وتكەن ايدا «قازاقاكادەمياسى» ورتالىعى رەسپۋبليكا كۇنىنە وراي «مەن –  ءوزىڭمىن، وتانىم...» اتتى I رەسپۋبليكالىق ونلاين بايقاۋ جاريالاعان ەدى. وسكەلەڭ ۇرپاقتى پاتريوتيزمگە تاربيەلەۋ، جاسوسپىرىمدەر مەن جاستاردىڭ شىعارماشىلىق قابىلەتىن شىڭداۋ ماقساتىندا ۇيىمداستىرىلعان ەسسەلەر بايقاۋى بۇگىن مارەسىنە جەتتى.

سونىمەن، «مەن – ءوزىڭمىن، وتانىم...» ونلاين-بايقاۋىنىڭ قورىتىندىسى تومەندەگىدەي.

نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ ستۋدەنتى ارۋجان شينيباي ۇزدىك دەپ تانىلدى. ەكىنشى ورىندى وسى ۋنيۆەرسيتەتتىڭ ستۋدەنتى جاۋكەن بورانباي يەلەنسە، جۇلدەلى ءۇشىنشى ورىندى پاۆلودار قالاسىنداعى احمەت بايتۇرسىنۇلى اتىنداعى يننوۆاتسيالىق ۇلگىدەگى جالپى ورتا ءبىلىم بەرۋ مەكتەبىنىڭ وقۋشى ىرىسالدى كينجيكوۆا الدى. بۇدان بولەك،  شىعىس قازاقستان وبلىسى، وسكەمەن قالاسىنداعى شىعىس تەحنيكالىق گۋمانيتارلىق كوللەدجىنىڭ ستۋدەنتى ايعانىم ايدوسقىزى مەن جەتىسۋ وبلىسى، پانفيلوۆ اۋدانى، جاركەنت قالاسى، جاركەنت جوعارى پەداگوگيكالىق كوللەدجىنىڭ ستۋدەنتى گۋلنارام ماگامەتوۆا ىنتالاندىرۋ سىيلىعىنا يە بولدى.

ءبىز وسى ورايدا «قازاق اكادەمياسى» ورتالىعىنىڭ باسشىسى اينۇر راپىلبەكقىزىمەن شاعىن سۇحبات قۇرعان ەدىك.

– اينۇر راپىلبەكقىزى، قازىرگى تاڭدا ەسسەلەر بايقاۋى جوق ەمەس. ال سىزدەر ۇيىمداستىرعان بايقاۋ باسقالارىنان نەسىمەن ەرەكشەلەنەدى؟

– دۇرىس ايتاسىز، بۇل كۇندەرى ەسسەلەر بايقاۋى جوق دەپ ايتۋعا بولمايدى. الايدا ولاردىڭ سانى كوپ تە ەمەس. جالپى، پاتريوتتىق تاقىرىپتاردى وزەك ەتكەن مۇنداي بايقاۋلار قانشا وتكىزىلسە دە كوپتىك ەتپەيدى. ويتكەنى جاھاندانۋ ۇدەرىسى ءبىز ويلاماعان دارەجەدە قارقىن الىپ كەتكەلى قاي زامان! ال وسىنداي بايگەلەر بالالاردىڭ شىعارماشىلىق قابىلەتىن شىڭداپ قانا قويماي، ولاردىڭ ەلىنە، جەرىنە دەگەن سۇيىسپەنشىلىك سەزىمىنىڭ ارتۋىنا ىقپال ەتەدى دەپ ويلايمىن. ءسىز بەن ءبىزدىڭ كوكسەگەنىمىز دە وسى بولسا كەرەك. ەندى «مەن – ءوزىڭمىن، وتانىم...» ونلاين-بايقاۋىنىڭ وزىنە توقتالا كەتەيىن.  بايقاۋعا 10-11 سىنىپ وقۋشىلارى، كوللەدجدەر مەن جوعارى وقۋ ورىندارىنىڭ ستۋدەنتتەرى قاتىستىرىلدى. ەسسە جازۋعا بەس تاقىرىپ («مەن – ءوزىڭمىن، وتانىم...»; «ازاتتىعىم – عاجاپ كۇنىم»; «...نۇرلى جۇلدىز، بابام ءتىلى، سەن قالدىڭ!»; «قازاقى قالىبىم: ءداستۇرىم – تامىرىم»; «ەلىمنىڭ ەرتەڭى – مەنىڭ ەرتەڭىم») ۇسىندىق. وتىزعا جۋىق ءوتىنىش كەلىپ ءتۇستى.

– وسىنشا شىعارمانىڭ ىشىنەن ۇزدىگىن انىقتاۋ قيىنعا سوققان بولار؟

– ارينە، قازىلار القاسى دا وسىنى ايتتى. ەلىم دەگەن جاسوسپىرىمدەر مەن جاستاردىڭ بارىنە بىردەي جۇلدە بەرۋگە بولار ەدى. بىراق جارىس بولعان سوڭ ساناۋلى شىعارمالار عانا جەڭىس تۇعىرىنان كورىنەدى عوي. وسى رەتتە نازارعا الاتىن ءجايت بار: كەلىپ تۇسكەن ەسسەلەر – ءجاي ايتىلا سالعان ءسوز ەمەس، بالالاردىڭ جۇرەگىنىڭ ءۇنى. ولاردىڭ ارقايسىسىنىڭ جازعاندارىنان وسىنى اڭعارۋعا بولادى.

تاعى ءبىر دۇنيەنى ەسكەرتەيىن، كەي ەسسەلەر ءبىر-بىرىمەن قاتتى ۇقساس بولدى. مۇنىڭ سەبەبى تاڭداعان تاقىرىپتارىنىڭ بىردەي ەكەنىندە ەمەس. ايتپاسا ءسوزدىڭ اتاسى ولەدى، كەي بالالار ەسسەلەرىنىڭ كوپ بولىگىن عالامتوردان كوشىرىپ جازعان. بۇعان قوسا، قازىلار القاسى ءتىل تازالىعىنا، وي جۇيەلىلىگىنە، قۇرىلىمىنا ءمان بەردى. ال قازىلار القاسىنىڭ قۇرامىندا قر جازۋشىلار وداعىنىڭ مۇشەلەرى مەن پەدوگوگتار، ءتىل ماماندارى بولدى.

– شاعىن سۇحباتىمىزدى مىنا ءبىر سۇراقپەن تۇيىندەگىم كەلىپ وتىر. جاستاردى وتانسۇيگىشتىككە تاربيەلەۋ ءىسى قالاي جۇزەگە اسىرىلىپ جاتىر دەپ سانايسىز؟

– بۇل ورايدا اۋزىمىزدى قۇر شوپپەن ءسۇرتىپ، قارا اسپاندى ءتوندىرۋدىڭ رەتى جوق. مەملەكەت تاراپىنان دا، ءتۇرلى-ءتۇرلى ۇيىمدار مەن جەكەلەگەن ادامدار دا وسى ماسەلەنى وزەك ەتكەن شارۋالاردى، ءىس-شارالاردى اتقارىپ كەلەدى. بۇعان «قازاقاكادەمياسى» ورتالىعى ۇيىمداستىرعان اتالمىش ونلاين-بايقاۋ دا دالەل.

سۇحباتتاسقان ب.بەردىحان

Abai.kz