وتكەن اپتا ىشىندە ەلىمىزدە 2613 قىلمىستىڭ جارتىسىنان استامى ءىزىن سۋىتپاي اشىلعان.

«ءبىر اپتا ىشىندە 2613 قىلمىس جاسالدى، ونىڭ 1602-ءسى تاۋلىك ىشىندە اشىلدى. پوليتسيا قىزمەتكەرلەرى 10 كىسى ءولتىرۋدى، 11 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى ءىزىن سۋىتپاي انىقتادى. ودان بولەك، ءبىر قاراقشىلىق، 27 توناۋ جانە 314 بوتەن مۇلىكتى ۇرلاۋ قىلمىستارىن اشتى»، — دەدى ىشكى ىستەر مينيسترلىگىنىڭ وكىلى شۇعىلا تۇرلىبەك ۆەدومستۆودا وتكەن ءباسپاسوز ءماسليحاتىندا.

سونداي-اق، ىشكى ىستەر مينيسترلىگى ۆەدومستۆوارالىق شتاب وتىرىسىندا ناشاقورلىققا جانە ەسىرتكى بيزنەسىنە قارسى كۇرەس جونىندەگى كەشەندى جوسپاردىڭ ورىندالۋىن تالقىلادى.

ىشكى ىستەر ءمينيسترىنىڭ ورىنباسارى قايرات سۇنتاەۆ قىلمىستىق قۋدالاۋ ورگاندارىنا ەسىرتكىنى ساراپتاۋ ماسەلەسىن كوتەردى.

ول «ءداستۇرلى» ەسىرتكىنى زەرتتەۋ 10 كۇنگە دەيىن، ال سينتەتيكالىق پرەپاراتتاردى زەرتتەۋ ءبىر ايدان اساتىنىن اتاپ ءوتتى.

ال ساراپشىلاردىڭ پىكىرىنسىز كۇدىكتىلەردىڭ جولىن كەسۋ شاراسىن تاڭداۋ مۇمكىن ەمەس، بۇل جاۋاپكەرشىلىكتەن جالتارۋ قاۋپىن ارتتىرادى.

Abai.kz