانعان شەشەسىن ءولتىرۋدى كوزدەگەنىن جاسىرماي ايتقان. بايدەننىڭ ءسوزى امەريكادا قايتا ورشىگەن يسلاموفوبياعا جەل بەرگەندەي اسەر ەتكەن.

وسىدان كەيىن امەريكا حالقىنىڭ 1 پايىزىن قۇرايتىن مۇسىلمان جاماعاتى ورە تۇرەگەلدى. امەريكا مۇسىلماندارىنىڭ بىرلەستىك ۇيىمى CAIR بايدەننىڭ مۇسىلمانداردىڭ ءولىم كورسەتكىشىنە سەنىمسىزدىكپەن قاراعانىن ايىپتاپ، كەشىرىم سۇراۋدى تالاپ ەتتى. ۇيىم جەتەكشىسى نيقاپ اۆاد: «تىلشىلەر ولگەندەر سانىنىڭ وراسان ەكەنىن كۇن سايىن جازىپ جاتىر. ودان سىرت گازادان ساعات سايىن مىلجا-مىلجاسى شىعىپ ولگەن ايەلدەر مەن بالالار كورسەتىلگەن بەينە جازبالار اعىلىپ جاتىر»، - دەدى. مۇسىلمانداردىڭ قارسىلىعىنان قايمىققان پرەزيدەنت بايدەن كەشە امەريكا مۇسىلماندارىنىڭ باسشىسىن قابىلداۋعا ءماجبۇر بولعان. كەزدەسۋ جابىق جاعدايدا وتكەن. دەسەدە ءباسپاسوز قۇرالدارى بايدەننىڭ اقتالىپ، مۇسىلماندارعا قارسى ارەكەتتەردىڭ جولىن كەسۋگە ۋادە بەرگەنى انىق دەيدى.

يزرايل تارابىنىڭ گازانى بومبا استىنا العانىنا 19 كۇن بولدى. وسى ۋاقىت ىشىندە 2000 بومبا اتقان. حاماس تارابىنىڭ مالىمەتىنشە، سەيسەنبى كۇنى ادام شىعىنى ەڭ كوپ بولعان. ءبىر تاۋلىكتە عانا 704 ادام جان تاپسىرعان. دەسە دە يزرايل تارابى ءوزىنىڭ اسكەري ارەكەتىن «سوققى ەمەس، قورعانۋ» دەپ كەلەدى.

گازاعا اسكەر كىرگىزۋ جوسپارىن كەشىكتىرگەنىمەن، ەش اينىماعان. ءيزرايلدىڭ زەينەتتەگى اسكەري قولباسشىسى: «يزرايل اسىقپايدى. امەريكا يسلام تەرروريستەرى ۇيىمىن جويۋ ءۇشىن 5 جىل سارىپ ەتتى. ءبىز دە حاماس-تى التى كۇندە جويا المايمىز»، - دەپ پىكىر بىلدىرگەن.

انگليانىڭ سوعىس ستاتيستيكاسىن جۇرگىزەتىن Airwars اگەنتتىگىنىڭ ساراپتاۋىنشا، يزرايل گازا ايماعىنداعى 7000 نىساندى بومبالاعان. سوققىنىڭ كۇشى اقش-تىڭ تاريحتاعى مۇسىلمان ەلدەرىنە جاساعان سوققىلارىنان دا اسىپ تۇسكەن. ۇيىم قۇرىلعاننان بەرگى (2014 جىلى) ەڭ قاندى كورسەتكىشتەر وسى جولى تىركەلگەن. پالەستينالىقتاردىڭ ءولىمى 1982 جىلعى ليۆان سوعىسىنان كەيىن ەڭ كوپ تىركەلگەن.

ەسبول ۇسەنۇلى

Abai.kz